លោក ចាន់ សុវ៉េត វិល​មក​ស្រុក​វិញ

មន្ត្រី​សិទ្ធិ​មនុស្ស​នៃ​អង្គការ​អាដហុក (ADHOC) លោក ចាន់ សុវ៉េត បាន​វិល​មក​បម្រើ​ការ​នៅ​ក្នុង​ស្រុក​វិញ​ហើយ បន្ទាប់​ពី​មាន​បេសកកម្ម​ទៅ​ក្រៅ​ប្រទេស​មួយ​រយៈ​កន្លង​មក។
ដោយ សេក បណ្ឌិត
2012.11.13
ចាន់ សុវ៉ាត ៣០៥ អនុ​ប្រធាន​ផ្នែក​អង្កេត​សមាគម​អាដហុក (Adhoc) លោក ចាន់ សុវ៉េត ចូល​រួម​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​២៨ ខែ​តុលា ឆ្នាំ​២០១១។
RFA Photo

លោក ចាន់ សុវ៉េត បាន​ខកខាន​មិន​ចូល​ខ្លួន​ទៅ​បំភ្លឺ​តាម​ការ​កោះ​ហៅ​របស់​តុលាការ​រាជធានី​ភ្នំពេញ កាល​ពី​ថ្ងៃ​ទី​២៤ ខែ​សីហា ទាក់ទង​ទៅ​នឹង​ការ​ចោទ​ប្រកាន់​ពី​បទ​ផ្ដល់​ជំនួយ​ដល់​ចារី ឬ​ផ្ដល់​ជំនួយ​ដល់​អ្នក​ប្រព្រឹត្ត​បទល្មើស។

ប្រធាន​ផ្នែក​អង្កេត​របស់​សមាគម​អាដហុក លោក នី ចរិយា មាន​ប្រសាសន៍​នៅ​រសៀល​ថ្ងៃ​អង្គារ ទី​១៣ ខែ​វិច្ឆិកា ថា លោក ចាន់ សុវ៉េត បាន​មក​ដល់​ប្រទេស​កម្ពុជា វិញ​ហើយ កាល​ពី​ថ្ងៃ​ទី​១២ ខែ​វិច្ឆិកា ហើយ​នៅ​ថ្ងៃ​ទី​១៣ ខែ​វិច្ឆិកា លោក​ត្រូវ​ទៅ​បំពេញ​ការងារ​ចាំបាច់​បន្ត​ទៀត​នៅ​ខេត្ត​ព្រះវិហារ។

លោក នី ចរិយា បន្ត​ថា លោក ចាន់ សុវ៉េត នឹង​ពិចារណា​ទៅ​តាម​ផ្លូវ​ច្បាប់ បើ​សិន​ជា​មាន​ការ​កោះ​ហៅ​លោក​ទៅ​បំភ្លឺ​ជា​ថ្មី​ទៀត​នោះ៖ «កាល​ពី​លើក​មុន ដោយសារ​មាន​បេសកកម្ម​មួយ​ជាក់លាក់ អ៊ីចឹង​បើ​សិន​ជា​តុលាការ​ចេញ​ដីកា​សាកសួរ​ទៅ​តាម​នីតិវិធី​ជា​លើក​ទី​២ ហើយ​ពុំ​មាន​បេសកកម្ម​ដែល​ធ្វើ​ឲ្យ​ជាន់​នឹង​ពេល​វេលា​នៃ​ការ​កោះ​ហៅ​នោះ​ទេ យើង​ចូល​ទៅ​បំភ្លឺ​នៅ​ក្នុង​តុលាការ​ទៅ​តាម​នីតិវិធី»

ចៅក្រម​ស៊ើបសួរ​សាលា​ដំបូង​រាជធានី​ភ្នំពេញ លោក ឆែ វីរៈ បាន​ចេញ​ដីកា​កោះ​ហៅ​លោក ចាន់ សុវ៉េតឲ្យ​ចូល​ខ្លួន​នៅ​ថ្ងៃ​សុក្រ ទី​២៤ សីហា ទាក់ទង​ទៅ​នឹង​ការ​ចោទ​ប្រកាន់​ពី​បទ​ផ្ដល់​ជំនួយ​ដល់​ចារី ឬ​ផ្ដល់​ជំនួយ​ដល់​អ្នក​ប្រព្រឹត្ត​បទល្មើស តាម​មាត្រា​៥៤៤ នៃ​ក្រម​ព្រហ្មទណ្ឌ។

ការ​ចោទ​ប្រកាន់​នោះ គឺ​ពាក់ព័ន្ធ​នឹង​ចលនា​ទាមទារ​ដីធ្លី​របស់​ពលរដ្ឋ ដែល​ត្រូវ​រដ្ឋាភិបាល​ចោទ​ថា ជា​ចលនា​បង្កើត​អបគមន៍ ដើម្បី​បង្កើត​រដ្ឋ​ក្នុង​រដ្ឋ​នៅ​ភូមិ​ប្រម៉ា ឃុំ​កំពង់ដំរី ស្រុក​ឆ្លូង ខេត្ត​ក្រចេះ លើ​ទីតាំង​ដី​សម្បទាន​ទំហំ​១៥០០​ហិកតារ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។