សាលាមួយចំនួនជួបប្រទះនឹងបញ្ហាកង្វះសៀវភៅមេរៀន
2010.01.20
កាលពីថ្ងៃទី១៨ ខែមករា សមាគមគ្រូបង្រៀនកម្ពុជាឯករាជ្យបានសរសេរលិខិតមួយច្បាប់ផ្ញើជូនលោក អ៊ឹម សិទ្ធី រដ្ឋមន្ត្រីក្រសួងអប់រំ ស្នើជួយដោះស្រាយឲ្យបានឆាប់ដើម្បីកុំឲ្យប៉ះពាល់ដល់កម្មវិធីសិក្សារបស់សិស្សានុសិស្ស។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានសំណូមពរទៅថ្នាក់ដឹកនាំក្រសួងអប់រំត្រូវផ្តល់សៀវភៅមេរៀនគ្រប់មុខវិជ្ជាទាំងអស់ ដើម្បីកុំឲ្យប៉ះពាល់ដល់កម្មវិធីសិក្សារបស់សិស្សនិងគ្រូបង្រៀន ក៏ដូចជាធ្វើឲ្យប៉ះពាល់ដល់គុណភាពអប់រំ។
លោក រ៉ុង ឈុន បានមានប្រសាសន៍ថា ៖ «កង្វះខាតសម្ភារៈសិក្សា ជាពិសេសសៀវភៅនេះជាផ្នែកមួយប៉ះពាល់ទៅដល់ការសិក្សារបស់សិស្ស ក៏ដូចជាការបង្រៀនរបស់គ្រូ បើគ្មានឯកសារឲ្យបានគ្រប់គ្រាន់នោះទេ»។
អ្នកគ្រូ គឹម តារ៉ានី បង្រៀននៅសាលាបឋមសិក្សាពោធិ៍សាត់ មានប្រសាសន៍ថា សាលាបង្រៀនរបស់អ្នកគ្រូក៏មានបញ្ហាខ្វះសៀវភៅមេរៀនសម្រាប់ផ្តល់ជូនដល់គ្រូនិងសិស្សផងដែរ នៅក្នុងកម្មវិធីសិក្សាឆ្នាំ២០០៩-២០១០នេះ។
អ្នកគ្រូបន្តថា ការខ្វះខាតសៀវភៅមេរៀន ដូចជាមុខវិជ្ជាខ្មែរនិងគណិតវិទ្យា អ្នកគ្រូធ្លាប់បានស្នើទៅក្រសួងអប់រំតាមរយៈលោកប្រធានមន្ទីរអប់រំខេត្តពោធិ៍សាត់ផងដែរ នៅដើមវិស្សមកាលឆ្នាំនេះ ប៉ុន្តែមិនមានការឆ្លើយតប។
អ្នកគ្រូ គឹម តារ៉ានី បានបញ្ជាក់ថា ៖ «ខ្វះសៀវភៅភាសាខ្មែរ សៀវភៅគណិតវិទ្យាក៏ខ្វះដែរ។ បញ្ហាខ្វះហ្នឹងវាជាទុក្ខលំបាកសម្រាប់គ្រូនិងសិស្សរួមគ្នាតែម្ដង វាប៉ះពាល់ដល់ការសិក្សារបស់សិស្ស ហើយប៉ះពាល់ដល់ការបង្រៀនរបស់គ្រូ ព្រោះឧទាហរណ៍ ក្នុងថ្នាក់ខ្ញុំមានសិស្ស ៤៥នាក់អ៊ីចឹង ខ្ញុំទទួលបានតែសៀវភៅភាសាខ្មែរហ្នឹង ៣០ក្បាលទេ»។
លោក កែវ ថៃ ជាគ្រូបង្រៀននៅវិទ្យាល័យបរិបូរណ៍ មានប្រសាសន៍ថា កង្វះសៀវភៅមេរៀនសម្រាប់ផ្តល់ជូនគ្រូបង្រៀននិងសិស្ស គឺជាផ្នែកមួយនាំឲ្យប៉ះពាល់ដល់ការសិក្សារបស់សិស្សនិងការបង្រៀនរបស់គ្រូ។
លោក កែវ ថៃ បានឲ្យដឹងថា ៖ «ភាគច្រើនខ្វះអ៊ីចឹងតែម្ដង។ គណិតវិទ្យាគ្រាន់មាន ប៉ុន្តែភាសាខ្មែរខ្វះមែនទែនតែម្ដង។ សៀវភៅសិក្សាសម្រាប់សិស្សានុសិស្ស សម្រាប់កូនសិស្សនៅគ្រប់វិទ្យាល័យ អនុវិទ្យាល័យ ក៏ដូចបឋមសិក្សា មធ្យមសិក្សាមួយចំនួន មានការខ្វះខាតច្រើនតែម្ដង»។
វិទ្យុអាស៊ីសេរីមិនអាចទាក់ទងលោក អ៊ឹម សិទ្ធី រដ្ឋមន្ត្រីក្រសួងអប់រំបានទេតាមទូរស័ព្ទនារសៀលថ្ងៃទី១៩ ខែមករានេះ ជុំវិញការខ្វះខាតសៀវភៅមេរៀនសម្រាប់គ្រូនិងសិស្សនៅតាមសាលាមួយចំនួនក្នុងប្រទេសកម្ពុជា ខណៈលោក ជុំ សុផល អនុប្រធាននាយកដ្ឋាននៃក្រសួងអប់រំបដិសេធមិនធ្វើអត្ថាធិប្បាយ។
សមាគមគ្រូបង្រៀនបានឲ្យដឹងថា កង្វះខាតសៀវភៅមេរៀនជាច្រើនមុខវិជ្ជាតែងបានកើតឡើងជារៀងរាល់ឆ្នាំនៅតាមសាលារៀនភាគច្រើននៅទូទាំងប្រទេស ប៉ុន្តែកង្វះខាតនេះមន្ត្រីក្រសួងអប់រំមិនបានបំពេញតាមតម្រូវការ និងការទទូចស្នើសុំរបស់លោកគ្រូ អ្នកគ្រូ ដែលបានស្នើសុំអន្តរាគមន៍ពីកង្វះខាតសៀវភៅមេរៀននេះឲ្យបានគ្រប់តាមតម្រូវការនោះឡើយ៕