គម្រោងធារាសាស្ត្រ ADB នៅបាត់ដំបង មានបញ្ហា
2010.05.27
មន្ត្រីក្រសួងធនធានទឹក និងអ្នកបច្ចេកទេសបរទេស រួមទាំងកសិករជាច្រើននាក់ផង នៅព្រឹកថ្ងៃព្រហស្បតិ៍ ទី២៧ ខែឧសភានេះ បានចុះទៅពិនិត្យផលប៉ះពាល់នានា ដែលនាំទៅរកការជន់លិចលំនៅឋានអ្នកភូមិ និងធ្វើឲ្យដីស្រែស្កកទឹក ដោយសារការកសាងប្រឡាយទឹកមួយខ្សែ ប្រវែង ៧គីឡូម៉ែត្រ ជាជំនួយប្រាក់កម្ចីធនាគារអភិវឌ្ឍន៍អាស៊ី នៅក្នុងខេត្តបាត់ដំបង។
មន្ត្រីគម្រោងទទួលខុសត្រូវក្នុងការដឹកនាំការជីកប្រឡាយ លោក ព្រំ វី រដ្ឋា បានមានប្រសាសន៍ថា ៖ «ការណ៍ដែលចុះមក គឺខ្ញុំទទួលស្គាល់ការបិតប្រឡាយចាស់ៗ របស់គេហ្នឹង គឺវាពិតជាមិនត្រឹមត្រូវមែន លក្ខណៈបច្ចេកទេស ក៏ប៉ុន្តែខ្ញុំនឹងព្យាយាមដោះស្រាយតាមលទ្ធភាពថវិកាដែលនៅសល់ បើសិនជាថវិកាយើងមានកម្រិត បើសិនអត់មានកម្រិតទេ យើងធ្វើទាំងអស់វាចប់តែម្ដង»។
លោកបន្តថា លទ្ធផលផ្លូវការជុំវិញបញ្ហាជីកប្រឡាយថ្មី និងបិទប្រឡាយចាស់មួយចំនួននេះ និងធ្វើការសម្រេចនៅសប្ដាហ៍ក្រោយនេះ។
ថ្មីៗនេះ ក្រុមអ្នកភូមិបានព្រួយបារម្ភថា ការកសាងប្រព័ន្ធស្រោចស្រពប្រឡាយស្វាយអា គឺបានធ្វើឡើងបិតមុខទឹកប្រឡាយចាស់ ជាង១០កន្លែង ដែលអាចឲ្យដីស្រែ ២៥០ហិកតារក្រៅប្រព័ន្ធស្កកទឹក។ ក្រៅពីនេះ ក៏មានផ្ទះអ្នកភូមិជាច្រើនខ្នង សាលារៀន និងផ្លូវក្នុងភូមិ ប្រឈមទៅនឹងការលិចលង់នារដូវវស្សា ដោយសារតែមុខប្រឡាយរំដោះទឹកចេញពីភូមិ ត្រូវបានគេបិតដែរ។
មន្ត្រីនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានមានប្រសាសន៍ថា ការកសាងប្រឡាយខាងលើនេះ មានការសិក្សាច្បាស់លាស់ មានអ្នកជំនាញការបរទេស សហការជាមួយអ្នកជំនាញការខ្មែរ។
គាត់បានបន្តថា ៖ «អ៊ីចឹងអ្វីដែលគេបានធ្វើ គឺវាត្រឹមត្រូវ ត្រង់តែគាត់ដែលមិនដឹងរឿងគាត់អង្គុយចាំស្រែក អានេះម្យ៉ាងទៀតនៅពេលអនុវត្តគម្រោង លោកដឹងស្រាប់ហើយ គម្រោងស្ថិតនៅក្នុងកំណាត់កាលដែលកំពុងអនុវត្តគម្រោង អ៊ីចឹងពេលដែលគម្រោងមិនទាន់រួច គឺវាមានបញ្ហានេះ បញ្ហានោះកើតឡើងហើយ»។
ទោះយ៉ាងណា ប្រធានសហគមន៍ប្រើប្រាស់ទឹក ប្រព័ន្ធប្រឡាយស្វាយអា លោក ពាក្យ បឿន បានបញ្ជាក់ថា ក្រុមអ្នកភូមិស្នើសុំកុំឲ្យមានការប៉ះពាល់ ៖ «និយាយរួម ពួកគាត់ចង់បានប្រឡាយបង្ហូរទឹកចេញ ហើយនិងស្រោចស្រពរបស់គាត់ឲ្យបានស្រួលហ្នឹងឯង ហើយអាកន្លែងប៉ះពាល់ធ្ងន់ធ្ងរ សុំឲ្យដឹកដីចាក់ប៉ុណ្ណឹងឯង»។
ប្រព័ន្ធស្រោចស្រពប្រឡាយស្វាយអា ដែលកំពុងស្ថាបនាឡើងនេះ មានប្រវែង ៧គីឡូម៉ែត្រ អាចទាញទឹកស្រោចស្រពដីស្រែក្នុងប្រព័ន្ធបាន ១៦០ហិកតារ ស្ថិតនៅក្នុងស្រុកថ្មគោល និងស្រុកបវេល ខេត្តបាត់ដំបង ចាប់ផ្ដើមធ្វើឡើងកាលពីដើមឆ្នាំ២០១០ ក្រោមជំនួយប្រាក់កម្ចីធនាគារអភិវឌ្ឍន៍អាស៊ីចំនួន ១លាន ៥សែនដុល្លារ។
ធនាគារអភិវឌ្ឍន៍អាស៊ី ហៅកាត់ថា ADB បានផ្ដល់ប្រាក់កម្ចីដែលមានការប្រាក់ទាប (កម្ចីសម្បទា) ដល់រដ្ឋាភិបាលខ្មែរ ប្រហែល ២០លានដុល្លារ សម្រាប់គម្រោងអភិវឌ្ឍន៍ប្រព័ន្ធប្រឡាយស្រោចស្រព ចំនួន ១១គម្រោង នៅក្នុងខេត្តចំនួន៤ គឺ ខេត្តពោធិ៍សាត់ ខេត្តសៀមរាប ខេត្តបន្ទាយមានជ័យ និងខេត្តបាត់ដំបង។
ចំណែកនៅខេត្តបាត់ដំបង មានគម្រោងកសាងប្រឡាយចំនួន២ ដែលមានឈ្មោះថា ដូនឪ និងកាណាល់វន្ត (១) ដែលត្រូវចំណាយទឹកប្រាក់ជិត ៤លានដុល្លារអាមេរិក។ ក្រុមការងារបច្ចេកទេសរបស់គម្រោងកសាងប្រឡាយស្វាយអា បានឲ្យដឹងថា គេនឹងធ្វើសេចក្ដីសម្រេចជុំវិញផលប៉ះពាល់ ដែលក្រុមអ្នកភូមិបានលើកឡើង នៅសប្ដាហ៍ក្រោយនេះ៕