អ្នកធ្វើការក្នុងវិស័យអប់រំកុមារតូចបានអះអាងថា កុមារនឹងទទួលបានការគាំពារប្រកបដោយគុណភាពខ្ពស់នៅឆ្នាំដំបូង និងមានសន្ទុះចាប់ផ្ដើមដ៏ជោគជ័យសម្រាប់ការចូលរៀននៅធ្វើឲ្យកុមារអាចដោះស្រាយការលំបាកទាក់ទងទៅនឹងផ្នែកសង្គម សេដ្ឋកិច្ច និងភាសា ជាពិសេសសម្រាប់កុមារងាយរងគ្រោះ និងកុមារជួបការលំបាក។
អ្នកជំនាញធ្វើការក្នុងវិស័យអប់រំ បានអះអាងថា ការគាំពារនិងការអប់រំកុមារតូច ពិតជាមានសារប្រយោជន៍ ហើយមានឥទ្ធិពលល្អទៅដល់ការចូលរៀននៅថ្នាក់បឋមសិក្សា។
ប្រធានគ្រប់គ្រងផ្នែកអប់រំនៃអង្គការសង្គ្រោះកុមារនៅកម្ពុជា ហៅថាសេវឌឹឆៀលឌ្រិន (Save The Children) លោក កែវ សារ៉ាត់ មានប្រសាសន៍ថា ការអប់រំកុមារតូចពិតជាមានសារសំខាន់ណាស់។ លោកថា អង្គការនេះបានជំរុញចំពោះវិធានការអប់រំកុមារតូចនេះ មិនមែនមានតែមត្តេយ្យសហគមន៍ មត្តេយ្យរដ្ឋ គឺបានគិតរហូតដល់ការអប់រំកុមារតូចនៅតាមខ្នងផ្ទះទៀត ដែលមានលក្ខណៈងាយតាមរយៈម្ដាយៗ ដែលធ្វើបានតាមរយៈសកម្មភាពប្រចាំថ្ងៃរបស់គាត់។
លោក កែវ សារ៉ាត់៖ «យើងក៏បានធ្វើការប្រមូលព័ត៌មានគ្រាន់ជាការងារប្រៀបធៀបមើលតើកុមារដែលបានឆ្លងកាត់វគ្គសិក្សាកុមារតូចតាមខ្នងផ្ទះក៏ដោយ កុមារតូចតាមសហគមន៍ក៏ដោយ មត្តេយ្យរដ្ឋ មត្តេយ្យនៅតាមឯកជនណាក៏ដោយ ឲ្យតែបានឆ្លងកាត់កម្មវិធីបែបនេះ តើលទ្ធផលរៀនបែបម៉េចដែរ? ជាទូទៅគឺលទ្ធផលនៃការសិក្សា ឥរិយាបថសីលធម៌ក្មេងអស់នោះ មាំទាំ ហើយរៀនប្រាកដប្រជាមែនទែន ប្រៀបធៀបនឹងកុមារដែលបានឆ្លងកម្មវិធីអប់រំកុមារតូចនេះ។ អ៊ីចឹងកិច្ចការអស់នេះគឺយើងសហការជាមួយមន្ទីរអប់រំ ក្រសួងអប់រំ គាត់បានមើលឃើញខ្លួនគាត់ថានេះគឺជាមូលដ្ឋានគ្រឹះមួយដែលជាទូទៅទាំងគេទាំងយើងមិនសូវបានគិតថាសំខាន់ទេ ព្រោះអីវាហាក់ដូចជាការធ្វើវិនិយោគទៅ វាអត់សូវមានប្រយោជន៍អី ដោយសារនឹកឃើញថាក្មេងតូចៗណា យើងបានដឹងតែយើងមិនដឹងធ្វើម៉េចដើម្បីរៀបចំកិច្ចការហ្នឹង។ អ៊ីចឹងនាំឲ្យសង្គមនាំគ្នាគិតថាបញ្ហានេះសំខាន់»។
លោក កែវ សារ៉ាត់ បានបន្តថា ការអប់រំកុមារតូច គឺឪពុកម្ដាយមានតួនាទីសំខាន់បំផុត។ ដូច្នេះហើយអង្គការសង្គ្រោះកុមារកម្ពុជាយកចិត្តទុកដាក់ផ្ដល់សេវាអប់រំកុមារតូចតាមខ្នងផ្ទះ មានន័យថា ទោះបីនៅតំបន់ដាច់ស្រយាល ឬឪពុកម្ដាយមិនបានរៀនចេះលេខឬអក្សរក៏ដោយក៏គាត់អាចរួមចំណែកជួយកូនគាត់មានការអភិវឌ្ឍន៍បានក្នុងកម្រិតណាមួយប្រសើរជាងគ្មានការអប់រំកុមារតូចនៅតាមផ្ទះនោះដែរ។ លោកបញ្ជាក់ថា នេះជាវិធីសាស្ត្រមួយអាចធ្វើនៅប្រទេសកម្ពុជាបានយ៉ាងងាយបំផុត។
លោក កែវ សារ៉ាត់៖ «ហើយរឿងអស់នេះ មិនមែនពិសោធស្រុកខ្មែរ នៅឥណ្ឌា នៅនេប៉ាល់ នៅបង់ក្លាដេស ប្រទេសក្រីក្រក៏គេអនុវត្តបែបហ្នឹងដែរ។ គឺគេជួយឪពុកម្ដាយឲ្យយល់នៅពេលណាដែលគាត់ហាន់បន្លែ ពេលណាគាត់បេះបន្លែ ពេលណាគាត់លាងចាន គាត់និយាយជាមួយកូនដើម្បី ពង្រឹងភាសា។ ដូច្នេះអប់រំកុមារតូចដែលខ្ញុំបញ្ជាក់ជូននេះ គិតថា វាអត់មានអីត្រូវថ្លៃសោះ អត់មានអស់លុយអីសោះ ឲ្យតែឪពុកម្ដាយបាននិយាយជាមួយកូន ជជែកជាមួយកូនសួរទំនាក់ទំនងប្រាស្រ័យរវាងកូននិងម្ដាយឲ្យបានមាំទាំ គឺកិច្ចការនេះដំណើរការបានហើយ»។
កាលពីខែមីនា ឆ្នាំ២០១២ ក្រសួងអប់រំយុវជន កីឡា បានបង្ហាញសមិទ្ធផលអប់រំថា ផ្នែកអប់រំកុមារតូចក្នុងឆ្នាំសិក្សា២០១០ ឆ្នាំ២០១១ បានសម្រេចលើសពីចំណុចគោលដៅដែលមានកុមារចាប់ពីអាយុ០ ទៅក្រោមអាយុ ៦ឆ្នាំ បានទទួលសេវាអប់រំជាង ២៧ម៉ឺននាក់។ ហើយថា កន្លងមកនេះមានមត្តេយ្យសិក្សាគ្រប់រូបភាពជាង៥ពាន់សាលា ឬកន្លែង។ មត្តេយ្យសិក្សារដ្ឋមានជាង ២.៥០០កន្លែង ឬសាលាមត្តេយ្យសិក្សាឯកជនមានចំនួន ២៣១សាលា និងមត្តេយ្យសិក្សាសហគមន៍ជាង ២.៣០០កន្លែង។
ទាក់ទងបញ្ហានេះ ប្រធាននាយកដ្ឋានការអប់រំកុមារតូចនៃក្រសួងអប់រំយុវជន និងកីឡា អ្នកស្រី យឹម ច័ន្ទស្រី បានបដិសេធមិនធ្វើអត្ថាធិប្បាយទេ។
ប៉ុន្តែរដ្ឋមន្ត្រីក្រសួងអប់រំយុវជន និងកីឡា លោក អ៊ឹម សិទ្ធី ថ្លែងនៅក្នុងសន្និបាតការងារអប់រំកាលពីពេលកន្លងទៅថា ការចូលរៀនរបស់កុមារនៅកម្រិតមត្តេយ្យសិក្សាទាំងសាលារដ្ឋ សហគមន៍ និងឯកជន មានចំនួនកើនឡើង ដែលឆ្លុះបញ្ចាំងពីប្រសិទ្ធភាពនៃការអប់រំកុមារតូច និងការចូលរួមពីក្រុមគ្រួសារ សហគមន៍ និងអាជ្ញាធរដែនដីកាន់តែរីកចម្រើនជាវិជ្ជមាន៖ «ការរីកចម្រើនផ្នែកមត្តេយ្យសិក្សា បានជះឥទ្ធិពលល្អមកលើការចុះឈ្មោះចូលរៀនរបស់កុមារអាយុ៦ឆ្នាំ ដែលនាំឲ្យអត្រាពិតនៃការសិក្សានៅបឋមសិក្សាកើនឡើងជាពិសេសកុមាររីក»។
របាយការណ៍សកលលោកតាមដានការអប់រំសម្រាប់ទាំងអស់គ្នា របស់អង្គការអប់រំ វិទ្យាសាស្ត្រ និងវប្បធម៌ នៃសហប្រជាជាតិ ហៅកាត់ថា យូណេសស្កូ (UNESCO) បានបង្ហាញថា ការគាំពារកុមារនិងការអប់រំដែលកុមារដែលទទួលបានក្នុងឆ្នាំដំបូង ផ្ដល់អត្ថប្រយោជន៍ដល់ពួកគេពេញមួយជីវិត។ ការគាំពារ និងការអប់រំកុមារតូចប្រកបដោយប្រសិទ្ធភាព អាចផ្ដល់ឱកាសយ៉ាងប្រសើរដល់កុមារ ដើម្បីចៀសផុតពីភាពក្រីក្រ និងដើម្បីជម្នះភាពលំបាក។ រហូតមកដល់បច្ចុប្បន្ន ជារៀងរាល់ឆ្នាំកុមាររាប់លាននាក់ ចាប់ផ្ដើមទទួលការរៀនសូត្រទាំងខ្លួនពិការ ដោយសារតែខ្លួនបានឆ្លងកាត់បទពិសោធន៍នៃកង្វះអាហារូបត្ថម្ភ សុខភាពមិនអំណោយផល និងភាពក្រីក្រ។ ឱកាសទទួលបានការអប់រំកម្មវិធីមត្តេយ្យសិក្សាមិនប្រកបដោយសមធម៌នៅតែជាឧបសគ្គមួយសម្រាប់ប្រទេសអ្នកមាន និងប្រទេសក្រីក្រ។
ទន្ទឹមនឹងគ្នានេះ សម្រាប់កុមារដែលពុំមានលទ្ធភាពទទួលបានការអប់រំនៅមត្តេយ្យសាលា នៅតែជួបបញ្ហាប្រឈមខ្លះដែរ។
លោក កែវ សារ៉ាត់ បានថ្លែងទៀតថា មានបញ្ហាប្រឈមបីសំខាន់ចំពោះការងារអប់រំកុមារតូច។ លោកថា ទី១ គឺការផ្លាស់ប្ដូរផ្នត់គំនិតរបស់ឪពុកម្ដាយ និងអ្នកធ្វើពាក់ព័ន្ធកុមារតូចត្រូវយល់ពីសារសំខាន់នៃការអប់រំកុមារតូច។ បញ្ហាប្រឈមទី២ ចំពោះថវិកាវិនិយោគសម្រាប់ការងារអប់រំកុមារតូច របស់រដ្ឋាភិបាល អង្គការជាតិ អន្តរជាតិ នៅមានកម្រិត និងចំណុចចុងក្រោយ គឺទាមទារឲ្យមានការចូលរួមទាំងអស់គ្នាក្នុងការងារអប់រំកុមារតូច។
អ្នកជំនាញធ្វើការក្នុងវិស័យអប់រំដដែល បានបញ្ជាក់ថា ការអប់រំកុមារតូចមិនមែនត្រឹមតែទទួលបានលទ្ធផលជួយក្មេងឲ្យទទួលបានអភិវឌ្ឍន៍នោះទេ អ្វីដែលពិសេសជាងនេះទៅទៀត កម្មវិធីនេះបានធ្វើឲ្យឪពុកម្ដាយនាំគ្នាខ្វល់ខ្វាយពីកូន កាត់បន្ថយអំពើហិង្សាក្នុងគ្រួសារ និងទំនាស់រវាងប្ដីប្រពន្ធ និងធ្វើឲ្យពួកគាត់ចេះស្រលាញ់គ្នាមានសុភមង្គលក្នុងក្រុមគ្រួសារ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។