អគ្គិភ័យបំផ្លាញផ្ទះ៤៥០ខ្នង នៅក្នុងសង្កាត់ទឹកថ្លា
2008.04.13
របាយការណ៍បណ្តោះឤសន្នរបស់ប៉ូលិស ឱ្យដឹងថា យ៉ាងហោចណាស់មានផ្ទះចំនួន៤៥០ខ្នង ត្រូវបានបំផ្លាញ នៅក្នុងអគ្គិភ័យដ៏ធំសម្បើមមួយ នាព្រឹកថ្ងៃសុក្រនេះ នៅតំបន់អ្នកក្រីក្រ ខាងលិចក្រុងភ្នំពេញ ទល់មុខមន្ទីរពេទ្យ លោកសង្ឃ ។
លោក ប៉ែន ថុល មេប៉ុស្តិ៍សង្កាត់ទឹកថ្លា មានប្រសាសន៍ថា មិនទាន់ដឹងនៅឡើយ អំពីចំនួនអ្នករងរបួស ឬក៏អ្នកស្លាប់ នៅក្នុងព្រឹត្តិការណ៍នោះទេ ។ ឤជ្ញាធរ កំពុងខ្នះខ្នែងស្រាវជ្រាវ និងបន្តសរុបរបាយការណ៍នៃការខូចខាត ៖ «យើងគ្រាន់តែថា ឆេះនេះ វាឆេះហួសពីការស្មាន ។ ថ្នាក់ដឹកនាំ យកចិត្តទុកដាក់ជួយណាស់ ហើយជួយសង្គ្រោះអត់ទាន់» ។
អគ្គិភ័យនេះចាប់ផ្តើមឡើង ចាប់តាំងពីម៉ោង ៥ទៀបភ្លឺ រហូតដល់ម៉ោង ១១ថ្ងៃត្រង់ គឺប្រើពេលអស់ចំនួន ៦ម៉ោង ដោយលេបត្របាក់លំនៅរបស់អ្នកភូមិទាំងស្រុង គ្មានសល់ ដែលលំនៅទាំងនោះ ភាគច្រើនសង់អំពីឈើ នៅលើបឹងទឹកស្អុយ ដោយប្រើស្ពានតូចៗជាផ្លូវ ។
អ្នករងគ្រោះដែលកំពុងប្រមូលអីវ៉ាន់ចាស់ៗបន្តិចបន្តួច រត់ចេញពីភ្លើង ទឹកមុខជោគជាំដោយទឹកភ្នែក បាននិយាយប្រាប់ វិទ្យុឤស៊ីសេរី ថា ៖ «ខាងក្រោយផ្ទះស្រីៗ វាជួលប៉ុន្មានបន្ទប់ ហើយវាវេចបង្វេចរត់បាត់ ។ ខ្ញុំក្រោកអត់ទាន់ផង ក្រោកឡើងភ្លើងឆេះហើយ ។ ផ្ទះខ្ញុំឆេះអស់ហើយ យកបានខ្លះ... ។ កាលពីមុនដំបូង ផ្ទះហ្នឹងអត់ទាន់ឆេះ ខ្ញុំហៅឡានទឹកមក ឡានទឹកអត់មក គេថាអត់មានទឹកៗ ទាល់តែឆេះជ្រុល បានពូមួយជួយខ្ញុំ ឥឡូវទាល់តែឆេះអស់ទៅ» ។
នៅពេលដែលយើងបានទៅដល់ទីនោះ វេលាប្រហែលម៉ោង ៥កន្លះទៀបភ្លឺ យើងបានឃើញរថយន្តពន្លត់អគ្គិភ័យ ប្រហែល៥គ្រឿង នៅកន្លែងកើតហេតុ ប៉ុន្តែមិនទាន់ឃើញមានធ្វើសកម្មភាពឡើយ ។ ក្រុមពន្លត់អគ្គិភ័យ បាននិយាយថា គ្មានច្រកចូលក្នុងការចូលពន្លត់ ។ ភ្លើងបានឆាបឆេះសន្ធោសន្ធៅ រីករាលធំទៅៗ រហូតដល់កម្ទេចផ្ទះនៅតំបន់នោះទាំងស្រុង ។
អ្នករងគ្រោះជាច្រើននាក់និយាយថា គេបានទារប្រាក់មុននឹងពន្លត់ ។ បុរសម្នាក់ ដែលមានសម្លៀកបំពាក់ ប្រឡាក់ដោយកម្ទេចកម្ទីផ្ទះឆេះ តាំងពីជើងរហូតដល់ក្បាល ទទឹកខ្លួនជោគ ហើយធំក្លិនឈ្ងៀម និយាយអំពីមូលហេតុ នៃភ្លើងឆេះផ្ទះ និងការសូកប៉ាន់ ៖ «ឆេះអស់ហើយ ...ឱ្យលុយគេ ៤០០ហើយ គេអត់បាញ់ឱ្យផង ភ្លើងខ្លាំងពេក យើងឱ្យលុយសុំឱ្យគេបាញ់ឱ្យ ប៉ុន្តែអត់បាញ់ឱ្យ ។ មូលហេតុផ្ទះស្រីខូច វាជួលនៅក្បែរហ្នឹង» ។
ប្រភពពីឤជ្ញាធរវិញបានអះឤងថា គេបានប្រើរថយន្តពន្លត់អគ្គិភ័យ ចំនួន២០០គ្រឿង ដើម្បីសង្គ្រោះ មកដល់ពេលនេះគេកំពុងគិតគូរអំពី ការផ្តល់ស្បៀងឤហារ និងជម្រកបណ្តោះឤសន្ន សម្រាប់អ្នករងគ្រោះ ។
អភិបាលរងក្រុងភ្នំពេញ លោក ម៉ាន់ ឈឿន មានប្រសាសន៍យ៉ាងដូច្នេះ ៖ «យើងនឹងអំពាវនាវបន្តទៀត សប្បុរសជន ជាពិសេសមុនគេ គឺកាកបាទក្រហម ហ្នឹងហើយ ។ ឤជ្ញាធរដែនដី ឤចថា លោកនឹងរកសប្បុរសជនថែមទៀត មកជួយ ។ ផែនការដោះស្រាយនេះ វាជាភារកិច្ចរបស់យើងហើយ» ។
គ្មានប្រភពផ្លូវការណាមួយ អះឤងអំពីមូលហេតុនៃអគ្គិភ័យនេះនៅឡើយទេ ។ ឧបនាយករដ្ឋមន្ត្រី និងជារដ្ឋមន្ត្រី ក្រសួងមហាផ្ទៃ លោក ស ខេង ជាមួយនឹង អង្គការក្រៅរដ្ឋាភិបាល និងក្រុមពេទ្យជាច្រើន បានមានវត្តមាននៅក្នុងកិច្ចសង្គ្រោះនោះដែរ ។
នៅពេលនេះ មនុស្សរាប់រយនាក់កំពុងប្រឈមមុខនឹង បញ្ហាអត់ទីជម្រក នៅគ្រាដែលបុណ្យចូលឆ្នាំថ្មី នឹងមកដល់នារយៈពេលពីរថ្ងៃខាងមុខនេះ ៕