អ្នកកាសែតម្នាក់នៅខេត្តព្រះវិហារបារម្ភខ្លាចតុលាការចោទប្រកាន់និងដាក់ទោស
2012.12.22
ការពិចារណារបស់តុលាការនេះ បានធ្វើឡើងបន្ទាប់ពីសមាគមជនពិការក្រៅរដ្ឋាភិបាល បានដាក់ពាក្យបណ្ដឹងទៅតុលាការ។ ពាក្យបណ្ដឹងនោះ បានចោទប្រកាន់ ទៅលើភ្នាក់ងារកាសែត ថាមានការផ្សាយព័ត៌មានមិនពិត និងបទបរិហារកេរ្តិ៍តាមសារព័ត៌មានជាដើម។
ភ្នាក់ងារសារព័ត៌មានក្នុងស្រុកម្នាក់ ប្រចាំនៅខេត្តព្រះវិហារ បានសម្ដែងការព្រួយបារម្ភខ្លាចក្រែងតុលាការធ្វើការចោទប្រកាន់ និងដាក់ទោសរូបគាត់ ដោយសារតែការសរសេរសេចក្តីរាយការណ៍ដែលបានចេញផ្សាយនៅលើទំព័រកាសែត កាលពីពេលថ្មីៗ។ ការព្រួយបារម្ភនេះ បន្ទាប់ពីតុលាការបានចេញដីកាកោះហៅរូបគាត់ឱ្យចូលខ្លួនទៅឆ្លើយបំភ្លឺកាលពី ៣ថ្ងៃមុន។
លោក មាស សាមឿន គឺភ្នាក់ងាររបស់កាសែតជាតិ ប្រចាំនៅក្នុងស្រុកគូលែន ខេត្តព្រះវិហារ លោកបានមានប្រសាសន៍កាលពីរសៀលថ្ងៃសៅរ៍ ទី២២ ខែធ្នូ ថា តុលាការបានកោះហៅរូបលោកទៅសាកសួរ កាលពីថ្ងៃទី១៩ ខែធ្នូ កន្លងទៅ។ បុរសដដែលបានមានប្រសាសន៍ថា ការកោះហៅនោះ បន្ទាប់ពីកាសែតរបស់លោកបានចុះផ្សាយរិះគន់ប្រធានសមាគមជនពិការក្រៅរដ្ឋាភិបាលមួយ ដែលមានទីតាំងនៅភូមិស្នាផ្អែក ឃុំស្រយង់ ស្រុកគូលែន ថាបានឆបោកយកលុយពីប្រជាពលរដ្ឋមួយចំនួន ដោយសន្យាថានឹងចែកដីធ្លី ក៏ប៉ុន្តែផ្ទុយទៅវិញបែរជាមិនមានដីចែក ធ្វើឱ្យប្រជាពលរដ្ឋខ្លះនាំគ្នាយំស្រែក។ ដោយសារតែកាសែតបានចេញផ្សាយដូច្នេះ ប្រធានសមាគមជនពិការក្រៅរដ្ឋាភិបាលនោះ ក៏បានធ្វើពាក្យប្ដឹងរូបលោកទៅតុលាការ។
លោក មាស សាមឿន៖ «តុង ថា កាសែតជាតិដែរ គាត់ចុះផ្សាយតាមឯកសារប្រជាពលរដ្ឋដែលប្ដឹង។ តាហ្នឹងស្មានតែខ្ញុំ គាត់ទៅប្ដឹងតុលាការថាខ្ញុំ។ គេថាខ្ញុំចុះកាសែតហ្នឹងមិនពិត ប៉ះពាល់គេ។ ខ្ញុំព្រួយបារម្ភដែរ ខ្លាចតុលាការឃុបឃិតគ្នាអី យកទោសយកពៃខ្ញុំ។ ប៉ុន្តែខ្ញុំសំអាងទៅលើឯកសារប្រជាពលរដ្ឋដែលផ្ដិតមេដៃប្រធានសមាគមជនពិការក្រៅរដ្ឋាភិបាលនោះមែន»។
ទោះយ៉ាងណា វិទ្យុអាស៊ីសេរី មិនអាចស្វែងរកលេខទូរស័ព្ទដើម្បីទាក់ទងលោក ចាន់ គឹមសាន ហៅ តារំដួល ដែលជាប្រធានសមាគមជនពិការក្រៅរដ្ឋាភិបាល ដើម្បីធ្វើការពន្យល់បញ្ហានោះបាននៅឡើយទេ។
ចំណែកលោក ស្រេង វុទ្ធា ព្រះរាជអាជ្ញារង និងជាតំណាងអយ្យការនៃសំណុំរឿងក្តីនោះ បានមានប្រសាសន៍ថា នៅក្នុងពាក្យបណ្ដឹងរបស់ប្រធានសមាគមជនពិការក្រៅរដ្ឋាភិបាលនោះ គឺបានចោទប្រកាន់ទៅលើភ្នាក់ងារសារព័ត៌មានក្នុងស្រុកជាច្រើន ដូចជាបទផ្សាយព័ត៌មានមិនពិត បទញុះញង់ឱ្យមានការរើសអើងក្នុងក្រុម និងបទបរិហារកេរ្តិ៍តាមសារព័ត៌មានជាដើម។
លោកព្រះរាជអាជ្ញារង បានបញ្ជាក់ថា នៅក្នុងបណ្ដឹងដែលបានចោទប្រកាន់ជាច្រើនករណី តុលាការអាចនឹងធ្វើការចោទប្រកាន់ទៅលើអ្នកកាសែតម្នាក់នោះជុំវិញករណីខ្លះ ដើម្បីឱ្យចៅក្រមស៊ើបសួរធ្វើការស៊ើបអង្កេតបន្ត៖ «បើសារព័ត៌មានគាត់មានឯកសារសំអាងត្រឹមត្រូវទាំងអស់ ប៉ុន្តែចង់ចោទពីបទញុះញង់វិញ វានេះជាង»។
លោក ម៉ាណូរិន ជាចាងហ្វាងកាសែតជាតិ បានមានប្រសាសន៍ថា លោកមិនមានការព្រួយបារម្ភចំពោះតុលាការដែលកោះហៅភ្នាក់ងាររបស់លោកទៅសាកសួរនោះទេ ពីព្រោះតែលោកមានឯកសារសំអាងគ្រប់គ្រាន់ ហើយលោកក៏កំពុងរៀបចំពាក្យបណ្ដឹង ដើម្បីប្ដឹងប្រធានសមាគមជនពិការក្រៅរដ្ឋាភិបាលនោះវិញដែរ ពីបទរំលោភទៅលើលក្ខន្តិកៈរបស់សមាគមក្រៅរដ្ឋាភិបាល។
ទោះយ៉ាងណា មន្ត្រីតុលាការខេត្តព្រះវិហារ បានឱ្យដឹងថា ភ្នាក់ងារសារព័ត៌មានក្នុងស្រុកម្នាក់នោះ មិនមែនមានតែពាក្យបណ្ដឹងមួយដាក់ចូលទៅតុលាការប៉ុណ្ណោះទេ គឺមានពាក្យបណ្ដឹងទាំងអស់ចំនួន៣ ដែលតុលាការកំពុងមាននៅក្នុងដៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។