ចាប់ខ្លួនព្រះរាជអាជ្ញាមួយរូបនៅពោធិ៍សាត់
2010.11.29
មេបញ្ជាការកងរាជអាវុធហត្ថលើផ្ទៃប្រទេស ប្រចាំខេត្តពោធិ៍សាត់ លោកឧត្ដមសេនីយ៍ អន សុខុន បានមានប្រសាសន៍ប្រាប់វិទ្យុអាស៊ីសេរីនៅរសៀលថ្ងៃទី២៩ វិច្ឆិកាថា ពិតជាមានការចាប់ខ្លួនព្រះរាជអាជ្ញាអមសាលាដំបូងខេត្តពោធិ៍សាត់មែន ប៉ុន្តែលោកពុំបានដឹងពីមូលហេតុដែលនាំទៅដល់ការចាប់ខ្លួនមន្ត្រីជាន់ខ្ពស់នៃស្ថាប័នអយ្យការខេត្តរូបនេះទេ។ លោកមានប្រសាសន៍ថា នេះគឺជាប្រតិបត្តិការរបស់ស្ថាប័នជំនាញ មិនមែនស្ថាប័នកងរាជអាវុធហត្ថនោះទេ ៖ «ខ្ញុំអត់បានដឹងទេពីមូលហេតុ ព្រោះសមត្ថកិច្ចដែលគេមកចាប់ គឺជាសមត្ថកិច្ចផ្សេង ដែលថ្នាក់លើគេបានអនុវត្តដល់អ៊ីចឹង ខ្ញុំអត់បានដឹងអីច្បាស់នោះទេ»។
ប្រភពពីមន្ត្រីតុលាការដែលសុំមិនបញ្ចេញឈ្មោះ បានឲ្យដឹងថា អង្គភាពចម្រុះដែលរួមមានអង្គភាពប្រឆាំងអំពើពុករលួយ អធិការកិច្ចនៃក្រសួងយុត្តិធម៌ និងអគ្គព្រះរាជអាជ្ញា បានអនុវត្តការចាប់ខ្លួននេះ។ ប្រភពបានឲ្យដឹងផងដែរថា អង្គរក្ស២រូប និងភរិយាលោកព្រះរាជអាជ្ញា ក៏ត្រូវបានចាប់ខ្លួនក្នុងពេលជាមួយគ្នានេះដែរ។ វិទ្យុអាស៊ីសេរីមិនអាចទាក់ទងសុំការពន្យល់ពីប្រធានអង្គភាពប្រឆាំងអំពើពុករលួយនៃរាជរដ្ឋាភិបាល គឺលោក ឱម យិនទៀង បានទេ នៅល្ងាចថ្ងៃទី២៩ វិច្ឆិកា ដោយលោកមានប្រសាសន៍ថា លោកកំពុងជាប់រវល់។
ចំណែកអ្នកនាំពាក្យនៃក្រុមប្រឹក្សាជាតិប្រឆាំងអំពើពុករលួយ គឺលោក កែវ រ៉េមី មានប្រសាសន៍ថាលោកពុំទាន់ទទួលបានព័ត៌មានគ្រប់ជ្រុងជ្រោយនៅឡើយទេ ក្នុងបញ្ហាការចាប់ខ្លួននេះ។ ហេតុនេះលោកពុំទាន់អាចធ្វើអត្ថាធិប្បាយបានទេ។ យ៉ាងណាក៏ដោយ ព័ត៌មានស្ដីពីការចាប់ខ្លួនព្រះរាជអាជ្ញាអមសាលាដំបូងខេត្តពោធិ៍សាត់ លោក តុប ច័ន្ទសិរីវុធ បានបណ្ដាលឲ្យមានការភ្ញាក់ផ្អើលយ៉ាងខ្លាំងពីមជ្ឈដ្ឋាននានាក្នុងទូទាំងខេត្តពោធិ៍សាត់។
ប្រភពដែលសុំមិនបញ្ចេញឈ្មោះបានឲ្យដឹងថា បើការចាប់ខ្លួននេះ គឺមានគោលដៅបង្ក្រាបអំពើពុករលួយមួយក្នុងប្រព័ន្ធយុត្តិធម៌ក្នុងខេត្តនេះពិតមែននោះ គឺជាការល្អហើយ។
មន្ត្រីនៃអង្គការក្រៅរដ្ឋាភិបាលមួយចំនួនក្នុងខេត្តពោធិ៍សាត់ ក៏បានគាំទ្រចំពោះចំណាត់ការនៃអង្គភាពប្រឆាំងអំពើពុករលួយនេះដែរ ប្រសិនបើធ្វើឡើងតាមនីតិវិធីត្រឹមត្រូវ និងជាយុទ្ធនាការប្រឆាំងអំពើពុករលួយពិតមែននោះ។ មន្ត្រីអង្កេតអង្គការការពារសិទ្ធិមនុស្សលីកាដូ លោក ស៊ឺន សែនករុណា មានប្រសាសន៍ថា នេះជាសញ្ញាល្អមួយ។ លោកថា ការបង្ក្រាបបែបនេះអាចជួយកាត់បន្ថយអំពើពុករលួយខ្លះៗ ដែលកំពុងរីករាលដាលស្ទើរគ្រប់ស្ថាប័នក្នុងប្រទេសកម្ពុជានាពេលបច្ចុប្បន្ន៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ