ជនរងគ្រោះដោយអគ្គីភ័យនៅសង្កាត់ទឹកថ្លាអំពាវនាវរកជំនួយ
2009.06.13
ពលរដ្ឋរងគ្រោះដោយសារអគ្គីភ័យនៅភូមិត្រពាំងឈូក សង្កាត់ទឹកថ្លា ក្រុងភ្នំពេញ តវ៉ានៅមុខសាលាខណ្ឌសែនសុខ ទាមទារជំនួយពីអាជ្ញាធរនៅថ្ងៃទី១៦ មីនា ២០០៩។
«សូមសំណូមពរឲ្យរាជរដ្ឋាភិបាលជួយដោះស្រាយកន្លែងហ្នឹងឲ្យបានឆាប់។ ជាពិសេសសាលាក្រុងឲ្យមកជួយធ្វើស្ពានឲ្យពួកខ្ញុំផង ព្រោះអីប្រជាជននៅកន្លែងនេះអត់មានលទ្ធភាពទេ...» ៖ នេះជាការអំពាវនាវរបស់ជនរងគ្រោះដោយសារអគ្គីភ័យដែលរស់នៅលើទឹកនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ក្រុងភ្នំពេញ ក្រោយពីត្រូវបានភ្លើងឆេះផ្ទះសម្បែងអស់ទ្រព្យសម្បត្ដិកាលពីជាងមួយឆ្នាំកន្លងទៅដើម្បីសុំការជួយអន្ដរាគមន៍ពីសំណាក់រាជរដ្ឋាភិបាលនិងសប្បុរសជននានាដើម្បីផ្ដល់ឲ្យពួកគេអាចវិលត្រឡប់ទៅរស់នៅក្នុងភូមិចាស់វិញ។
ជនរងគ្រោះដោយអគ្គីភ័យបានបញ្ជាក់ទៀតថា កន្លងមកគេធ្លាប់បានធ្វើការអំពាវនាវដល់រាជរដ្ឋាភិបាលជារឿយៗដែរ ហើយមន្ដ្រីរបស់សាលាក្រុងភ្នំពេញ ព្រមទាំងអភិបាលខណ្ឌក៏បានចុះមកមើល ថែមទាំងប្រាប់ថាគេនឹងជួយដោះស្រាយសង់ស្ពានឲ្យ ប៉ុន្តែតម្រូវឲ្យប្រជាពលរដ្ឋជួយចេញថវិកាខ្លះ។
ជនរងគ្រោះទាំងនោះបានបន្ថែមទៀតថា ស្រាប់តែមកដល់ពេលនេះអ្វីៗដែលមន្ដ្រីបានសន្យានោះមិនឃើញមានលេចចេញជារូបរាងអ្វីទេ ៖ «គាត់បានមកសួរមតិប្រជាជនថាអាចមានលទ្ធភាពជួយស្ពានហ្នឹងខ្លះដែរឬអត់ទេ? ប្រជាជនថាអាចជួយបានមួយគ្រួសារ២៥(ដុល្លារ)។ ប្រធានក្រុមប្រធានអីហ្នឹងព្រមហើយ ប៉ុន្តែដល់ឥឡូវហ្នឹងឮសូរថាគេអត់មានលទ្ធភាពជួយវិញ»។
អភិបាលខណ្ឌសែនសុខ លោកបណ្ឌិត ខួង ស្រេង បានមានប្រសាសន៍ប្រាប់ដែរថា លោកមិនបានធ្វើការសន្យាអ្វីទេគឺគ្រាន់តែប្រាប់ប្រជាពលរដ្ឋថា លោកនឹងប្រឹងប្រែងរកសប្បុរសជនឲ្យជួយ ពីព្រោះថ្នាក់ដឹកនាំខណ្ឌមិនមានលទ្ធភាពជួយសង់ស្ពាននោះបានឡើយ។
អ្នកតំណាងរាស្ដ្រមណ្ឌលភ្នំពេញមួយរូប លោក ហូ វណ្ណ បានមានប្រសាសន៍ដែរថា សម្រាប់លោកជាតំណាងរាស្ដ្រក៏មិនអាចធ្វើអ្វីបានដែរគឺបានត្រឹមតែធ្វើការអំពាវនាវដល់រាជរដ្ឋាភិបាលពីព្រោះកិច្ចការនោះគឺលោកជាអ្នកដោះស្រាយ។
លោក ហូ វណ្ណ បានមានប្រសាសន៍ថា ៖ «ហើយទី២ទៀត ខាងគ្រោះមហន្តរាយឬក៏កាកបាទក្រហមអាចនឹងបំពេញបន្ថែមជាមួយនឹងរដ្ឋាភិបាល»។
លោក ម៉ាន់ ឈឿន អភិបាលរងក្រុងភ្នំពេញបានបញ្ជាក់ប្រាប់ដែរថា សាលាក្រុងភ្នំពេញក៏ដូចជារាជរដ្ឋាភិបាលមិនបានព្រងើយកន្ដើយទេ ចំពោះបញ្ហាប្រជាពលរដ្ឋដែលរងគ្រោះនោះគឺសាលាក្រុងក៏កំពុងតែស្វះស្វែងរកសប្បុរសជនឲ្យគេជួយដែរ។
លោក ម៉ាន់ ឈឿន បានបញ្ជាក់ថា ៖ «កំពុងតែរៀបចំហើយ កំពុងតែឲ្យសាលាខណ្ឌសែនសុខរៀបចំកម្មវិធីថាតើត្រូវជួយគាត់របៀបម៉េច?»។
ប្រជាពលរដ្ឋរងគ្រោះដោយសារអគ្គីភ័យនៅភូមិត្រពាំងឈូកដែលគេប៉ាន់ប្រមាណថាមាន៤០០គ្រួសារនោះ គេកំពុងរង់ចាំការដោះស្រាយពីអាជ្ញាធរក្រុង ហើយក៏សូមធ្វើការអំពាវនាវដល់ប្រមុខរាជរដ្ឋាភិបាល គឺលោកនាយករដ្ឋមន្ដ្រី ហ៊ុនសែន ផងដែរ ដោយសុំឲ្យជួយយ៉ាងហោចណាស់សង់ស្ពាននិងផ្លូវថ្នល់ចូលក្នុងភូមិដើម្បីឲ្យពួកគេអាចមានលទ្ធភាពសង់លំនៅឡើងវិញ។
ជនរងគ្រោះដដែលបានបន្ដថា ការស្នាក់នៅក្នុងតង់កៅស៊ូអស់រយៈពេលមួយឆ្នាំកន្លងមកនេះបានធ្វើឲ្យគេប្រឈមមុខនឹងបញ្ហាលំបាកជាច្រើនដូចជាជម្រកត្រូវលេចធ្លុះធ្លាយ ខ្វះអនាម័យ និងបញ្ហាអសន្តិសុខ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ