ខ្មែរក្រោមរំលឹកថ្ងៃបាត់បង់ទឹកដីនៅបរទេស
2011.05.08
ផែនទីកម្ពុជាក្រោម
សហព័ន្ធខ្មែរកម្ពុជាក្រោមនឹងរៀបចំពិធីបុណ្យរំលឹកខួបនេះ នៅសហរដ្ឋអាមេរិក កាណាដា និងនៅតាមប្រទេសដទៃជាច្រើនទៀត។ លោក ថាច់ ង៉ុក ថាច់ ប្រធានសហព័ន្ធខ្មែរកម្ពុជាក្រោម មានប្រសាសន៍ថា តំបន់ខ្លះផ្ដើមរៀបចំរំលឹកខួបនេះ តាំងពីចុងខែឧសភានេះទៅ ៖ «នៅអាមេរិក ធ្វើធំនៅញ៉ូជឺស៊ី និងនៅតាមរដ្ឋជាច្រើនទៀត និងធ្វើនៅកាណាដា ប្រទេសអូស្ត្រាលី»។
លោក ថាច់ ង៉ុក ថាច់ បញ្ជាក់ថា ខ្មែរនៅរដ្ឋមីនីសូតា សហរដ្ឋអាមេរិក នឹងផ្ដើមធ្វើពិធីបុណ្យរំលឹកខួបបាត់បង់ដែនដីកម្ពុជាក្រោមមុនគេ គឺធ្វើនៅថ្ងៃសៅរ៍ ទី២៨ ខែឧសភាខាងមុខនេះ។ នៅទ្វីបអឺរ៉ុបវិញ សហព័ន្ធខ្មែរកម្ពុជាក្រោមក៏គ្រោងនឹងរៀបចំនៅប្រទេសស្វីស នៅថ្ងៃសៅរ៍ ទី៤ ខែមិថុនា ខែក្រោយនេះនៅឯទីក្រុងស្ស៊ឺរ៉ិច។ លោក ថាច់ វៀន ប្រធានសហព័ន្ធខ្មែរកម្ពុជាក្រោមប្រចាំទ្វីបអ៊ឺរ៉ុប មានប្រសាសន៍ថា ពិធីបុណ្យនឹងប្រារព្ធឡើងប្រហាក់ប្រហែលគ្នានៅតាមប្រទេសដទៃដែរ ដោយធ្វើតាមបែបបទព្រះពុទ្ធសាសនា ៖ «មានព្រះសង្ឃចូលរួមទាំងអស់ ៧អង្គ ក្នុងនោះមានលោក ទឹម សាខន ដែរ។ ធ្វើបុណ្យតាមបែបព្រះពុទ្ធសាសនា និងមានការតាំង និងចែកចាយនូវឯកសារថ្មីៗ ដែលទាក់ទងនឹងទុក្ខវេទនារបស់ខ្មែរក្រោម នៅឯដែនដីកម្ពុជាក្រោម»។
លោក ថាច់ វៀន មានប្រសាសន៍ថា ឆ្នាំនេះអាចនឹងមានអ្នកចូលរួមយ៉ាងតិច ២រយនាក់ ច្រើនដូចឆ្នាំមុនៗ ពីព្រោះមានអ្នកចូលរួមមកពីប្រទេសអាល្លឺម៉ង់ អូទ្រីស ប៊ែលស្ស៊ិច អ៊ីតាលី និងពីប្រទេសបារាំងជាដើម។ សហព័ន្ធក៏គ្រោងនឹងរៀបចំធ្វើបុណ្យនៅឯវត្តពោធិវ័ង្ស នៅជាយក្រុងប៉ារីស ប្រទេសបារាំង នៅថ្ងៃទី១១ ខែមិថុនា ឆ្នាំ២០១១ ខាងមុខនេះ។ លោក ថាច់ ង៉ុកថាច់ បញ្ជាក់ថា សហព័ន្ធរៀបចំកម្មវិធីបុណ្យលើកនេះមានគោលបំណងសំខាន់ៗ រួមមាន ៖ «ទី១ បង្ហាញថា ថៃហ្នឹងវៀតណាមនៅតែចង់បានដីខ្មែរ និងទី២ ស្នើឲ្យខ្មែរទាំងអស់ រួមគ្នាយកទិវានេះជាទិវាជាតិ»។
កាលពីថ្ងៃទី៤ ខែមិថុនា ឆ្នាំ១៩៤៩ អាណានិគមបារាំងបានប្រគល់ដែនដីកម្ពុជាក្រោម និងប្រជាពលរដ្ឋខ្មែរក្រោមរាប់លាននាក់ ទៅឲ្យអធិរាជវៀតណាម ព្រះចៅ បាវ ដាយ គ្របគ្រងផ្នែករដ្ឋបាលតាំងពីពេលនោះមក៕
អត្ថបទពេញនិយម
RFA
- ពលរដ្ឋ និងសង្គមស៊ីវិលរិះគន់ថា ការផ្ដល់សញ្ជាតិបរទេសមួយចំនួន ដែលប៉ះពាល់កេរ្តិ៍ឈ្មោះជាតិ
- អ្នកជំនាញថា ការលើកឡើងរបស់លោក ហ៊ុន ម៉ាណែត មិនឆ្លុះការពិតរឿងពាណិជ្ជកម្មជាមួយចិន
- ស្ថានភាពសិទ្ធិមនុស្ស «កាន់តែអាក្រក់» ក្រោមការដឹកនាំរបស់លោក ហ៊ុន ម៉ាណែត
- អគ្គនាយកដ្ឋានពន្ធដារព្រមានប្តឹងក្រុមហ៊ុនជិត៤០ទៅតុលាការ ក្រោយពេលបោះឆ្នោត
- កុមារភាគច្រើននៅកំពង់ធំបោះបង់ការសិក្សាដោយសារតែពុំមានសាលារៀនត្រឹមត្រូវ គ្រូមិនមកបង្រៀនទៀងទាត់