នាយករដ្ឋមន្ត្រីឆេកូគ្រោងមកទស្សនកិច្ចនៅកម្ពុជា
2010.04.21
មន្ត្រីក្រសួងការបរទេសកម្ពុជា បានបង្ហើបឲ្យដឹងថា គណៈប្រតិភូសាធារណរដ្ឋឆេកូ ដឹកនាំដោយលោក ជេន ហ្វីស្ស័រ (Jan Fischer) នាយករដ្ឋមន្ត្រីនៃសាធារណរដ្ឋឆេកូ មានគម្រោងការមកបំពេញទស្សនកិច្ចជាលើកដំបូងនៅក្នុងប្រទេសកម្ពុជា រយៈពេល ៤ថ្ងៃ គឺចាប់ពីថ្ងៃទី២៥ ដល់ថ្ងៃទី២៨ ខែមេសា ខាងមុខនេះ ដើម្បីមករឹតចំណងទាក់ទងរវាងប្រទេសទាំងពីរឲ្យកាន់តែរឹងមាំថែមទៀត។
គម្រោងការមកបំពេញទស្សនកិច្ចជាផ្លូវរដ្ឋខាងមុខនេះ គឺតាមការអញ្ជើញរបស់លោក ហ៊ុន សែន ប្រមុខរដ្ឋាភិបាលកម្ពុជា។
លោក កុយ គួង ជាមន្ត្រីអ្នកពាក្យ និងជាអនុរដ្ឋលេខាធិការក្រសួងការបរទេសកម្ពុជា បានមានប្រសាសន៍ប្រាប់វិទ្យុអាស៊ីសេរីនៅថៃ្ងពុធ ទី២១ ខែមេសា ថា ៖ «ក្នុងអំឡុងទស្សនកិច្ចហ្នឹង ឯកឧត្ដម ជេន ហ្វីស្ស័រ និងជួបពិភាក្សាការងារជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺថា បញ្ហាសំខាន់គឺផ្ដោតទៅលើការពង្រឹង និងកិច្ចប្រតិបត្តិការទ្វេភាគីរវាងព្រះរាជាណាចក្រកម្ពុជា និងសាធារណរដ្ឋឆេកូនេះ។ ធ្វើយ៉ាងណាឲ្យវិស័យវិនិយោគ ទេសចរណ៍ និងពាណិជ្ជកម្មរវាងប្រទេសនិងប្រទេសឲ្យបានកាន់តែខ្លាំងក្លាថែមទៀត។ អំឡុងពេលទស្សនកិច្ចនេះ ភាគីទាំងពីរនឹងចេញសេចក្ដីថ្លែងការណ៍រួមស្ដីពីកិច្ចសហប្រតិបត្តិការរវាងកម្ពុជា និងសាធារណរដ្ឋឆេកូផងដែរ»។
លោក ជេន ហ្វីស្ស័រ និងប្រតិភូជាន់ខ្ពស់ មានគម្រោងការជួបគាល់ព្រះមហាក្សត្រខ្មែរ ព្រះបាទបរមនាថ នរោត្តម សីហមុនី ជួបពិភាក្សាជាមួយលោក ជា ស៊ីម ប្រធានព្រឹទ្ធសភា លោក ហេង សំរិន ប្រធានរដ្ឋសភា និងលោកនាយករដ្ឋមន្ត្រី ហ៊ុន សែន ប្រទេសកម្ពុជា។
លោក គឹម ស៊ូភីរិទ្ធិ ជាតំណាងរាស្ត្រគណបក្សប្រឆាំងសមរង្ស៊ី បានមានប្រសាសន៍អត្ថាធិប្បាយថា ៖ «ជាការល្អណាស់ដែលមានការធ្វើទស្សនកិច្ចជាផ្លូវការ ផ្លាស់ប្ដូរទស្សនកិច្ចជាផ្លូវការរវាងប្រមុខអ្នកដឹកនាំរបស់ប្រទេសនីមួយៗ ដើម្បីរឹតចំណងការទូត។ ពីព្រោះក្រៅពីចំណងការទូត និងផ្នែកនយោបាយ គឺយើងឃើញមានទំនាក់ទំនងពាណិជ្ជកម្មផ្សេងទៀត អាចធ្វើឲ្យក្រុមហ៊ុនផ្សេងៗ មកពីប្រទេសឆេកូ អាចនឹងសម្លឹងឃើញវិស័យណាមួយ ដើម្បីមកធ្វើវិនិយោគនៅក្នុងប្រទេសកម្ពុជាយើង»។
ប្រភពពីមន្ត្រីការទូតកម្ពុជា បានឲ្យដឹងថា ប្រទេសកម្ពុជា និងប្រទេសសាធារណរដ្ឋឆេកូ ដែលកន្លងមកមានឈ្មោះថា សាធារណរដ្ឋឆេកូស្លូវ៉ាគី ដោយរដ្ឋឆេកូ និងស្លូវ៉ាគី ចូលជាមួយគ្នានោះ បានភ្ជាប់ទំនាក់ទំនងការទូតជាមួយគ្នាតាំងពីឆ្នាំ១៩៥៧ កន្លងទៅ ប៉ុន្តែទំនាក់ទំនងនោះបានកាត់ផ្ដាច់ទៅវិញរយៈពេលជាច្រើនឆ្នាំ ដោយសារតែរបបខ្មែរក្រហមក្នុងទសវត្សរ៍ឆ្នាំ១៩៧០។
ក្រោយមកប្រទេសកម្ពុជា និងសាធារណរដ្ឋឆេកូ បានភ្ជាប់ទំនាក់ទំនងការទូតជាថ្មីកាលពីឆ្នាំ១៩៩៦។
កាលពីខែមីនា ឆ្នាំ២០១០ កន្លងទៅនេះ ព្រះមហាក្សត្រខ្មែរ ព្រះបាទបរមនាថ នរោត្តម សីហមុនី បានយាងទៅបំពេញទស្សនកិច្ចនៅសាធារណរដ្ឋឆេកូ ដើម្បីទទួលសញ្ញាបត្របណ្ឌិតកិត្តិយសផ្នែករបាំ និងអក្សរសាស្ត្រពីប្រទេសនេះ។
ប្រទេសកម្ពុជា និងសាធារណរដ្ឋឆេកូ មិនមានស្ថានទូតនៅក្នុងប្រទេសទាំងសងខាងទេ ប៉ុន្តែកម្ពុជាមានទំនាក់ទំនងការទូតជាមួយគ្នា ដោយមាននិវេសនដ្ឋាននៅក្នុងប្រទេសអាល្លឺម៉ង់ ហើយសាធារណរដ្ឋឆេកូ មាននិវេសនដ្ឋាននៅក្នុងទីក្រុងបាងកក ប្រទេសថៃ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ