តុលាការកាត់ទោសខ្មែរក្រហមមិនគិតគូរពីការបំផ្លាញទ្រព្យសម្បត្តិវប្បធម៌ចាម
2010.01.25
ប្រធានមជ្ឈមណ្ឌលឯកសារកម្ពុជាបានថ្លែងឲ្យដឹងនៅថ្ងៃទី២៥ ខែមករាថា អង្គជំនុំជម្រះវិសាមញ្ញក្នុងតុលាការកម្ពុជាបានស៊ើបអង្កេតទៅលើបទឧក្រិដ្ឋកម្មនានា ប៉ុន្តែចំពោះការបំផ្លាញសម្បត្តិវប្បធម៌ និងសាសនារបស់ជនជាតិចាម គឺគេមិនបានលើកមកនិយាយនៅក្នុងតុលាការនេះទេ។
លោក ឆំាង យុ ជាប្រធានមជ្ឈមណ្ឌលឯកសារកម្ពុជាបានមានប្រសាសន៍ថា នៅក្នុងរបបខ្មែរក្រហមជនជាតិចាមនៅកម្ពុជាត្រូវបានខ្មែរក្រហមបំផ្លាញទ្រព្យសម្បត្តិវប្បធម៌របស់ខ្លួនស្ទើរតែទាំងស្រុង។
សាលាក្តីបានកំណត់ទីតាំងសំខាន់ៗមួយចំនួនក្នុងការស៊ើបអង្កេតដែលខ្មែរក្រហមបានសម្លាប់ជនជាតិចាម ប៉ុន្តែគេមិនបានស៊ើបអង្កេតអំពីបញ្ហាខ្មែរក្រហមបានបំផ្លាញទ្រពម្យសម្បត្តិវប្បធម៌នៃជនជាតិចាមទេ។
លោក ឆាំង យុ បន្តថា ៖ «តែអ្វីដែលសំខាន់គឺយើងត្រូវមើលទៅលើអំពើចេតនារបស់របបកម្ពុជាប្រជាធិបតេយ្យនៅក្នុងការបំផ្លេចបំផ្លាញនេះនៅក្នុងន័យថា ដើម្បីបំបាត់ជាតិសាសន៍មួយ ហើយនេះវាមានលក្ខណៈធ្ងន់ធ្ងរណាស់បើសិនជាបញ្ហាទាំងអស់នេះមិនត្រូវបានលើកឡើងនៅក្នុងផ្លូវច្បាប់»។
កាលពីខែធ្នូ ឆ្នាំ២០០៩ កន្លងទៅ អង្គជំនុំជម្រះវិសាមញ្ញក្នុងតុលាការកម្ពុជា បានចោទប្រកាន់បន្ថែមពីបទឧក្រិដ្ឋកម្មប្រល័យពូជសាសន៍ប្រឆាំងជនជាតិចាមនិងវៀតណាមនៅចន្លោះឆ្នាំ១៩៧៥ ដល់ឆ្នាំ១៩៧៩ ទៅលើអតីតមេដឹកនាំខ្មែរក្រហម ៤នាក់រួមមាន នួន ជា អតីតប្រធានសភាតំណាងប្រជាជន, អៀង សារី អតីតឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស, អៀង ធីរិទ្ធ រដ្ឋមន្រ្តីក្រសួងសង្គមកិច្ច និង ខៀវ សំផន ប្រធានគណៈប្រធានរដ្ឋនៅក្នុងរបបកម្ពុជាប្រជាធិបតេយ្យ។
អ្នកស្រាវជ្រាវឯករាជលើជនជាតិចាមបានលើកឡើងដែរថា ជនជាតិចាមបានបាត់បង់សម្បត្តិវប្បធម៌ស្ទើរតែទាំងអស់ដែលជាកត្តាធ្វើឲ្យជនជាតិចាមបច្ចុប្បន្នមិនសូវមានការរីកចម្រើននិងអនុវត្តប្រពៃណីរបស់ខ្លួន។
អ្នកស្រាវជ្រាវរូបនោះបន្ថែមថា ៖ «ខ្មែរក្រហមដែលបំផ្លាញកំណត់ត្រាពង្សាវតាររបស់គាត់នោះ គាត់អត់មានអ្វីដែលថា ជាសំអាងដើម្បីបង្រៀនឲ្យកូនចៅរបស់គាត់យល់ដឹងពីបញ្ហាប្រវត្តិសាស្ត្ររបស់ខ្លួនអំពីបញ្ហាប្រពៃណីរបស់ខ្លួន»។
លោក រាជ សម្បតិ្ត ប្រធានផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា បានឲ្យដឹងថា បច្ចុប្បន្នចៅក្រមស៊ើបអង្កេតកំពុងធ្វើការនៅក្នុងខែត្រកំពង់ចាមក្នុងស្រុកពីរ គឺស្រុកកងមាស និងស្រុកក្រូចឆ្មារ ដែលជាទីតាំងខ្មែរបានសម្លាប់ជនជាតិចាមច្រើនជាងគេ ហើយបញ្ហានេះជារឿងសម្ងាត់គេមិនអាចឲ្យដឹងបានទេថា តើចៅក្រមស៊ើបអង្កេតនឹងធ្វើការលើរឿងអ្វីខ្លះនោះ។
លោក ឆាំង យុ បានលើកឡើងទៀតថា យោងតាមច្បាប់ស្តីពីការបង្កើតសាលាក្តីកាត់ទោសអតីតមេដឹកនាំខ្មែរក្រហមមាត្រា៧ បានចែងថា អង្គជំនុំជម្រះវិសាមញ្ញក្នុងតុលាការកម្ពុជាមានអំណាចវិនិច្ឆ័យទោសជនសង្ស័យទាំងឡាយណាដែលទទួលខុសត្រូវខ្ពស់បំផុតក្នុងការបំផ្លាញសម្បត្តិវប្បធម៌ យោងតាមអនុសញ្ញាក្រុងឡាអេឆ្នាំ១៩៥៤ ស្តីពីការការពារសម្បត្តិវប្បធម៌ក្នុងជម្លោះចន្លោះថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩៕