អាជ្ញាធរក្រុងសៀមរាបចុះរុះរើលំនៅពលរដ្ឋតាមដងស្ទឹង
2010.08.30
មន្ត្រីក្រុងសៀមរាបបានដឹកនាំកម្លាំងប៉ូលិស និងកងរាជអាវុធហត្ថជាច្រើននាក់ កាលពីព្រឹកថ្ងៃច័ន្ទ ទី៣០ ខែសីហា ដើម្បីចុះអនុវត្តការរុះរើលំនៅប្រជាពលរដ្ឋចំនួន ៣ខ្នង នៅភូមិវត្តដំណាក់ សង្កាត់សាលាកម្រើក ជាសញ្ញាដាស់តឿនឲ្យប្រជាពលរដ្ឋចំនួន ១៦គ្រួសារដែលនៅតែក្រាញននៀលមិនព្រមទទួលយកគោលនយោបាយរដ្ឋ និងរុះរើលំនៅចាកចេញពីតាមដងស្ទឹងនៅឡើយ ឲ្យប្រញាប់សម្រេចចិត្តចាកចេញដោយខ្លួនឯង ដើម្បីឲ្យអាជ្ញាធរយកតំបន់នោះធ្វើជាសួនច្បារលម្អសោភ័ណភាពទីក្រុង។
លោក អឿន ពៅ អភិបាលរងក្រុងសៀមរាប ដែលដឹកនាំកម្លាំងចុះរុះរើលំនៅប្រជាពលរដ្ឋកាលពីព្រឹកថ្ងៃច័ន្ទ បានមានប្រសាសន៍ថា អាជ្ញាធរក្រុងបានជូនដំណឹងជាច្រើនលើកច្រើនសាមកហើយ ឲ្យប្រជាពលរដ្ឋជាង ៣០គ្រួសារដែលរស់នៅតាមដងស្ទឹងនៃភូមិវត្តដំណាក់ រុះរើលំនៅចាកចេញ ទៅរស់នៅតំបន់ភូមិអភិវឌ្ឍន៍ក្នុងឃុំរុនតាឯក ស្រុកបន្ទាយស្រី ដោយអាជ្ញាធរបានដោះស្រាយគោលនយោបាយដី ១ហិកតារសម្រាប់ ១គ្រួសារ ក្ដារចំនួន ៩ម៉ែត្រគូប ស័ង្កសីប្រក់ផ្ទះ និងលុយ ១លាន ១២ម៉ឺនរៀលផង។
លោក អឿន ពៅ បានមានប្រសាសន៍ថា ចាប់តាំងពីអាជ្ញាធរជូនដំណឹងមក មានប្រជាពលរដ្ឋចំនួន ១៦គ្រួសារបានយល់ព្រមចាកចេញ និង ១៦គ្រួសារទៀត នៅមិនទាន់យល់ព្រមចាកចេញនៅឡើយ។
លោក អឿន ពៅ បានបញ្ជាក់ថា ៖ «កន្លែងគាត់នេះ វាប៉ះពាល់ប្រញាប់នៅក្នុងការធ្វើផ្លូវតាមមាត់ស្ទឹង និងសួនច្បារ។ ត្រូវរើទាំងអស់ ៣២គ្រួសារដែលត្រូវចាកចេញ។ ឥឡូវជាក់ស្ដែងអ្នកមិនទាន់ទទួលយកគោលនយោបាយនៅកំពុងតវ៉ា ១៦គ្រួសារ អ៊ីចឹងថ្ងៃនេះយើងចុះរុះរើបឋម ១ផ្ទះនេះ ដោយសារប៉ះចំទ្រូងផ្លូវ ហើយយើងទុកឲ្យគាត់ពិចារណាក្នុង ១អាទិត្យនេះទៀតដើម្បីទទួលយកគោលនយោបាយ»។
ទោះយ៉ាងណាក្រុមប្រជាពលរដ្ឋខ្លះដែលនៅតែក្រាញននៀល មិនទាន់រុះរើលំនៅចាកចេញនៅឡើយ បានបង្ហាញការជំទាស់ចំពោះគោលនយោបាយរបស់អាជ្ញាធរ ដោយថា គេមិនអាចទៅរស់នៅតំបន់អភិវឌ្ឍន៍រុនតាឯកដ៏ឆ្ងាយបានទេ និងមិនអាចទទួលយកលុយជាង ១លានរៀលនោះផង ពីព្រោះវាមិនគ្រប់គ្រាន់សម្រាប់ការដឹកជញ្ជូនអីវ៉ាន់ និងសាងសង់ផ្ទះថ្មីសម្រាប់រស់នៅបានទេ។
ស្ត្រីមេម៉ាយឈ្មោះ មឿន ឡៃស៊ីម ដែលផ្ទះរបស់គាត់ត្រូវបានអាជ្ញាធររុះរើបំផ្លាញកាលពីព្រឹកថ្ងៃច័ន្ទ បានមានប្រសាសន៍ថា គាត់មិនចង់បានគោលនយោបាយរបស់អាជ្ញាធរ ដែលតម្រូវឲ្យទៅរស់នៅភូមិរុនតាឯក និងឲ្យលុយជាង ១លានរៀលនោះទេ គឺគាត់ទាមទារឲ្យអាជ្ញាធរចេញលុយ ៦.០០០ដុល្លារ សម្រាប់ការយល់ព្រមចាកចេញពីលំនៅតាមមាត់ស្ទឹងនោះ។
អ្នកស្រី មឿន ឡៃស៊ីម បានអះអាងថា ៖ «ថាឲ្យខ្ញុំហ្នឹងទៅយកដីនៅរុនតាឯក ហៅទៅប្រជុំ ១ដង ២ដង ខ្ញុំសំណូមពរខ្ញុំថា ខ្ញុំសុំជាលុយតែ ៦.០០០(ដុល្លារ) បានខ្ញុំទិញដីធ្វើផ្ទះឲ្យកូនខ្ញុំនៅវិញ មួយជួរជិតបងជិតប្អូន ព្រោះខ្ញុំទៅនៅឯណោះម៉េចកើត បើគ្មានកម្លាំងកូនប្រុសផង! រួចក្បាលមួយនៅតែឯង ហើយកូនតូចៗសុទ្ធតែកូនស្រី!»។
លោក សួស ណារិន អ្នកស៊ើបអង្កេតរបស់សមាគមការពារសិទ្ធិមនុស្ស អាដហុក (ADHOC) ប្រចាំខេត្តសៀមរាប បានមានប្រសាសន៍ថា កាលពីខែមិថុនាកន្លងទៅ ប្រជាពលរដ្ឋរស់នៅតាមដងស្ទឹង ក្នុងភូមិវត្តដំណាក់នោះជាង ២០គ្រួសារ ធ្លាប់បានទៅសុំឲ្យអង្គការរបស់លោក ជួយទាមទារសំណងជាប្រាក់ ១ម៉ឺនដុល្លារអាមេរិកក្នុង ១គ្រួសារ ពីព្រោះពួកគេមិនអាចទទួលយកគោលនយោបាយរបស់រដ្ឋដ៏តិចតួចបានទេ ហើយសង្គមស៊ីវិលក៏មិនចង់ឃើញមានការបណ្ដេញចេញដោយបង្ខំណាមួយដែរ។
មន្ត្រីក្រុងសៀមរាបបានឲ្យដឹងថា ក្រៅពីការឲ្យរុះរើលំនៅតាមដងស្ទឹងក្នុងភូមិវត្តដំណាក់ គេនឹងបន្តរុះរើលំនៅលើដងស្ទឹងចំនួនជាង ២៧០ខ្នងផ្ទះទៀត ចាប់ពីមុខសណ្ឋាគារ អាម៉ាន់សារ៉ា រហូតដល់អភិរក្សអង្គរនៃសង្កាត់ស្លក្រាមឲ្យអស់ប្រហែលជានៅអំឡុងខែវិច្ឆិកា៕