កម្មករឈររាំងផ្លូវមិនឲ្យថៅកែដឹកម៉ាស៊ីនចេញពីរោងចក្រដេរកាបូបនៅខេត្តកំពង់ស្ពឺ
2013.01.08
អាជ្ញាធរមានសមត្ថកិច្ច បានចុះធ្វើអន្តរាគមន៍ និងឃ្លាំមើលមិនឲ្យផ្ទុះអំពើហិង្សាឡើយ នៅថ្ងៃទីអង្គារ ទី៨ មករា។ ទាក់ទងបញ្ហានេះ មន្ត្រីសហជីពសេរីកម្មករ អំពាវនាវឲ្យភាគីរោងចក្រឆាប់ដោះស្រាយជាបន្ទាន់។
កម្មកររោងចក្រហ្វេបប្រីក អាត (Febric Art) ស្ថិតនៅភូមិភ្នៅ ឃុំត្រពាំងគង ស្រុកសំរោងទង ខេត្តកំពង់ស្ពឺ បាននាំគ្នាឈររាំងផ្លូវមិនឲ្យថៅកែដឹកម៉ាស៊ីនចេញពីរោងចក្រ ហើយទាមទារឲ្យទូទាត់ប្រាក់បៀវត្សឲ្យពួកគេទៅតាមច្បាប់ការងារ។
កម្មករម្នាក់ក្នុងចំណោមអ្នកតវ៉ាជាង ៧០០នាក់ លោក អ៊ុក សារ៉ាត់ បានថ្លែងនៅថ្ងៃទី៨ មករា ថា ថៅកែបានព្យាយាមលួចដឹកសម្ភារៈក្នុងរោងចក្រ ជាពិសេសម៉ាស៊ីនដេរកាបូបចេញពីរោងចក្រអស់ជាច្រើនគ្រឿង តាំងពីថ្ងៃអាទិត្យ ទី៦ និងថ្ងៃច័ន្ទ ទី៧ មករា ដែលជាថ្ងៃឈប់សម្រាក ទើបកម្មករផ្អើលនាំគ្នាមកយាមចាប់តាំងពីល្ងាចថ្ងៃទី៧ មក។ បុរសដដែលបញ្ជាក់ថា កម្មករទាំងអស់ សុំឲ្យថៅកែបើកប្រាក់ចំនួន ៦ចំណុចឲ្យពួកគេ គឺប្រាក់ខែចុងក្រោយ ខែធ្នូឆ្នាំ២០១២ ប្រាក់បំណាច់ឆ្នាំ ប្រាក់អតីតភាពការងារ ប្រាក់ ៥% នៃប្រាក់ខែ ប្រាក់បណ្ដេញចេញ និងប្រាក់ជំងឺចិត្ត។
ទាក់ទងបញ្ហានេះ រដ្ឋបាលនៃរោងចក្រហ្វេបប្រីក អាត លោក វ៉ាន់ ថាវរិទ្ធ បានឆ្លើយតបថា កម្មករបានបំភ្លៃការពិតថារោងចក្រដឹកសម្ភារៈចេញពីរោងចក្រ គេចវេះមិនបើកប្រាក់ខែឲ្យកម្មករ។ លោកថា កម្មករចំនួន ៦២៥នាក់ ក្នុងចំណោមកម្មករ ៩៨០នាក់ ត្រូវបញ្ចប់កិច្ចសន្យាការងារ ហើយកម្មករបានជូនដំណឹងថាឲ្យមកបើកប្រាក់ឈ្នួលនៅរសៀលថ្ងៃទី៩ មករា។
ពាក់ព័ន្ធបញ្ហានេះ អគ្គលេខាធិការរងនៃសហជីពសេរីកម្មករនៃព្រះរាជាណាចក្រកម្ពុជា លោក ថន ថុល បានថ្លែងថា រហូតមកដល់ពេលនេះ ពុំទាន់មានការបញ្ជាក់ជាលាយលក្ខណ៍អក្សរអំពីការទូទាត់ប្រាក់ឈ្នួលឲ្យកម្មករជាការទូទាត់រោងចក្រត្រូវបិទ ឬយ៉ាងណានោះទេ។ លោកបន្តថា សហជីពបានព្យាយាមសុំជួបចរចាជាមួយភាគីរោងចក្រដែរ តែមិនបានសម្រេច។
កម្មករកម្មការិនីបានឲ្យដឹងថា រហូតមកដល់ម៉ោងប្រមាណ ៥ល្ងាចថ្ងៃដដែល ភាគីរោងចក្របានបើកប្រាក់ឈ្នួលឲ្យកម្មករ ប៉ុន្តែពួកគេមិនទទួលយកនោះទេ ដោយសារពុំដូចការទាមទាររបស់កម្មករ។ ពួកគេបានបន្តឃ្លាំមើលនៅខាងមុខរោងចក្រ មិនឲ្យថៅកែដឹកសម្ភារៈចេញពីរោងចក្រឡើយ ហើយរង់ចាំចរចានៅថ្ងៃទី៩ មករា ទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។