សមត្ថកិច្ចក្រុងភ្នំពេញចុះរុះរើផ្សារសំពៅមាស
2010.10.22
កម្លាំងសមត្ថកិច្ចខណ្ឌ៧មករា ចុះរុះរើផ្សារសំពៅមាស ស្ថិតនៅជាប់របងពហុកីឡាដ្ឋានអូឡាំពិក ភាគខាងកើត នៅថ្ងៃទី២២ ខែតុលា ឆ្នាំ២០១០។
ក្រុមអាជីវករផ្សារសំពៅមាស ស្ថិតនៅទល់មុខសាលាបឋមសិក្សាសំពៅមាស ក្រុងភ្នំពេញ ជាប់នឹងរបងស្តាតអូឡាំពិក បានរិះគន់ធ្ងន់ៗទៅលើអាជ្ញាធរថា បានប្រើអំណាចគាបសង្កត់ប្រជាពលរដ្ឋឲ្យចាកចេញពីផ្សារទាំងបង្ខំ ដោយពុំបានគិតគូរពីសំណងនៃការខាតបង់ដើមទុនរបស់អាជីវករឡើយ។
តំណាងអាជីវករ អ្នកស្រី ហាក់ គឹមហ៊ាង បានសម្ដែងអារម្មណ៍ក្រេវក្រោធចំពោះអាជ្ញាធរ ដែលបានចុះបង្ខំឲ្យអាជីវករចាកចេញយ៉ាងប្រញាប់ប្រញាល់នៅព្រឹកព្រលឹមថ្ងៃសុក្រ ទី២២ ខែតុលា ឆ្នាំ២០១០ ជាថ្ងៃដាក់ឱសានវាទ ឬផុតថ្ងៃកំណត់ ដើម្បីបិទផ្សារ និងមិនឲ្យមានការតវ៉ា ដោយស្រែកសុំឲ្យសហគមន៍អន្តរជាតិជួយពិនិត្យមើលភាពអយុត្តិធម៌របស់អាជ្ញាធរសមត្ថកិច្ចក្រុងភ្នំពេញ មកលើពលរដ្ឋកម្ពុជា។
អ្នកស្រី ហាក់ គឹមហ៊ាង បន្ថែមថា ៖ «អង្គការសហប្រជាជាតិដែលជិតចុះមកនេះ ឲ្យគេដឹងថា ប្រទេសនេះជាប្រទេសផ្ដាច់ការ កុម្មុយនីស្ត សូម្បីតែរបស់ខ្លួនឯងក៏គេមិនឲ្យយកដែរ»។
អាជីវករម្នាក់ទៀត អ្នកស្រី សុខ ធីតា មានប្រសាសន៍ដែរថា អាជ្ញាធរនិយាយមិនពិត បោកប្រាស់ពលរដ្ឋ ឲ្យពលរដ្ឋសាងសង់ផ្សារតាំងពីឆ្នាំ២០០៥ អស់ប្រាក់ម្នាក់ៗរាប់ពាន់រាប់ម៉ឺនដុល្លារ ប៉ុន្តែចុងបញ្ចប់បង្ខំឲ្យពលរដ្ឋដើរចេញតែខ្លួន និងរបស់របរតិចតួច ចំពោះតូបលក់ដូរគេមិនឲ្យរុះយកវិញឡើយ ហើយពាក្យស្នើសុំរបស់ពលរដ្ឋឲ្យសុំពន្យារពេល ២ឆ្នាំទៀត ដើម្បីលក់ស្រង់ដើមមកវិញខ្លះក៏អាជ្ញាធរមិនយកមកពិចារណាដែរ។
អ្នកស្រី សុខ ធីតា បានឲ្យដឹងទៀតថា ៖ «ឈឺចាប់ ព្រោះថ្នាក់ដឹកនាំមិនគួរមានចៅហ្វាយខណ្ឌពុករលួយ គាត់ជាអ្នកបំផ្លាញសន្លឹកឆ្នោតដោយខ្លួនឯង។ កាន់សុទ្ធតែដំបង ខែល បណ្ដេញពួកខ្ញុំ»។
តំណាងអាជីវករ អ្នកស្រី ហាក់ គឹមហ៊ាង បានឲ្យដឹងទៀតថា សមត្ថកិច្ចបានបង្ខំឲ្យរើអីវ៉ាន់ចេញមុនថ្ងៃកំណត់មួយថ្ងៃ តែអាជីវកររើមិនទាន់ ហើយសល់មួយថ្ងៃចុងក្រោយសមត្ថកិច្ចមិនទុកពេលឲ្យដែរ ដោយបង្ខំបិទផ្សារមិនឲ្យចេញចូលទាំងព្រឹកព្រលឹម គឺបណ្ដេញចេញទាំងតក់ក្រហល់ ៖ «មួយថ្ងៃចុងក្រោយនេះ បើទុកឲ្យយកអីវ៉ាន់ចេញតាមសម្រួលក៏បានដែរ តែនេះគេចង់បានរបស់ប្រជាពលរដ្ឋតែម្តង»។
ក្រុមមន្ត្រីអាជ្ញាធរខណ្ឌ៧មករា ដែលចុះដឹកនាំកម្លាំងសមត្ថកិច្ចរុះផ្សារសំពៅមាស មិនធ្វើអត្ថាធិប្បាយអ្វីវែងឆ្ងាយឡើយ ដោយគ្រាន់តែបញ្ជាក់ខ្លីថា នេះជាការអនុវត្តតាមសេចក្ដីប្រកាសរបស់សាលាក្រុង និងសេចក្ដីប្រកាសព័ត៌មានរបស់ក្រសួងអប់រំ។
សេចក្ដីប្រកាសព័ត៌មានរបស់ក្រសួងអប់រំ ចុះថ្ងៃទី២១ ខែតុលា ឆ្នាំ២០១០ បានឲ្យដឹងថា កន្លងមករដ្ឋាភិបាលបានអនុគ្រោះឲ្យអាជីវករចំនួន ៣លើកមកហើយ ទីមួយនៅខែឧសភា ឆ្នាំ២០០៣ ទី២ បានទុករយៈពេល ៦ខែ គឺពីខែកក្កដា ដល់ខែធ្នូ ឆ្នាំ២០០៧ និងលើកទី៣នេះ ទុករយៈពេល ៣ខែ គឺចាប់ពីខែឧសភា ឆ្នាំ២០១០ មក ហើយថែមទាំងបានពន្យារពេល ១៥ថ្ងៃចុងក្រោយមុនថ្ងៃរុះរើនេះទៀត។
ក្រុមអាជីវករនិយាយថា ផ្សារសំពៅមាសទើបនឹងកើតនៅឆ្នាំ២០០៥ទេ ដែលមានជាង ៤០០តូប សាងសង់ឡើងដោយក្រុមអាជីវករ និងមានការអនុញ្ញាតពីសាលាក្រុងភ្នំពេញ ដូច្នេះការដែលក្រសួងអប់រំថា មានការអនុគ្រោះតាំងពីឆ្នាំ២០០៣ មកនោះ ជាការមិនពិត។
កាលពីថ្ងៃទី២១ ខែតុលា ក្រុមអាជីវករផ្សារសំពៅមាស ប្រមាណ ១០០នាក់ តំណាងឲ្យអាជីវករជាង ៤០០តូប ក្នុងសង្កាត់វាលវង់ ខណ្ឌ៧មករា បាននាំគ្នាតវ៉ានៅមុនផ្ទះលោកនាយករដ្ឋមន្ត្រី ហ៊ុន សែន ដើម្បីសុំពន្យារពេលឲ្យពួកគាត់ប្រកបរបរលកដូរលើទីតាំងនោះ ២ឆ្នាំបន្តទៀត ប៉ុន្តែការតវ៉ានេះពុំបានផលឡើយ។
អភិបាលរងខណ្ឌ៧មករា លោក លីម សុភា បានថ្លែងកាលពីថ្ងៃទី២១ ខែតុលាថា រដ្ឋាភិបាលបានយកដីផ្នែកខាងកើតស្តាតអូឡាំពិកទំហំប្រមាណ ១ម៉ឺនម៉ែត្រក្រឡា ប្រគល់ទៅឲ្យក្រសួងអប់រំ យុវជន និងកីឡា ដើម្បីអភិវឌ្ឍន៍លើវិស័យកីឡាជាតិ៕
Slideshow
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ