កសិករខេត្តប៉ៃលិនអំពាវនាវឲ្យរដ្ឋាភិបាលជួយរកទីផ្សារសម្រាប់ដំឡូងមី
2012.12.22
កសិករកាប់បំបែកដំឡូងមី នៅស្រុកសំពៅលូន ខេត្តបាត់ដំបង កាលពីថ្ងៃទី២១ ខែធ្នូ ឆ្នាំ២០១១។
ផលដំឡូងមី ដែលប្រជាពលរដ្ឋភាគច្រើននាំគ្នាដាំដុះនៅក្នុងខេត្តប៉ៃលិន នៅឆ្នាំនេះ កំពុងជួបនឹងវិបត្តិអត់ទីផ្សារ ឬលក់បានតម្លៃទាប។ បញ្ហានេះបានធ្វើឲ្យកសិករជាច្រើនព្រួយបារម្ភចំពោះការខាតបង់ដើមទុន និងមានការជំពាក់បំណុលធនាគារច្រើន។
សមាជិកក្រុមប្រឹក្សាខេត្តប៉ៃលិន មកពីគណបក្ស សម រង្ស៊ី លោកស្រី វ៉ែន ដារ៉ា បានថ្លែងនៅថ្ងៃទី២២ ខែធ្នូ ថា ប្រជាពលរដ្ឋជាង៩០% នៅខេត្តប៉ៃលិន បាននាំគ្នាខ្ចីលុយពីធនាគារយកទៅប្រើប្រាស់ធ្វើជាដើមទុនសម្រាប់បង្កបង្កើនផលកាលពីដើមរដូវ។ នៅពេលរដូវប្រមូលផលចូលមកដល់ តម្លៃដំឡូងមីចុះថោក៖ «ដំឡូងវាថោក អ៊ីចឹងចង់អោយរាជរដ្ឋាភិបាលជួយរកទីផ្សារជូនប្រជាពលរដ្ឋ ព្រោះប្រទេសថៃ ឥឡូវនេះអោយដឹកចូលតែទម្ងន់ក្នុងមួយឡាន ៥តោនទេ ដូចថា សៃឡូមួយអ៊ីចឹង ដឹកបានមួយឡាន ៥តោនទេ ទោះឡានប៉ុន្មានក៏អោយយកប៉ុណ្ណឹងដែរ។ កាលមុនដឹកពេញឡានយីឌុប ឥឡូវធ្វើដំឡូងហ្នឹងចុះថោក»។
ដំឡូងមីស្រស់ក្នុង១គីឡូក្រាមមានតម្លៃ ១បាត ស្មើមួយរយប្រាក់រៀល។ តម្លៃនេះចុះថោកជាងបណ្ដាឆ្នាំកន្លងទៅ ដូច្នេះបានធ្វើឲ្យពួកគាត់ប្រឈមទៅការខាតបង់ដើមទុន ជំពាក់បំណុលធនាគារច្រើន។ បច្ចុប្បន្ន ទីផ្សារដំឡូងមីរបស់កសិករនៅខេត្តប៉ៃលិន ត្រូវបានឈ្មួញកណ្ដាលដើរទិញពីប្រជាពលរដ្ឋ បន្ទាប់មកដឹកឆ្លងកាត់ច្រកអន្តរជាតិព្រំ យកទៅលក់ក្នុងប្រទេសថៃ៖ «ដកលើគេ កម្មករលើកគេហើយគេដឹកដល់សៃឡូបាន៤ បានកន្លះទេ ហើយអ្នកម្ចាស់ចម្ការបានតែ ១បាតទេ ការទូទាត់ទៅវាអត់ចំណេញអត់។ ប្រជាពលរដ្ឋធ្វើការយូរៗទៅលក់ដីសងគេ ហើយអ៊ីចឹងសុំឲ្យរាជរដ្ឋាភិបាលហ្នឹងគិតគូរបញ្ហាហ្នឹង ព្រោះប្រជាពលរដ្ឋនៅខេត្តប៉ៃលិន ៩៥% គឺប្លង់ដីនៅធនាគារ»។
មេឃុំស្ទឹងត្រង់ លោក វល្លិ៍ រួម បានថ្លែងថា ប្រជាពលរដ្ឋនៅខេត្តប៉ៃលិន មានចំនួនតិចតូចបំផុតដែលមានដើមទុនលុយផ្ទាល់ខ្លួន ប្រើប្រាស់សម្រាប់ការដាំដុះដំឡូងមី កាលពីដើមរដូវ ក្រៅពីនេះ កសិករភាគច្រើនលើសលប់បានខ្ចីបុលចងការប្រាក់ធនាគារយកទៅធ្វើដើមទុន។ ពួកគាត់កំពុងព្រួយបារម្ភ ដោយសារតម្លៃដំឡូងមីនៅឆ្នាំនេះកំពុងបន្តចុះថោក៖ «ឈ្មួញកណ្ដាលទិញបន្តពីកសិករទៅ យកទៅឆ្លងប្រទេសដែរហ្នឹង ទី១។ ទី២ ភាគច្រើនគាត់បានដាក់លុយឲ្យកសិករ ដល់ពេលប្រមូលផលក៏លក់អោយគាត់អ៊ីចឹងទៅ ការលក់ក៏តាមតម្លៃហាងឆេងដែរ បើឈ្មួញខ្លះអាងតែពូជគាត់ អាងតែលុយគាត់ គាត់បំពានកសិករ»។
លានហាលសម្ងួតដំឡូងមីនៅខេត្តប៉ៃលិន ទាំងតូចទាំងធំមានចំនួនជាង ៥០កន្លែង។ កន្លែងទាំងនោះគ្រប់គ្រងដោយឈ្មួញកណ្ដាល។ ពួកគេបាននាំគ្នាដើរទិញដំឡូងពីកសិករ រួចបន្តដឹកទៅលក់នៅប្រទេសថៃ។
លោក អ៊ី ឈាន អភិបាលខេត្តប៉ៃលិន បានថ្លែងថា តម្លៃដំឡូងមីនៅក្នុងខេត្តប៉ៃលិន ពិតជាមានតម្លៃទាបដូចការត្អូញត្អែររបស់ប្រជាពលរដ្ឋ។ បញ្ហានេះ អាជ្ញាធរខេត្តកំពុងគិតគូររកទីផ្សារ ដោយបានធ្វើការទំនាក់ទំនងជាមួយបណ្ដាក្រុមហ៊ុនថៃ ក្រុមហ៊ុនចិន និងក្រុមហ៊ុនរបស់ប្រទេសកូរ៉េ មួយចំនួនទៀត៖ «អ៊ីចឹងបានជាខ្ញុំរាល់ថ្ងៃកំពុងទំនាក់ទំនងជាមួយខាងចិន ក្តី ខាងកូរ៉េ ក្តី ដើម្បីឲ្យមកធ្វើឡសម្ងួតនៅក្នុងមូលដ្ឋានយើងនេះ អោយបាន។ ឥឡូវយើងបានគួរសមហើយ ប៉ុន្តែខ្លះវាដំណើរការបានល្អ ប៉ុន្តែខ្លះមិនទាន់ដំណើរការបានល្អ ប៉ុន្តែខ្ញុំយល់ថា មួយឆ្នាំពីរឆ្នាំទៀត ទីផ្សាររបស់បងប្អូនប្រជាពលរដ្ឋពិតជាល្អ»។
បច្ចុប្បន្ន ម្ចាស់ដំឡូងមីមួយចំនួនបានផ្អាកការប្រមូលផលមួយរយៈសិន រង់ចាំមើលតម្លៃដំឡូងមីរើបឡើងវិញ។ ប្រជាពលរដ្ឋនៅខេត្តប៉ៃលិន ជាង ៩០% បាននាំគ្នាសម្រុកដាំដំឡូងមី ក្រៅពីនោះមានពោត សណ្ដែក និងដំណាំហូបផ្លែបូកផ្សំមួយចំនួនផ្សេងទៀត។ ការធ្វើចម្ការរបស់កសិករភាគច្រើននៅខេត្តប៉ៃលិន គឺពួកគាត់បានខ្ចីប្រាក់ពីធនាគារយកទៅធ្វើដើមទុនកាលពីដើមរដូវបង្កបង្កើនផល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ