នាយក​រដ្ឋមន្ត្រី​ចំអក​បក្ស​ប្រឆាំង​ដែល​ស្នើ​ឲ្យ​ដក​តំណែង​លោក ចម ប្រសិទ្ធ

លោក​នាយក​រដ្ឋមន្ត្រី ហ៊ុន សែន ចំអក​ទៅ​ក្រុម​មន្ត្រី​បក្ស សម រង្ស៊ី ដែល​ស្នើសុំ​ឲ្យ​ដក​តំណែង​លោក ចម ប្រសិទ្ធ រដ្ឋមន្ត្រី​ក្រសួង​ពាណិជ្ជកម្ម ថា​នោះ​គ្រាន់​តែ​ជា​ទំនោរ​នៃ​បរិបទ​នយោបាយ និង​ជា​ទម្លាប់​របស់​បក្ស​ប្រឆាំង​ប៉ុណ្ណោះ។
ដោយ ម៉ម មុនីរតន៍
2013-01-16
អ៊ីម៉ែល
មតិ
Share
បោះពុម្ព
១០-ធ្នូ-២០១២៖ លោក​នាយករដ្ឋមន្ត្រី ហ៊ុន សែន ថ្លែង​ក្នុង​ពិធី​បើក​ការដ្ឋាន​សាងសង់​ផ្សារ​ទំនើប​របស់​ជប៉ុន នៅ​ក្បែរ​មជ្ឈមណ្ឌល​កម្សាន្ត​កោះ​ពេជ្រ រាជធានី​ភ្នំពេញ។
១០-ធ្នូ-២០១២៖ លោក​នាយករដ្ឋមន្ត្រី ហ៊ុន សែន ថ្លែង​ក្នុង​ពិធី​បើក​ការដ្ឋាន​សាងសង់​ផ្សារ​ទំនើប​របស់​ជប៉ុន នៅ​ក្បែរ​មជ្ឈមណ្ឌល​កម្សាន្ត​កោះ​ពេជ្រ រាជធានី​ភ្នំពេញ។
RFA

ក៏ប៉ុន្តែ មន្ត្រី​បក្ស សម រង្ស៊ី អះអាង​ថា អ្វី​ដែល​បក្ស​ជំទាស់​ស្នើសុំ​ឲ្យ​លោក ហ៊ុន សែន ពិចារណា​ដក​លោក ចម ប្រសិទ្ធ នេះ ព្រោះ​លោក ចម ប្រសិទ្ធ ពុំ​មាន​សមត្ថភាព​រក​ទីផ្សារ​ឲ្យ​កសិករ​ខ្មែរ​មែន។

លោក ហ៊ុន សែន ហៅ​ការ​ស្នើ​របស់​មន្ត្រី​បក្ស​ប្រឆាំង​នៅ​ចុង​សប្ដាហ៍​មុន ឲ្យ​លោក​ពិចារណា​ដក​លោក ចម ប្រសិទ្ធ ចេញ​ពី​ការ​ទទួល​ខុស​ត្រូវ ដែល​បក្ស​ជំទាស់​រក​ឃើញ​ថា​អសមត្ថភាព​ក្នុង​ការ​កៀងគរ​រក​ទីផ្សារ​ឲ្យ​ពលរដ្ឋ​កម្ពុជា ថា​ធ្វើ​ឡើង​ក្នុង​ន័យ​ប្រជាប្រិយភាព​បក្ស​ខ្លួន​ប៉ុណ្ណោះ។

ប្រមុខ​រដ្ឋាភិបាល​ចាត់​ទុក​ការ​ស្នើ​របស់​ក្រុម​មន្ត្រី​បក្ស សម រង្ស៊ី នៅ​ពេល​នេះ​ថា​ជា​ការ​កេង​ចំណេញ​ផ្នែក​នយោបាយ។ លោក ហ៊ុន សែន ចំអក​ឡកឡឺយ​ចំពោះ​ឲ្យ​ដក​លោក ចម ប្រសិទ្ធ នេះ​ថា​ជា​ការ​ទាម​ទារ​ហាក់​ដើរ​បញ្ច្រាស​ទិស​ទៅ​នឹង​តម្លៃ​ទីផ្សារ​ដែល​កំពុង​ឡើង​ចុះ។ លោក​គិត​ថា អ្វី​ដែល​កម្ពុជា ពុំ​អាច​ស្វែង​រក​ទីផ្សារ​សម្រាប់​នាំ​ទំនិញ​ចេញ​បាន​សម្រាប់​កសិករ​នោះ ក៏​ព្រោះ​តែ​ចរន្ត​តម្លៃ​ទំនិញ​នៅ​លើ​ទីផ្សារ​ក្នុង​តំបន់ និង​ពិភពលោក​មាន​ការ​ប្រែប្រួល ដែល​ពុំ​មែន​ជា​កំហុស​របស់​មន្ត្រី​ទទួល​បន្ទុក​នោះ​ទេ។

លោក ហ៊ុន សែន៖ «បើ​សិន​ជា​ប្រជាពលរដ្ឋ​មិន​យល់​ទេ ប្រជាពលរដ្ឋ​អាច​ថា​ទេ អា​គាត់​នេះ​និយាយ​ត្រូវ ប៉ុន្តែ​កុំ​ភ្លេច​អា​គាត់​ដដែល​ហ្នឹង មុខ​ដដែល​ហ្នឹង ចូល​ក្នុង​ផ្សារ វា​ទៅ​ឃោសនា​ជាមួយ​អ្នក​ផ្សារ​ដែល​អត់​ផលិត អ្នក​ទីក្រុង អ្នក​ទីប្រជុំ​ជន​ដែល​អត់​ផលិត​ស្រូវ​នោះ។ វា​ថា អង្ករ​ថ្លៃ​ណាស់​ដាច់​ពោះ​ងាប់​អស់​ហើយ ដល់​ទៅ​ពេល​ទៅ​ដល់​កន្លែង​ធ្វើ​ស្រែ វា​ថា​ស្រូវ​ថោក​ណាស់ មិន​រួច​ថ្លៃ​ពលកម្ម មិន​រួច​ថ្លៃ​ជី មិន​រួច​ថ្លៃ​ស្អី​ទេ​បងប្អូន​អើយ មើល​រដ្ឋាភិបាល​អសមត្ថភាព»

ក្នុង​ការ​ចែក​ប័ណ្ណ​កម្មសិទ្ធិ​ដីធ្លី​ជូន​ពលរដ្ឋ​ជាង ១​ពាន់​គ្រួសារ ក្នុង​ខេត្ត​មណ្ឌលគិរី នៅ​ថ្ងៃ​ទី១៦ មករា ការ​អត្ថាធិប្បាយ​របស់​លោក ហ៊ុន សែន ដែល​ពុំ​បាន​ឆ្លើយ​តប​ចំពោះ​សំណើ​របស់​មន្ត្រី​គណបក្ស សម រង្ស៊ី ក្នុង​ការ​ដក​លោក ចម ប្រសិទ្ធ ចេញ​ពី​មុខ​តំណែង​នេះ ធ្វើ​ឡើង​ក្នុង​រយៈពេល​១​សប្ដាហ៍​ប៉ុណ្ណោះ ក្រោយ​ពី​មន្ត្រី​បក្ស​ជំទាស់​រក​ឃើញ​ថា រដ្ឋមន្ត្រី​ក្រសួង​ពាណិជ្ជកម្ម លោក ចម ប្រសិទ្ធ ពុំ​មាន​សមត្ថភាព​រក​ទីផ្សារ​លក់​កសិផល​ឲ្យ​ពលរដ្ឋ​ខ្មែរ​បាន។

លោក ជា ប៉ូច អ្នក​តំណាង​រាស្ត្រ​មណ្ឌល​ព្រៃវែង នៃ​គណបក្ស សម រង្ស៊ី និង​ជា​ប្រធាន​ចលនា​ប្រជាធិបតេយ្យ​សង្គ្រោះ​ជាតិ ប្រចាំ​ខេត្ត​កំពត ចាត់​ទុក​ការ​ថ្លែង​របស់​លោក ហ៊ុន សែន នៅ​ពេល​នេះ​ថា គឺ​ជា​ផ្នែក​មួយ​ដែល​ពុំ​បាន​ឆ្លុះ​បញ្ចាំង​ពី​កង្វះ​ទីផ្សារ​ដ៏​ពិត​ប្រាក​សម្រាប់​កសិផល​របស់​ខ្មែរ​នោះ​ទេ។ លោក ជា ប៉ូច បន្ត​ថា ទោះ​ជា​បែប​ណា ជំហរ​គណបក្ស​ប្រឆាំង​នៅ​តែ​បន្ត​ជំរុញ​ឲ្យ​លោក​នាយក​រដ្ឋមន្ត្រី​ដក​លោក ចម ប្រសិទ្ធ ចេញ​ពី​មុខ​តំណែង។

លោក ជា ប៉ូច៖ «ខ្ញុំ​នៅ​ទទូច​សុំ​ឲ្យ​នាយក​រដ្ឋមន្ត្រី​ក្នុង​ការ​ពិចារណា​ដក​លោក ចម ប្រសិទ្ធ ដោយ​សារ​លោក ចម ប្រសិទ្ធ លោក​អត់​មាន​សមត្ថភាព​រក​ទីផ្សារ​ឲ្យ​ប្រជាពលរដ្ឋ​បាន។ ដូច្នេះ បើ​លោក​នាយក​រដ្ឋមន្ត្រី​យល់​ឃើញ​ថា​លោក ចម ប្រសិទ្ធ ល្អ លោក​នាយក​រដ្ឋមន្ត្រី​ទុក​ត​ទៅ​ទៀត​ទៅ។ ខ្ញុំ​គ្រាន់​តែ​ឲ្យ​លោក​នាយក​រដ្ឋមន្ត្រី​ពិចារណា​ក្នុង​ការ​ដក​លោក ចម ប្រសិទ្ធ ចេញ​ពី​តំណែង ពីព្រោះ​លោក ចម ប្រសិទ្ធ អត់​មាន​សមត្ថភាព​ក្នុង​ការ​ដឹកនាំ​ឲ្យ​ប្រជាពលរដ្ឋ​នៅ​ក្នុង​ប្រទេស​កម្ពុជា បាន​ទេ»

លោក កែម ឡី អ្នក​វិភាគ​សង្គម គិត​ថា ការ​ខ្វះ​ទីផ្សារ​នាំ​ចេញ​កសិផល ពុំ​មែន​ជា​កំហុស​កើត​ចេញ​ពី​ចរន្ត​សេដ្ឋកិច្ច​ក្នុង​តំបន់ ឬ​ពិភពលោក​នោះ​ទេ។ លោក​បន្ត​ថា ក៏ប៉ុន្តែ​អ្វី​ដែល​ធ្វើ​ឲ្យ​ទីផ្សារ​កម្ពុជា តូច​ចង្អៀត គឺ​ជា​ការ​ទទួល​ខុស​ត្រូវ​របស់​រដ្ឋាភិបាល ដែល​ពុំ​បាន​ធានា​ដល់​ការ​ផលិត​ក្នុង​ស្រុក តែ​ផ្ដល់​ការ​វិនិយោគ​ខ្ពស់​ពី​ប្រទេស​ជិត​ខាង។

លោក កែម ឡី៖ «មិន​មែន​ជា​កំហុស​ដោយ​ចរន្ត​ទេ ប៉ុន្តែ​គេ​មាន​ច្បាប់។ នៅ​ថៃ ទោះ​បី​ជា​យើង​មិន​ទាន់​ចូល​អាស៊ាន​ក៏ដោយ ផលិត​ផល​ណា​ដែល​ប្រជាជន​ថៃ ធ្វើ​បាន គឺ​រឹតត្បិត​ក្នុង​ការ​នាំ​ចូល​តែ​ម្ដង។ អ៊ីចឹង ផលិត​ផល​ក្នុង​ស្រុក​មាន​ទីផ្សារ​ប្រើប្រាស់​ក្នុង​ស្រុក​បាន​មែន​ទេ ហើយ​បើ​យើងៗ​ហូរ​មក​ដូច​ទឹក ដោយ​សារ​យើង​មាន​អំពើ​ពុក​រលួយ​ផង ដោយ​សារ​តែ​យើង​មិន​មាន​ច្បាប់​តឹងរ៉ឹង​ផង អ៊ីចឹង​វា​ហូរ​មក​ពី​វៀតណាម។ ដល់​ពេល​ហូរ​មក​ពី​វៀតណាម ខ្មែរ​យើង​លក់​អត់​បាន ហើយ​ខាត។ អ៊ីចឹង គាត់​សម្រេច​ចិត្ត​លក់​ស្រែ​ដើម្បី​ធ្វើ​ចំណាក​ស្រុក»

យ៉ាង​ណា​ក៏ដោយ លោក ហ៊ុន សែន ព្រមាន​ថា បើ​បក្ស​ជំទាស់​គ្រប់គ្រង​ប្រទេស​នោះ កម្ពុជា អាច​នឹង​មាន​សង្គ្រាម​ជាមួយ​ប្រទេស​នាំ​ចេញ​មួយ​ចំនួន ដោយ​រួម​ទាំង​ប្រទេស​វៀតណាម ជាដើម។ លោក ហ៊ុន សែន ចាត់​ទុក​ថា ព្រោះ​ប្រទេស​ទាំង​នេះ គឺ​ជា​សត្រូវ​របស់​បក្ស​ប្រឆាំង។ ក៏ប៉ុន្តែ មន្ត្រី​បក្ស​ប្រឆាំង​អះអាង​ថា ខ្លួន​នឹង​មិន​យក​ប្រទេស​ណា​ជា​សត្រូវ​នោះ​ទេ តែ​បញ្ជាក់​ថា ខ្លួន​អាច​ធានា​បង្កើត​ឲ្យ​មាន​ទីផ្សារ​សម្រាប់​ពលរដ្ឋ​កម្ពុជា បាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (32)
Share

ណារុំ

ពី ភ្នំពេញ

បោះឆ្នោតប៉ុន្មានរយដងទៀតក៍មិនឈ្នះ ហ៊ុន សែន ដែរ ព្រោះលោក ហ៊ុន សែន មានយួនរាប់លាននាក់ចូលមកជួយបោះឆ្នោតឲ្យ។ វិនាសឆាប់ហើយស្រុកខ្មែរ បើសិនជាមានជនក្បត់ជាតិធ្វើជានាយករដ្ឋមន្រ្តីបំរើនយោបាយឲ្យយួនឈ្លានពានទឹកដី។

Jan 17, 2013 04:45 PM

HURRICANE

ពី ATLANTA

Quetion to hun sen pm of Cambodia.You said Caambodia having rice nearly 4millians tons leftover, verry rich of fish in Mekong river and Tonlaysap lake,but now fish shipping from vietnam include rice and more?????.So all peaple,in USA market I never see fish orrice made in Cambodia, all made in Vietnam or Thailand.

Jan 17, 2013 01:08 PM

អ្នក​អាន​អនាមិក

80% Khmer are farmers,if CPP find markets for farmers,that means CPP helps Khmer people instead Vietnamese.Hun Sen doesn't really depend on Khmer people,but he depends on Vitenamese to vote for him and he depends on his plan "B" just like he did in July 1997 .

Jan 17, 2013 10:20 AM

KSK

ពី Phnom Penh

លោក ហ៊ុន សែន នូវតែមិនទទួលស្គាល់ពីកំសោយរបស់ខ្លួនក្នុងការដឹកនាំរបស់គណបក្ស​ប្រជាជនកម្ពុជា។​ ហេតុអ្វីបានជាប្រជាពលរដ្ឋនៅតែមិនផ្លាស់ប្តូរមនសិការ។

Jan 17, 2013 10:03 AM

Khmer

ការរិះគន់ ដើម្បីស្ថាបនា លោកហ៊ុន សែន មិនគូរគិតថាជាការកេងចំនិញនយោបាយគ្រប់ពេលដូចនេះទេ។ តាមពិតលោកគួរចេះទទួលយកអ្វីដែលជាការពិត។ ការកុហកបោកប្រាស់ រឺការពិតយើងអាចស្វែងយល់តាមរយៈលទ្ធផលការងារបានតើ។

Jan 17, 2013 08:04 AM

មើល​មតិ​ទាំង​អស់.

គេហទំព័រ​ទាំងមូល