បុព្វហេតុរបស់សមាគមអ្នកប្រជាធិបតេយ្យ
2011.01.19
លោក ម៉ម សូណង់ដូ បច្ចុប្បន្នជាប្រធានវិទ្យុសំបុកឃ្មុំ មានប្រសាសន៍ថា សមាគមអ្នកប្រជាធិបតេយ្យហៅជាភាសាអង់គ្លេសថា Democratic Association (DA) បានចាប់ផ្តើមរៀបចំរចនាសម្ព័ន្ធសមាគមជាបណ្តើរៗ តាំងពីខែកក្កដា ឆ្នាំមុននេះមក ដោយជ្រើសរើសបុគ្គលិកសកម្ម និងស្ម័គ្រចិត្ត ដើម្បីប្រតិបត្តិការងាររបស់សមាគមឲ្យបានហ្មត់ចត់។
លោក ម៉ម សូណង់ដូ មានប្រសាសន៍ថា ៖ «សមាគមនេះជាសមាគមមិនមែនជាគណបក្សនយោបាយទេ ហើយសមាគមនេះក៏មិននៅក្រោមក្លៀកគណបក្សនយោបាយណាមួយដែរ។ អ្វីដែលសមាគមធ្វើ គឺដើម្បីឲ្យប្រជាពលរដ្ឋមានក្រដាសស្នាមបំពេញលក្ខណៈជាប្រជាពលរដ្ឋខ្មែរ ១០០% ហើយមានសិទ្ធិទៅបោះឆ្នោត នេះជាកិច្ចការរបស់សមាគម។ ខ្ញុំសូមបញ្ជាក់ថា ការដែលខ្ញុំបង្កើតសមាគមអ្នកប្រជាធិបតេយ្យមកនេះ គឺមិនមែនប្រកួតប្រជែងជាមួយរដ្ឋាភិបាល ក៏មិនប្រកួត ហើយក៏មិនប្រកួតប្រជែងជាមួយគណបក្សណាដែរ គឺសម្រួលកិច្ចការងាររបស់អាជ្ញាធរទៅវិញទេ ធ្វើយ៉ាងដូចម្តេចឲ្យអាជ្ញាធរមានក្រដាសស្នាម»។
លោក ម៉ម សូណង់ដូ មានប្រសាសន៍ថា តាំងពីឆ្នាំ១៩៩៣មក មានប្រជាពលរដ្ឋខ្មែរពី ១០ ទៅ ៣០% នៅស្ទើរតែគ្រប់ខេត្តក្រុង ពុំមានឯកសារច្បាប់ត្រឹមត្រូវ ដូចជាប័ណ្ណគ្រួសារ អត្តសញ្ញាណប័ណ្ណ និងសំបុត្រកំណើតជាដើម ដែលជាហេតុធ្វើឲ្យគាត់ពុំអាចបំពេញលក្ខខណ្ឌច្បាប់ក្នុងការចូលរួមបោះឆ្នោតបាន។
លោកបញ្ជាក់ថា សមាគមអ្នកប្រជាធិបតេយ្យមានគោលការណ៍ច្បាស់លាស់ដើម្បីសហការជាមួយក្រុមអ្នកច្បាប់ ក្នុងការជួយបំពេញចំណុចខ្វះខាត អាចចូលរួមបោះឆ្នោតបាននៅពេលខាងមុខ ៖ «ខ្ញុំមានបំណងបង្កើតជួលមេធាវី ដើម្បីដោះស្រាយពីបញ្ហានេះដែរ។ អ្វីដែលខ្ញុំធ្វើនេះ គឺធ្វើទៅតាមច្បាប់។ ត្រូវខ្ញុំទាក់ទងទៅខាងក្រសួងមហាផ្ទៃ ក៏ដូចជា គ.ជ.ប. ដែរ។ ថ្មីៗនេះ កាលពីថ្ងៃ៥ ខ្ញុំនៅស្រុកបារាំង ខ្ញុំមើលតាមកាសែត មើលតាមសារព័ត៌មាន ឮថា លោក អ៊ឹម សួស្តី ប្រធាន គ.ជ.ប. បានប្រកាសបដិសេធប្រជាពលរដ្ឋ ១សែននាក់ដែលគ្មានក្រដាសស្នាមត្រឹមត្រូវ ហើយដែលធ្លាប់បោះឆ្នោត តែត្រូវគេលុបឈ្មោះទៅវិញ»។
លោក ជា បំរ៉ុង ដែលជាអនុប្រធានសមាគមអ្នកប្រជាធិបតេយ្យ មានប្រសាសន៍ឲ្យដឹងថា ដំណើរការនៃជំហានដំបូងរបស់សមាគមអ្នកប្រជាធិបតេយ្យនៅកម្ពុជា គឺចងក្រងរចនាសម្ព័ន្ធអ្នកគ្រប់គ្រង និងសមាជិកនៅតាម៦ ខេត្ត ក្រុង ៖ «គោលការណ៍របស់យើងគេអនុញ្ញាតម្តង ៦ខេត្ត។ យើងចាប់ផ្ដើមខេត្តកណ្ដាល ព្រៃវែង កំពង់ចាម តាកែវ កំពង់ស្ពឺ និងកំពង់ឆ្នាំង។ ខេត្តក្រៅពីនេះគឺមានរៀបចំខ្លះដែរ។ សកម្មភាពជាក់ស្ដែងគឺមានទទួលសមាជិកដែលចូលរួមសមាគម និងតែងតាំងរចនាសម័្ពន្ធមានភូមិឃុំស្រុកខេត្តឲ្យមានពេញលេញទៅ។ តែឥឡូវនៅមិនទាន់មានគ្រប់រចនាសម័្ពន្ធទាំង ៦ខេត្តនោះនៅឡើយទេ។ គ្រាន់តែយើងរៀបចំបណ្តើរៗ ព្រោះប្រជាពលរដ្ឋលោកនៅមិនទាន់យល់នៅឡើយទេ គាត់មានការភ័យខ្លាចខ្លាំងណាស់»។
ចំណែកលោក ចាន់ យ៉ាង តំណាងសមាគមអ្នកប្រជាធិបតេយ្យប្រចាំខេត្តព្រៃវែង មានប្រសាសន៍ថា ក្រុមលោកកំពុងរៀបចំរចនាសម្ព័ន្ធសមាគម ដោយទទួលបានប្រជាពលរដ្ឋអ្នកគាំទ្រចំនួនជិត ៥ម៉ឺននាក់ហើយនៅទូទាំងខេត្តព្រៃវែង ៖ «ឥឡូវរៀបបានប្រមាណ ៩០% ហើយ។ សមាជិកសកម្មមានគ្រប់ ១៣ស្រុក»។
មឿង ទុម ៖ តើក្នុងស្រុកមួយៗមានចំនួនប៉ុន្មាននាក់? ម៉ម សូណង់ដូ ៖ មួយស្រុកមានគ្នា ៥នាក់។ មឿង ទុម ៖ តើស្រុកអ្វីខ្លះ សូមលោករៀបរាប់ផងបានទេ? ម៉ម សូណង់ដូ ៖ ស្រុកពារាំង ស្រុកកំពង់លាវ ស្រុកមេសាង ស្រុកកំពង់ត្របែក ស្រុកពាមរ ស្រុកពាមជ ស្រុកព្រះស្ដេច។
លោក ម៉ម សូណង់ដូ មានប្រសាសន៍ដោយសង្ឃឹមថា នៅបន្ទាប់ពីសមាគមដំណើរការ សប្បុរសជនទាំងក្នុង និងក្រៅប្រទេស រួមទាំងម្ចាស់ជំនួយអន្តរជាតិផង អាចនឹងជួយនូវថវិកា និងសម្ភារៈដល់សមាគមអ្នកប្រជាធិបតេយ្យឲ្យជួយដល់ប្រជាពលរដ្ឋខ្មែរក្រីក្រ ដែលពុំមានឯកសារស្របច្បាប់អាចចូលរួមក្នុងការបោះឆ្នោតបាន។ លោកចាត់ថា កិច្ចការនេះជាផ្នែកមួយដ៏សំខាន់ក្នុងការចូលរួមគាំទ្រដំណើរការលទ្ធិប្រជាធិបតេយ្យនៅកម្ពុជា៕