អាជ្ញាធរខែត្រតាកែវតម្រូវឲ្យក្រុមហ៊ុនទិញខ្សាច់ពីអ្នកភូមិ
2010.01.14
ការបញ្ជានេះបានធ្វើឡើងក្រោយពីអ្នកភូមិបះបោរតវ៉ាបន្តបន្ទាប់ និងចោទថា ក្រុមហ៊ុន ប្រាក់បូរិន្ទ មិនទទួលទិញខ្សាច់ពីពួកគាត់ធ្វើឲ្យខ្សាច់កកស្ទះ។ នៅពេលពួកគាត់នាំគ្នាដឹកខ្សាច់មកផ្ទះដើម្បីលក់ឲ្យអ្នកផ្សេង ត្រូវក្រុមហ៊ុនហាមលក់ខ្សាច់ទៅអ្នកផ្សេងក្រៅពីក្រុមហ៊ុន។
មេភូមិត្រពាំងព្រីង លោក ឌី កោត មានប្រសាសន៍ថា អ្នកភូមិបានស្ងប់ស្ងាត់នៅគ្រាដែលអាជ្ញាធរបានចរចាជាមួយក្រុមហ៊ុនឲ្យទិញខ្សាច់ពីអ្នកភូមិរាល់ថ្ងៃដោយគ្មានការពន្យារទិញ។
លោក ឌី កោត បានឲ្យដឹងថា ៖ «ចាប់តាំងពីថ្ងៃហ្នឹងមក ទិញហូរហែ ប៉ុន្តែមានឈប់មួយថ្ងៃអីអ៊ីចឹងដែរ ប៉ុន្តែខ្ញុំនិយាយច្បាប់ ច្បាប់ហ្នឹងត្រូវយ៉ាងម៉េច? ត្រូវតែអ៊ីចឹង។ ព្រឹកមិញខ្ញុំសួរអ្នកមកវិញថាគេទិញហើយ ប៉ុន្តែគេសុំសម្រាកម្សិលមិញ ឥឡូវគេទិញទៀតហើយ»។
អ្នកស្រី ពិសី បានឲ្យដឹងថា ពួកគាត់ឈប់តវ៉ាដោយក្រុមហ៊ុនបានទិញខ្សាច់វិញហើយ ៖ «ឥឡូវលែងនាំគ្នាតវ៉ាហើយហ្នឹង ក្រុមហ៊ុនគេទិញរាល់ថ្ងៃ ប៉ុន្តែដឹកមួយថ្ងៃអ៊ីចឹងទៅ ខានអ៊ីចឹងទៅ។ ឃើញព្រឹកមិញហ្នឹងទិញហើយ ស្អែកមិនដឹងជាគេទិញទៀតដែរឬអត់!»។
តំណាងក្រុមហ៊ុន ប្រាក់បូរិន្ទ លោក លីម ថែ ថ្លែងថា ក្រុមហ៊ុននៅបន្តទិញខ្សាច់ពីអ្នកស្រុកដដែល។ លោកថា ការផ្អាកទិញកន្លងមកព្រោះតែគ្មានកន្លែងស្តុកខ្សាច់។
លោក លីម ថែ បានបញ្ជាក់ថា ៖ «ពេលដឹកមកអ៊ីចឹង ខ្ញុំប្រាប់គាត់ដែរថា ជារឿយៗថា ឲ្យរទេះហ្នឹងដាក់ឲ្យដល់ៗ ជួយទាញរទេះទាញអីហ្នឹងឲ្យដល់ៗដើម្បីឲ្យវាគរបានខ្ពស់ ឲ្យបានច្រើន ដើម្បីឲ្យបានដឹករាល់ថ្ងៃ កុំឲ្យវាអត់មានកន្លែងដាក់ ហើយតែពួកគាត់អត់មានបានស្ដាប់អីទេ កន្លែងណាក៏ដាក់ដែរ ដាក់បន្តិចៗ ប្រឡោះដីចោលច្រើន ដើម្បីគាត់យកបានជើងច្រើន មួយថ្ងៃ ១០ជើង ជាង ២០ជើងអីឯណោះ មួយព្រឹកហ្នឹង! ដើម្បីគាត់ចង់បានលុយច្រើន គាត់ចេះតែដាក់យកមួយឈ្នះដៃ ដល់ពេលដឹកទៅបានតែបីថ្ងៃ បួនថ្ងៃអីអ៊ីចឹង វាពេញដីអស់អ៊ីចឹងទៅ អត់មានកន្លែងដាក់ ខ្ញុំក៏ផ្អាកទិញមួយថ្ងៃ ពីរថ្ងៃអ៊ីចឹងទៅ។ ដល់ហើយគាត់ថា ពួកខ្ញុំអត់ទិញ អ៊ីចឹងបានគាត់ដឹកលក់ឲ្យគេផ្សេង»។
លោក លីម ថែ បន្តថា អ្នកភូមិចង់បានប្រាក់ បានប្រព្រឹត្តកំហុសច្រើនដោយបានលួចចាក់ខ្សាច់នៅកន្លែងព្រៃច្រើនរទេះ ទំនងគេចវេសចង់កើបខ្សាច់នោះទុកលក់ឲ្យអ្នកផ្សេង។ លោកថា ក្រុមហ៊ុនចង់ព្រមានរឿងនោះផងដែរ ចំពោះអ្នកដែលប្រព្រឹត្តផ្តេសផ្តាស ក្រុមហ៊ុននឹងមិនទិញខ្សាច់ពីពួកគាត់ឡើយ។
លោក លីម ថែ បានអះអាងថា ៖ «បញ្ហាថ្ងៃនេះជាដើម ពេលដែលខ្ញុំឈរទិញអ៊ីចឹង រទេះគោឡើងមកតាំងពីយប់ តាំងពីម៉ោង ៤កន្លះអីអ៊ីចឹង ខ្ញុំចែកបុងឲ្យទៅនៅក្រោម... នៅកន្លែងទីតាំងខ្សាច់ល្អ។ នៅពេលដែលគាត់យកបុងហើយ គាត់ដឹកខ្សាច់ឡើងមកលើអ៊ីចឹង មកដល់កណ្ដាលផ្លូវគាត់ចាក់ខ្សាច់ចោល ព្រោះគាត់ទទួលបានបុងពីក្រុមហ៊ុនរួចហើយ។ គាត់ចាក់ខ្សាច់ចោលតាមផ្លូវហើយ គាត់បររទេះទទេទៅដឹកម្ដងទៀត ហើយមកចាក់ចោលមួយកន្លែងទៀត ព្រោះវាងងឹត ពួកខ្ញុំមើលមិនសព្វ»។
ខ្សាច់បាតស្ទឹងស្លាគូបានចិញ្ចឹមប្រជាជននៅស្រុកត្រាំកក់ ខេត្តតាកែវ ២ឃុំ មានឃុំជាងទង និងឃុំពពេល។ ខ្សាច់បានផ្តល់កម្រៃឲ្យអ្នកភូមិចំនួនពី ៥ ទៅ ៦ភូមិ ដែលរស់នៅដោយសារបានប្រាក់កាសពីការលក់ខ្សាច់បាតស្ទឹងស្លាគូនោះ៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ