អាជ្ញាធរខណ្ឌដូនពេញចាប់ខ្លួនតំណាងអ្នកតវ៉ាជនពិការ៥នាក់
2010.07.13
អនុប្រធានសមាគម និងគណៈកម្មការសមាគមអភិវឌ្ឍន៍ជនពិការចំនួន ៥នាក់ ត្រូវបានអាជ្ញាធរខណ្ឌដូនពេញ ចាប់ខ្លួនតាមផ្លូវនៅថ្ងៃទី១៣ ខែកក្កដានេះ ក្រោយពេលក្រុមអតីតយុទ្ធជន និងយោធិនពិការជិត ២០០នាក់ បានវិលត្រឡប់ទៅស្រុកស្នួល ខែត្រក្រចេះវិញ បន្ទាប់ពីបាននាំគ្នាមកធ្វើការតវ៉ានៅមុខភូមិគ្រឹះលោកនាយករដ្ឋមន្រ្តី ហ៊ុន សែន នារាជធានីភ្នំពេញ អស់រយៈពេល ២ថ្ងៃកន្លងមក។
ប្រធានសមាគមអភិវឌ្ឍន៍ជនពិការ លោក យ៉ាន យឹត បានមានប្រសាសន៍ថា អ្នកទាំង ៥រូបនោះ ត្រូវបានអាជ្ញាធរខណ្ឌដូនពេញ ចាប់ខ្លួន ដោយសារពួកគាត់ និងអតីតយុទ្ធជនមួយចំនួនផ្សេងទៀត មិនព្រមផ្ដិតមេដៃឲ្យលោក លឹម លាងសែ នាយខុទ្ទកាល័យលោកនាយករដ្ឋមន្ត្រី ហ៊ុន សែន ៖ «អត់ព្រមផ្ដិតមេដៃទៅជាមួយគេហ្នឹង ដោយសារភូតភរបីបួនលើកហើយ»។
លោក យ៉ាន យឹត បានឲ្យដឹងថា អ្នកដែលអាជ្ញាធរចាប់ខ្លួនមានឈ្មោះ ផាន់ សុផល, ឆាន់ សារុំ អ្នកទាំងពីរជាអនុប្រធានសមាគម និងឈ្មោះ នុត រ៉ាឌី, ឈឿន ឈុន និងឈ្មោះ ជៀប ពេញ ជាគណៈកម្មការសមាគម។
លោក ឈឿន ឈុន បានឲ្យដឹងថា ក្នុងចំណោមពួកលោកទាំង ៥នាក់ គឺ ៤នាក់ត្រូវបានគេចាប់ខ្លួននៅម្ដុំវត្តភ្នំ ហើយលោកនិងឈ្មោះ នុត រ៉ាឌី គេបញ្ជូនទៅអធិការដ្ឋានខណ្ឌដូនពេញ រីឯពីរនាក់ទៀតឈ្មោះ ផាន់ សុផល និង ជៀប ពេញ គេបញ្ជូនទៅប៉េអឹមក្រុង និងឈ្មោះ ឆាន់ សារុំ ត្រូវសមត្ថកិច្ចក្រុងចាប់។
ស្នងការរាជធានីភ្នំពេញ លោក ទូច ណារ៉ុថ បានមានប្រសាសន៍ថា អ្នកទាំងនោះត្រូវបានសមត្ថកិច្ចដោះលែងវិញហើយ បន្ទាប់ពីធ្វើការសាកសួររួចនៅល្ងាចថ្ងៃទី១៣ ខែកក្កដានេះ។ លោកបញ្ជាក់ថា ការចាប់ខ្លួននោះដោយសារតែប្រជាពលរដ្ឋ និងអតីតយុទ្ធជនស្ទើរតែទាំងអស់ បានវិលត្រឡប់ទៅស្រុកស្នួលវិញ ប៉ុន្តែពួកគាត់ប៉ុន្មាននាក់នោះ មិនព្រមទៅ គឺធ្វើឲ្យខូចសណ្ដាប់ធ្នាប់ក្រុង។ រីឯឈ្មោះ ឆាន់ សារុំ សមត្ថកិច្ចបានចាប់ដោយសារបើកបររថយន្តមានស្លាកលេខOI ក្លែងក្លាយ ចំពោះករណីនេះ សមត្ថកិច្ចចរាចរណ៍នឹងដោះស្រាយតាមច្បាប់ចរាចរណ៍។
មន្ត្រីស៊ើបអង្កេតនៃសមាគមសិទ្ធិមនុស្សអាដហុក លោក អ៊ូច ឡេង បានមាប្រសាសន៍ថា ការចាប់ខ្លួនតំណាងអតីតយុទ្ធជនទាំង ៥នាក់នេះ ជាការរើសអើង និងគាបសង្កត់មិនឲ្យពួកគាត់ឡើងមកទាមទារដីចម្ការពីលោកនាយករដ្ឋមន្ត្រី ដែលលោកចាត់ទុកទង្វើនេះជាអំពើរំលោភសិទ្ធិមនុស្ស។
លោក អ៊ូច ឡេង មានប្រសាសន៍ដូច្នេះ ៖ «នេះជាការរើសអើងមួយរវាងប្រជាពលរដ្ឋជាជនពិការក្រីក្រអត់មានដីធ្លី ជាមួយអាជ្ញាធរ ដែលហាមគាត់មិនឲ្យជួបថ្នាក់ដឹកនាំរដ្ឋាភិបាល»។
នាយរងខុទ្ទកាល័យលោកនាយករដ្ឋមន្ត្រី ហ៊ុន សែន លោក លឹម លាងសែ បានមានប្រសាសន៍ទៅកាន់អតីតយុទ្ធជន និងយោធិនពិការនៅមុខវត្តបទុមវតី មុនពេលអ្នកទាំងនោះ វិលទៅស្រុកស្នួលវិញថា នៅថ្ងៃទី១៥ ខែកក្កដានេះ លោកនឹងចាត់ឲ្យគណៈកម្មការរបស់លោកចុះទៅពិនិត្យដីជាក់ស្តែងនៅស្រុកស្នួលនោះ ដើម្បីរកដីសង្គមកិច្ចផ្ដល់ជួន ហើយលោកនឹងធ្វើជំរឿនពិតប្រាកដថា តើអ្នកដែលខ្វះខាតដីនោះមានចំនួនប៉ុន្មាននាក់?
លោក លឹម លាងសែ មានប្រសាសន៍ថា ៖ «ខ្ញុំយកសំណូមពរបងប្អូនយកមកពិចារណាហើយ បងប្អូនត្រូវយកសំណូមពរខ្ញុំវិញ គឺវិលទៅវិញ។ នៅថ្ងៃព្រហស្បតិ៍ (១៥ កក្កដា) ម៉ោង ៨ព្រឹក ជួបគ្នានៅសាលាស្រុកស្នួល ទាំងអស់គ្នាជាសាក្សីទាំងអស់គ្នា។ បើអ្នកណាខកខានមិនបានទៅចូលរួមនៅថ្ងៃនោះ ចាត់ទុកថា បោះបង់ការតវ៉ានេះហើយ»។
កាលពីខែមិថុនា កន្លងទៅ នៅក្នុងឱកាសបិទមហាសន្និបាតវិសាមញ្ញតំណាងទូទាំងប្រទេសរបស់សមាគមអតីតយុទ្ធជនកម្ពុជា លោកនាយករដ្ឋមន្ត្រី ហ៊ុន សែន បានប្រកាសឲ្យស្ថាប័នពាក់ព័ន្ធទាំងអស់រកដីសង្គមកិច្ចចែកជូនអតីតយុទ្ធជន និងយោធិនពិការផងដែរ។
លោក ហ៊ុន សែន បានថ្លែងយ៉ាងដូច្នេះ ៖ «តាមខេត្តនីមួយៗត្រូវមានគោលដៅ ទុកដីនៅកន្លែងណាមួយសម្រាប់អតីតយុទ្ធជន និងយុទ្ធជនពិការរបស់យើង មិនអាចយកបងប្អូនទៅដាក់លើកំពូលភ្នំក្នុងស្ថានភាពជាអ្នកដែលមិនអាចបង្កបង្កើនផលបានទេ»។
អតីតយុទ្ធជន និងអតីតយោធិនពិការ បានឲ្យដឹងទៀតថា ពួកគាត់មានជីវភាពលំបាក ដោយសារគ្មានដីធ្វើចម្ការ ហើយពួកគាត់បានឡើងមកភ្នំពេញ ដើម្បីសុំដីធ្វើចម្ការពីរដ្ឋាភិបាលចំនួនបីលើកមកហើយ ប៉ុន្តែត្រូវបានរារាំងដោយក្រុមសមត្ថកិច្ច៕