អ្នកភូមិបឹងកក់តវ៉ានៅមុខផ្ទះលោកហ៊ុនសែនជាលើកទី៤
2010.09.20
អ្នកភូមិបឹងកក់ប្រមាណ ១០០នាក់ រួមទាំងក្មេងតូចៗ បាននាំគ្នាឡើងទៅតវ៉ានៅមុខគេហដ្ឋានលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ រាជធានីភ្នំពេញ នៅព្រឹកថ្ងៃទី២០ កញ្ញា ២០១០
មន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន នៅថ្ងៃទី២០ ខែកញ្ញា បានទទួលពាក្យបណ្ដឹងពីអ្នកភូមិបឹងកក់ជាលើកទី៤ អំពីការស្នើសុំកាត់ទីតាំងដីលំនៅឋានអចិន្ត្រៃយ៍របស់ពួកគាត់ចេញពីគម្រោងអភិវឌ្ឍបឹងកក់ និងសុំឲ្យក្រុមហ៊ុនផ្អាកការបូមខ្សាច់ជាបណ្ដោះអាសន្ន ដែលនាំឲ្យទឹកលិចផ្ទះរបស់ពួកគាត់។
ការទទួលពាក្យបណ្ដឹងនេះ នៅខណៈដែលអ្នកភូមិបឹងកក់ប្រមាណ ១០០នាក់រួមទាំងក្មេងតូចៗ បាននាំគ្នាឡើងទៅតវ៉ានៅមុខគេហដ្ឋានលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ រាជធានីភ្នំពេញ នៅព្រឹកថ្ងៃទី២០ កញ្ញា ៖ «តេហៅគាត់ឲ្យទៅមើល គាត់ថា អត់ហ៊ានទេ ខ្ញុំទៅអង្វរគាត់»។
លោក នៅ រ៉ា ជាសមាជិកក្រុមលេខានៃខុទ្ទកាល័យលោកនាយករដ្ឋមន្ត្រី ហ៊ុន សែន បានមានប្រសាសន៍ថា លោកយកពាក្យបណ្ដឹងទាំងនេះ ដាក់ជួនខុទ្ទកាល័យ ដើម្បីបញ្ជូនទៅឲ្យលោកនាយករដ្ឋមន្ត្រី ហ៊ុន សែន ពិនិត្យមើលបន្ថែមទៀត ប៉ុន្តែការសម្រេចណាមួយ លោកនឹងឲ្យដំណឹងមកឲ្យប្រជាពលរដ្ឋដឹងវិញ នៅថ្ងៃទី២១ ឬថ្ងៃទី២២ កញ្ញា ៖ «ការងារហ្នឹងមិនមែនថា លោកមិនដឹងនោះទេ លោកដឹងអស់ហើយ ទាក់ទងនឹងខុទ្ទកាល័យយើងបញ្ជូនទៅតាមការងារជំនាញ ហើយយ៉ាងម៉េចៗ យើងនឹងឲ្យដឹងវិញពេលក្រោយ»។
ប្រជាពលរដ្ឋនៅភូមិទី១ ភូមិបឹងកក់ ឈ្មោះ ទី ពិសី បាននិយាយថា ពួកគាត់បាននាំគ្នាមកដាក់ពាក្យបណ្ដឹងនៅគេហដ្ឋានលោកនាយករដ្ឋមន្ត្រី ហ៊ុន សែន ជាថ្មីទៀតនេះ ដោយសារតែក្នុងរយៈពេលប៉ុន្មានថ្ងៃកន្លងមកនេះ ក្រុមហ៊ុនបានបូមខ្សាច់បាញ់មកលើផ្ទះរបស់ពួកគាត់ ដែលនៅលើគោក បណ្ដាលឲ្យផ្ទះរបស់ពួកគាត់លិចទឹក ហើយគ្មានការជួយអន្តរាគមន៍ពីអាជ្ញាធរមូលដ្ឋាននោះឡើយ ៖ «ព្រោះវាមានសត្វខាំ មានចៃពស់ចៃអី ពោះវែកវាវារពេញហ្នឹងណាម្សិលមិញ អ៊ីចឹងយើងមានការពិបាក»។
ចៅសង្កាត់រងសង្កាត់ស្រះចក អ្នកស្រី ទិន សោភ័ណ្ឌ បានបដិសេធថា ក្រុមហ៊ុនមិនបានបូមខ្សាច់បាញ់មកលើផ្ទះរបស់ប្រជាពលរដ្ឋទេ ប៉ុន្តែយ៉ាងនេះក្ដី អ្នកស្រីបានអះអាងថា កន្លងមកអ្នកស្រីបានព្យាយាមជួយដល់ប្រជាពលរដ្ឋតាមរយៈការស្នើសុំទៅអភិបាលខណ្ឌ និងអភិបាលរាជធានីភ្នំពេញ ដើម្បីដោះស្រាយបញ្ហានេះ ៖ «មិនមែនថាយើងអាជ្ញាធរឃើញហើយ យើងមើលនឹងភ្នែក មិនមែនទេ គឺយកចិត្តទុកដាក់មើលការខុសត្រូវចំពោះគាត់ គ្រាន់ថា ការលំបាករបស់យើងគាត់មិនដឹង តែការលំបាករបស់គាត់យើងនឹងអាចដឹង...»។
ក្មេងតូចៗជាច្រើនដែលជាកូនអ្នកភូមិបឹងកក់ បានកាន់បដាលោកនាយករដ្ឋមន្ត្រី ហ៊ុន សែន ហើយបានសំណូមពរឲ្យលោកនាយករដ្ឋមន្ត្រី ហ៊ុន សែន ជួយពួកគេ នៅខណៈដែលផ្ទះរបស់ពួកគេត្រូវបានទឹកលិចគ្មានកន្លែងដេក ហើយពិបាកធ្វើដំណើរទៅសាលារៀននោះ ៖ «ខ្ញុំមកចង់ឲ្យសម្ដេច ហ៊ុន សែន ជួយបូមទឹកបូមលូចេញ ព្រោះគេបូមទឹកបូមដីចូលលិចផ្ទះអស់អាលីងហើយ»។
អ្នកភូមិបឹងកក់បានឲ្យដឹងទៀតថា ពួកគាត់បានដាក់បណ្ដឹងទៅទីស្ដីការគណៈរដ្ឋមន្ត្រី ក្រសួងដែនដីនគរោបនីយកម្ម និងសំណង់ សាលារាជធានីភ្នំពេញ និងខុទ្ទកាល័យលោកនាយករដ្ឋមន្ត្រី ហ៊ុន សែន ជាច្រើនដងរួចមកហើយ ប៉ុន្តែពុំទាន់មានដំណោះស្រាយណាមួយនៅឡើយទេ។ ពួកគាត់លើកឡើងថា កាលពីសប្ដាហ៍មុន ក្មេងស្រីអាយុ ១៨ឆ្នាំ នៅភូមិ១ ត្រូវបានខ្សែភ្លើងឆក់ស្លាប់ ដោយសារទឹកលិចផ្ទះរបស់នាង ហើយឆ្លងចរន្តអគ្គិសនី៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ