គោក្របីរាប់រយក្បាលឈឺងាប់នៅស្រុកថាឡាបរិវ៉ាត់ ខែត្រស្ទឹងត្រែង
2010.06.26
ចំណែកឯក្រុមមន្ត្រីពេទ្យសត្វខេត្តវិញកំពុងចុះចាត់វិធានការជួយសង្គ្រោះដល់កន្លែងដែលកំពុងផ្ទុះជំងឺទាំងនោះហើយ ដោយសង្ឃឹមថា កិច្ចប្រឹងប្រែងនេះនឹងធ្វើឲ្យមានភាពធូរស្រាលពីជំងឺដែលកំពុងរីករាលដាល។
មន្ត្រីរដ្ឋបាលសាលាស្រុកថាឡាបរិវ៉ាត់ អ្នកស្រី សម្បត្តិ រចនា បានឲ្យដឹងនៅថ្ងៃទី២៥ មិថុនា ថា នៅក្នុងឃុំមួយចំនួនក្នុងស្រុកថាឡាបរិវ៉ាត់ មានផ្ទុះឡើងនូវជំងឺយាយីគោក្របី ក្នុងនោះឃុំខ្លះមានក្របីងាប់រហូតដល់ទៅជាង ៣០០ក្បាល នៅក្នុងខែឧសភា និងខែមិថុនានេះ ហើយឃុំខ្លះកំពុងបន្តកើតមានជំងឺបណ្ដាលឲ្យក្របីងាប់កាន់តែច្រើនក្បាលដែរក្នុងរយៈពេលប៉ុន្មានថ្ងៃនេះ។
អ្នកស្រីបានបន្តថា ខាងសាលាស្រុកមិនទាន់បានបូកសរុបនូវតួលេខបញ្ចប់តាមឃុំនីមួយៗ អំពីចំនួនគោក្របីងាប់នៅឡើយទេ ដោយសារនៅពេលនេះគេកំពុងចាត់វិធានការសង្គ្រោះព្យាបាលទៅលើសត្វដែលកំពុងឈឺទាំងនោះនៅចំពោះមុខ។
អ្នកស្រី សម្បត្តិ រចនា បានមានប្រសាសន៍ថា ៖ «ឃុំព្រះរំកិល តាមខ្ញុំសួរលោកមេឃុំនោះ ក្នុងឃុំគាត់គឺមានក្របីងាប់ចំនួន ៣១៨ក្បាល។ ប្រភេទជំងឺហ្នឹងគឺឈាមចេញតាមមាត់បណ្ដោយ ព្រោះវាខែរាំងហ្នឹងវាពីរខែដែរ។ អ៊ីចឹងរាំងវាក្ដៅពេក វាទៅផឹកទឹកផឹកអីទៅ កើតជំងឺទៅណា៎! ខែ៥ ខែ៦ហ្នឹងរាំងមករហូត»។
នៅឯឃុំក្បាលរមាស ស្រុកសេសាន ក៏មានសេចក្ដីរាយការណ៍ថា ប្រជាពលរដ្ឋកំពុងតែមានបញ្ហាងាប់ក្របីជាច្រើនដូចគ្នាដែរ។
មេឃុំក្បាលរមាស លោក ឡា បឿ បានបញ្ជាក់ប្រាប់វិទ្យុអាស៊ីសេរីនៅថ្ងៃទី២៥ មិថុនាដែរថា នៅភូមិស្រែស្រណុក ក្នុងឃុំក្បាលរមាស មានក្របីជាង ២០ក្បាលហើយបានងាប់ ក្នុងប៉ុន្មានថ្ងៃកន្លងមកនេះ នេះមិនរាប់ចំពោះភូមិខ្លះដែលមានងាប់រាយប៉ាយ ២ក្បាល ៣ក្បាលនោះឡើយ។
លោក ឡា បឿ បានបញ្ជាក់ថា ៖ «ខាងស្រែស្រណុកសត្វឈឺងាប់អស់ច្រើនមែនទែនហ្នឹងហើយ។ រយៈកន្លងមក ថ្ងៃហ្នឹងជួបមេភូមិគេថា អស់ ២០ក្បាលហើយទាំងគោ ទាំងក្របី ក្រៅពីហ្នឹងក្បាលរមាសក៏មានងាប់ដែរ»។
មន្ត្រីស៊ើបអង្កេតអង្គការសិទ្ធិមនុស្ស អាដហុក ខេត្តស្ទឹងត្រែង លោក ហូរ សំអុល បានបញ្ជាក់ថា អង្គការអាដហុកបានកត់សម្គាល់ឃើញប្រជាពលរដ្ឋកំពុងមានកង្វល់អំពីកង្វះខាតមធ្យោបាយអូសទាញបម្រើការងារកសិកម្ម ហើយរយៈកាលកន្លងមកមានការឆ្លើយតបពីអាជ្ញាធរពេទ្យសត្វយឺតយ៉ាវទើបបណ្ដាលឲ្យគោក្របីពួកគាត់មានបញ្ហាឈឺ និងងាប់។
លោក ហូរ សំអុល បានឲ្យដឹងថា ៖ «ការរាលដាលរោគរាតត្បាតទៅលើក្របីហ្នឹង វាកាន់តែរាលដាលទៅកាន់ឃុំផ្សេងៗទៀត ជាពិសេសគឺឃុំ អូរស្វាយដែលនៅជិតព្រះរំកិលហ្នឹងណា៎! ពីម្សិលខ្ញុំជួបខាងមន្ត្រីគាត់ថា សប្ដាហ៍ចុងក្រោយនេះងាប់អស់ជាង ១០០ក្បាលទៀតហើយ នៅឃុំខាងក្រោមព្រះរំកិលហ្នឹង។ វាដូចថា វានៅកៀនៗគ្នាហ្នឹង ជាពិសេសវាបន្តទៅឃុំអូរស្វាយ។ អ៊ីចឹងវាអាចជាជំងឺហ្នឹងវាគំហុកខ្លាំង អ៊ីចឹងខាងពេទ្យសត្វត្រូវតែអនុវត្តឲ្យបានខ្ជាប់ខ្ជួន បើអ៊ីចឹងបណ្ដោយងាប់អស់ហើយ!»។
ក្នុងពេលដែលមានការអះអាងថា គោក្របី ពិសេសនៅស្រុកថាឡាបរិវ៉ាត់ ឈឺងាប់ច្រើនជាងគេនោះ អនុប្រធានការិយាល័យបសុព្យាបាលនៃមន្ទីរកសិកម្មខេត្តស្ទឹងត្រែង លោក ម៉ៃ រតនា បានថ្លែងថា ក្រុមពេទ្យសត្វរបស់លោកកំពុងតែចុះទៅកាន់ឃុំស្រុកនានា ដែលកំពុងកើតមានជំងឺគោក្របីទាំងនោះហើយដើម្បីជួយព្យាបាល។
លោក ម៉ៃ រតនា បានអះអាងថា ៖ «ឥឡូវការិយាល័យហ្នឹងកំពុងតែចាត់វិធានការចុះអន្តរាគមន៍ជាបន្តបន្ទាប់ ចាក់ថ្នាំបង្ការការពារជំងឺសត្វជូនប្រជាពលរដ្ឋហ្នឹង។ យើងចុះរាល់ថ្ងៃ សព្វថ្ងៃ កំពុងតែចុះហើយនេះ ខ្ញុំកំពុងតែនៅអូរស្វាយហើយនេះ។ តំបន់នោះធ្លាប់កើតជំងឺសារទឹកណា៎! រោគសញ្ញាវានោះហើមពោះហើមក ហៀរសំបោរ ហៀរអីអ៊ីចឹងទៅ! ហើយបណ្ដាលឲ្យសត្វងាប់»។
លោកអនុប្រធានការិយាល័យបសុព្យាបាលបានអំពាវនាវសូមឲ្យមានការចូលរួមជាទូទៅពីប្រជាពលរដ្ឋទាំងអស់ ប្រមូលគោក្របីមកឲ្យពេទ្យសត្វចាក់វ៉ាក់សាំង នៅរាល់ពេលដែលពេទ្យសត្វទៅដល់ ព្រោះកន្លងមកប្រជាពលរដ្ឋមិនបានសហការល្អប្រមូលគោក្របីមកឲ្យចាក់ថ្នាំបានត្រឹមត្រូវគ្រប់គ្នាទេ ជាក់ស្ដែងខ្លះចាក់ ១ឆ្នាំបានម្ដង ខ្លះ ២ឆ្នាំបានម្ដងនោះ វាងាយនឹងធ្វើឲ្យគោក្របីពួកគាត់ឈឺងាប់៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ