Ghulamidin paxtaning hayati (22): yawropadin amérikigha seper

Muxbirimiz qutlan
2017-10-03
Élxet
Pikir
Hembehr
Print
  • Print
  • Hembehr
  • Pikir
  • Élxet
Ghulamidin paxta amérikada ziyarette boluwatqan merhum eysa yüsüp aliptikinge hemrah bolup amérika awam palatasining reisi bilen körüshken. Süret: ongdin birinchi kishi ghulamidin paxta, ikkinchi kishi amérika awam palata reisi jon william mekkormak(John William McCormack), üchinchi kishi eysa ependi. 1970-Yili nyo-York.
Ghulamidin paxta amérikada ziyarette boluwatqan merhum eysa yüsüp aliptikinge hemrah bolup amérika awam palatasining reisi bilen körüshken. Süret: ongdin birinchi kishi ghulamidin paxta, ikkinchi kishi amérika awam palata reisi jon william mekkormak(John William McCormack), üchinchi kishi eysa ependi. 1970-Yili nyo-York.
RFA/Qutlan

«Azadliq radiyosi» ning uyghurche anglitishi resmiy tesis qilinghandin kéyin, 1960-Yillarning axiridin 1970-Yillarning bashlirighiche bolghan jeryanda uyghur bölümining adem küchi tedrijiy köpiyidu we radiyo programmilirimu xillishidu.

1966-Yilining yaz aylirida, yeni yiraqtiki uyghurlar wetinide xitay kompartiyesining rehbiri maw zédong qozghighan «medeniyet zor inqilabi» ning qara perdisi yéyilghan bir mezgillerde ghulamidin ependi tunji qétim amérikani ziyaret qilish pursitige érishidu. Shu yili yazda bash shtabi myunxéndiki «azadliq radiyosi» ghulamidin ependini bir ayliq möhlet bilen amérikani ziyaret qilishqa ewetidu.

Halbuki, shu qétimliq amérika sepiri ghulamidin ependining kéyinki hayat yolining yawropa quruqluqidin amérika qitesige yötkilishige yol achidu. Amérika ziyaritidin qaytqan ghulamidin ependi uzun ötmeyla «azadliq radiyosi» türkistan bölümining nyo-Yorkta turushluq muxbirliqigha teyinlinidu. Hayatidiki eng zor özgirishlerge tolghan bu mezgillerni esliginide ghulamidin ependi eyni yilliri «azadliq radiyosi» ning uyghurche anglitishida birlikte xizmet qilghan sepdashlirini hörmet we séghinish ilkide tilgha alidu.

Ghulamidin paxtaning bayan qilishiche, u shu mezgillerde yene «azadliq radiyosi» ning nyu-Yorktiki birleshken döletler teshkilatida turushluq alahide muxbiriliq salahiyiti bilen mezkur radiyoning uyghurche, özbekche we bashqa türkiy tillardiki anglitishi üchün qoshumche xewer yollash wezipisinimu öz üstige alidu.

Hayatining yashliq yillirini yashawatqan ghulamidin paxta kelgüsige bolghan ümid, ishench we yéngiche arzular bilen yéngi quruqluqtiki merkiziy sheher nyo-Yorkqa kélidu. Bu qétim u ayali we tughulghinigha emdila birqanche yil bolghan oghlini élip pütün ailisi bilen amérikigha köchüp kélidu.

1960-Yillarning axirqi mezgilliridiki nyo-York yéngiliqqa, uchqandek tereqqiyatqa we tewekkülchilerning qarargahigha aylanghan bir chong sheher idi. Nyo-Yorkning hayati gherb dunyasining eng qaynaq, eng örkeshlik we eng riqabetlik bir sehipisige wekillik qilatti. Mana mushu sheherning hayatigha kirip kelgen ghulamidin paxta nyo-Yorkta turup myunxéndiki «azadliq radiyosi» ning türkistan bölümi üchün heptide ikki xewer ishlep ewetidu.

Amérikagha köchüp kelgen ghulamidin paxta uzun ötmey eyni yilliri gérmaniyede oqughan éléktron téxnika kespige munasiwetlik ikkinchi bir xizmetke orunlishidu. U gérmaniyediki «azadliq radiyosi» üchün heptiki ikki xewer ishlep ewetkendin bashqa yene «pan-Amérika hawa yolliri» ning éléktronik kontrol bölümide téxnik xadim bolup ishleydu.

(Dawami bar)

Toluq bet