សម្ព័ន្ធប្រជានេសាទកម្ពុជារកវិធីគ្រប់គ្រងធនធានជលផល
2012.11.22
បញ្ហានេះ ទើបសម្ព័ន្ធប្រជានេសាទកម្ពុជា និងអង្គការក្រៅរដ្ឋាភិបាល រកវិធីគ្រប់គ្រងធនធានជលផលឲ្យនៅតែសំបូររហូតទៅ។
សម្ព័ន្ធប្រជានេសាទកម្ពុជា ចំនួន ៦០នាក់ មកពី ៣តំបន់ គឺទន្លេសាប ទន្លេមេគង្គ និងសមុទ្ទ និងអង្គការក្រៅរដ្ឋាភិបាល ជួបជុំគ្នារកវិធីគ្រប់គ្រងធនធានជលផលឲ្យមាននិរន្តរភាព។
ការជួបជុំគ្នានេះ គឺក្រោយពីនាយករដ្ឋមន្ត្រី ហ៊ុន សែន កាត់ឡូត៍នេសាទមកឲ្យសាធារណជនប្រើប្រាស់វិញ កាលពីខែមេសា ឆ្នាំ២០១២។
ប្រធានសម្ព័ន្ធប្រជានេសាទកម្ពុជា លោក ឡុង សូចែត ថ្លែងនៅថ្ងៃ២២ ខែវិច្ឆិកា ថា ការខិតខំប្រឹងប្រែងរបស់សម្ព័ន្ធប្រជានេសាទកម្ពុជា គឺដើម្បីការពារផលត្រីទឹកសាប និងត្រីទឹកប្រៃ។ ប៉ុន្តែប្រជានេសាទ ៣តំបន់ បានរងនូវការប្ដឹងពីឈ្មួញ និងមន្ត្រីជលផលទៅតុលាការ។ តែការតស៊ូមតិបានធ្វើឲ្យរាជរដ្ឋាភិបាលកាត់ឡូត៍នេសាទនៅជុំវិញបឹងទន្លេសាប និងតាមខេត្តមួយចំនួន មកឲ្យប្រជាពលរដ្ឋរកនេសាទជាសាធារណៈ។ ហេតុនេះអ្នកនេសាទត្រូវតែរួមគ្នាការពារទាំងព្រៃលិចទឹក ទប់ស្កាត់បទល្មើសដែលលួចប្រើឧបករណ៍ខុសច្បាប់ និងទប់ស្កាត់បច្ចេកទេសចាប់ត្រីទំនើបដែលកំពុងសំរុកបំផ្លាញត្រីក្នុងទន្លេ និងសមុទ្ទនៅតំបន់ទាំង៣។
លោក ឡុង សូចែត៖ «ខ្ញុំឃើញប្រជានេសាទនៅតាមតំបន់ភាគច្រើននោះ ឃើញចាប់ផ្តើមប្រើមងក្រឡា ១តឹក២ហ៊ុន និងក្រឡា ១តឹក បានសេចក្ដីថា ត្រីនៅក្នុងបឹងទន្លេសាប អាចមានធំៗខ្លះមកវិញហើយ»។
តំណាងប្រជានេសាទតំបន់សមុទ្ទ លោក ឡោ ឈាន ថ្លែងថា ការប្រឹងប្រែងការពារធនធានជលផលរបស់ពួកគាត់នេះ មិនមែនផលប្រយោជន៍អ្នកណាមួយ ឬគណបក្សណាទេ គឺការពារផលប្រយោជន៍សង្គម និងសហគមន៍។ ប៉ុន្តែមានក្រុមហ៊ុនក្នុងស្រុកមួយចំនួនចាក់ដីលុបឆ្នេរ។ នៅពេលពលរដ្ឋទៅការពារទំនប់ឆ្នេរ រងនូវការប្តឹងឡើងតុលាការ។
លោកថា ប្រជានេសាទតំបន់ឆ្នេរកំពុងប្រឈម គឺក្រុមហ៊ុនវៀតណាម សុំគម្រោងអភិវឌ្ឍន៍ព្រៃកោងកាង ១.២០០ហិកតារ ដែលប៉ះពាល់ដល់កិច្ចការពារធនធានជលផល និងដែននេសាទ៖ «ប្រឈមមួយទៀត ក្រុមហ៊ុនគ្រីស្តាល់រាយ ឃើញធ្វើសកម្មភាពស្តារព្រែកត្នោត មានទទឹង ៩០ម៉ែត្រ បណ្តោយ ៣.៥០0 ជម្រៅ ៦ម៉ែត្រ និងបាត ៣០ម៉ែត្រ»។
ប្រធានសហគមន៍នេសាទតំបន់ទន្លេមេគង្គ និងជាប្រធានឡូត៍លេខ ១៨ ខេត្តកណ្ដាល លោក ចាន់ សាវ៉ន ថ្លែងថា ឡូត៍លេខ ១៧ កំពុងមានការបាញ់ថ្នាំសម្លាប់ព្រៃលិចទឹក និងជីវចម្រុះច្រើនទៀត នៅក្នុងស្រុកខ្សាច់កណ្ដាល៖ «បាញ់សម្លាប់ព្រៃលិចទឹកនៅចំណុចបឹងប្រានេះតែម្ដង តែខ្ញុំមិនទាន់អាចសន្និដ្ឋានថា ហិកតារនោះប៉ុន្មានទេ ព្រោះថា យើងខ្ញុំមិនទាន់សិក្សាច្បាស់លាស់»។
មន្ត្រីសមាគមការពារសិទ្ធិមនុស្សអាដហុក ខេត្តកំពត អ្នកស្រី ទ្រី ឈូន ថ្លែងថា ក្រោមការជួយការពារផ្លូវច្បាប់ ពីអង្គការសហការធ្វើជាដៃគូប្រជានេសាទនៅតំបន់ទន្លេសាប ត្រូវតុលាការបានបញ្ចប់ការចោទមកលើអ្នកនេសាទចំនួន ២០នាក់៖ «គឺដើមខែវិច្ឆិកា នេះ តុលាការបានចេញដីកាលើកលែងចោទប្រកាន់ទៅលើប្រជានេសាទយើងទាំងអស់»។
នាយកប្រតិបត្តិនៃអង្គការសម្ពន្ធភាពដើម្បីអភិរក្សធនធានជលផល ហៅកាត់ថា (FACT) លោក ឱម សាវ៉ាត ថ្លែងថា ស្ថានភាពនេសាទក្នុងឆ្នាំ២០១២ ទាក់ទងការប្រើឧបករណ៍នេសាទខុសច្បាប់ និងសកម្មភាពតស៊ូមតិនានារបស់សម្ព័ន្ធប្រជានេសាទកម្ពុជា មានសន្ទុះខ្លាំងក្លា ដោយធ្វើហើយធ្វើទៀត តាមរយៈការប្រជុំដោះស្រាយបញ្ហាក្នុងសិក្ខាសាលា ធ្វើជាញត្តិ ឬសំណូមពរ និងជួបជាមួយថ្នាក់ដឹកនាំ ជាពិសេសរដ្ឋបាលជលផល។
បច្ចុប្បន្នប្រធានរដ្ឋបាលជលផល បានផ្ដល់សិទ្ធិជូនសម្ព័ន្ធប្រជានេសាទកម្ពុជា អាចចូលជួប និងឲ្យជូនដំណឹងពីបទល្មើសនានា ដែលកើតមានក្នុងស្រុកលោកថា នៅថ្ងៃ២៣ ខែវិច្ឆិកា សម្ព័ន្ធប្រជានេសាទកម្ពុជា នឹងនាំយកបញ្ហាដែលបានកើតក្នុងតំបន់ទន្លេសាប ទន្លេមេគង្គ និងតំបន់ឆ្នេរសមុទ្ទ ដាក់ជូនរដ្ឋបាលជលផលជួយដោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។