ឱកាសចូលរួមវគ្គបណ្ដុះបណ្ដាលផ្នែកសារព័ត៌មាននិងធ្វើកម្មសិក្សានៅអាស៊ីសេរី
2017.03.14
អាស៊ីសេរីនឹងរៀបចំវគ្គបណ្ដុះបណ្ដាលខ្លីមួយស្ដីពីសារព័ត៌មានវិទ្យុ និងទូរទស្សន៍ ក្នុងបំណងផ្ដល់ឱកាសដល់និស្សិតដែលចាប់អារម្មណ៍អាជីពសារព័ត៌មានផ្នែកទូរទស្សន៍ឲ្យបានរៀនសូត្រ និងដកស្រង់បទពិសោធន៍ពីអ្នកបម្រើការងារផ្ទាល់ក្នុងវិស័យនេះ។
វគ្គបណ្ដុះបណ្ដាលនេះមានរយៈពេល៤ថ្ងៃ គឺចាប់ពីថ្ងៃទី ៣០ ខែ មីនា ដល់ថ្ងៃទី ២ ខែ មេសា ខាងមុខ ពីម៉ោង៨ព្រឹក ដល់ម៉ោង៤រសៀល។
តាមរយៈវគ្គសិក្សានេះ សិក្ខាកាមនឹងបានយល់ដឹងអំពីតួនាទីសារព័ត៌មានក្នុងដំណើរការប្រជាធិបតេយ្យ ក្រមសីលធម៌ គោលការណ៍វិជ្ជាជីវៈ និងវិធីសាស្ត្រសរសេរសេចក្ដីរាយការណ៍ផ្សេងៗរួមមាន ព័ត៌មានខ្លី ព័ត៌មានពិស្ដារ បទវិភាគ និងប្រភេទអត្ថបទផ្សេងៗទៀតសម្រាប់វិទ្យុ និងទូរទស្សន៍។
ក្រោយពេលបញ្ចប់វគ្គបណ្ដុះបណ្ដាល សិក្ខាកាមទាំងអស់នឹងទទួលបានវិញ្ញាបនបត្របញ្ជាក់ការសិក្សា ដែលចុះហត្ថលេខាដោយតំណាងវិទ្យុអាស៊ីសេរី។
លើសពីនេះ អាស៊ីសេរីនឹងផ្ដល់ឱកាសធ្វើកម្មសិក្សាផ្នែកទូរទស្សន៍ដល់សិក្ខាកាមឆ្នើមចំនួន៦នាក់ ដែលចាប់អារម្មណ៍ចង់ដកស្រង់បទពិសោធន៍ការងារផ្ទាល់ នៅអាស៊ីសេរីរយៈពេល៣ខែ ចាប់ពីថ្ងៃទី ៥ ខែ មេសា ដល់ថ្ងៃទី ៥ ខែ កក្កដា ដោយបម្រើការក្នុងការងារផ្សាយពិសេសអំពីដំណើរការបោះឆ្នោតក្រុមប្រឹក្សាឃុំ-សង្កាត់ អាណត្តិទី៤នេះ។
សូមចុះឈ្មោះចូលរួមវគ្គសិក្សានេះ ដោយផ្ញើអ៊ីមែល(Email) ទៅកាន់ chengm@rfa.org ដោយបង្ហាញពីចំណាប់អារម្មណ៍របស់លោកអ្នកចំពោះវគ្គបណ្ដុះបណ្ដាលនេះ ព្រមទាំងភ្ជាប់មកជាមួយនូវប្រវត្តិរូបសង្ខេបរបស់អ្នក ចាប់ពីថ្ងៃផ្សាយដំណឹងនេះ រហូតដល់ថ្ងៃទី២៦ ខែ មីនា។ ព័ត៌មានបន្ថែម សូមហៅទៅលេខ ០៧៨ ៦៣៣ ៧៦៦។