សកម្មជន​ការពារ​ព្រៃឈើ​បារម្ភ​ជុំវិញ​ការ​កាប់​បំផ្លាញ​ព្រៃ​សហគមន៍

តំណាង​សហគមន៍​ការពារ​ព្រៃ​ឈើ​មួយ​រូប នៅ​តំបន់​ភូមិ​ឈើស្លាប់​និង​ភូមិ​អូរទង ឃុំ​គោកខ្ពស់ ស្រុក​បន្ទាយអំពិល ខេត្ត​ឧត្តរមានជ័យ បាន​បង្ហាញ​កង្វល់​ថា ព្រៃ​ដែល​សហគមន៍​ការពារ​ជាង​១.៦០០​ហិកតារ​កំពុង​ប្រឈម​មុខ​នឹង​ការ​កាប់​បំផ្លាញ​ដោយ​ក្រុម​ឈ្មួញ​ដឹក​យក​ទៅ​ធ្វើ​អាជីវកម្ម​ខុស​ច្បាប់។
ដោយ ហង្ស សាវយុត
2010.01.05

លោក លាវ លី ប្រធាន​សហគមន៍​ព្រៃ​ឈើ​ភ្នំ​ដងរែក​សម្រែក​ព្រៃ​ស្រស់ បាន​មាន​ប្រសាសន៍​កាល​ពី​ព្រឹក​ថ្ងៃ​ច័ន្ទ ទី​៤ ខែ​មករា ដោយ​បង្ហាញ​ការ​ព្រួយ​បារម្ភ​ថា ព្រៃ​ឈើ​សហគមន៍​របស់​លោក​កំពុង​ប្រឈម​មុខ​ទៅ​រក​ការ​បាត់បង់ ប្រសិន​បើ​អាជ្ញាធរ​របស់​រដ្ឋាភិបាល​ដែល​ពាក់ព័ន្ធ​មិន​ចាត់​វិធានការ​តឹង​រ៉ឹង​ជួយ​ការពារ​ទេ។

លោក លាវ លី បាន​មាន​ប្រសាសន៍​ទៀត​ថា បច្ចុប្បន្ន​ព្រៃ​សហគមន៍​កំពុង​ត្រូវ​បាន​ក្រុម​ឈ្មួញ​លួច​កាប់​ធ្វើ​អាជីវកម្ម​ខុស​ច្បាប់​និង​មាន​ទាហាន​ខ្លះ​បាន​ចូល​រួម​ចំណែក​ក្នុង​សកម្មភាព​នោះ ធ្វើ​ឲ្យ​មន្ត្រី​រដ្ឋបាល​ព្រៃ​ឈើ​ពិបាក​ក្នុង​ការ​បង្ក្រាប។

លោក លាវ លី មាន​ប្រសាសន៍​ដូច្នេះ ៖ «ទាក់​ទង​នឹង​សកម្មភាព​បទ​ល្មើស​ព្រៃ​ឈើ​ហ្នឹង​វា​មាន​ច្រើន​រូប​ភាព។ ជន​មាន​អំណាច​ពី​ខាង​ក្រៅ​គាត់​លួច​នៅ​ពេល​យប់។ នេះ​យើង​ពិបាក។ តាម​ការ​រាយ​ការណ៍​ពី​ជន​ល្មើស​ដែល​ខ្ញុំ​បាន​សាកសួរ​ក្នុង​ការ​អារ​ហ្នឹង ទាហាន​នៅ​ហ្នឹង​បង់​ឲ្យ​គេ​១​ម៉ឺន​រៀល​ក្នុង​មួយ​ថ្ងៃ»

ទោះ​យ៉ាង​ណា​មន្ត្រី​ផ្នែក​និង​សង្កាត់​រដ្ឋបាល​ព្រៃ​ឈើ​ប្រចាំ​តំបន់​នោះ បាន​ឆ្លើយ​តប​ថា គេ​ពុំ​បាន​ដឹង​ថា មាន​បញ្ហា​ដូច្នោះ​កើត​ឡើង​ទេ។

លោក ខម ខែម នាយ​សង្កាត់​រដ្ឋបាល​ព្រៃ​ឈើ​​ស្រុក​បន្ទាយអំពិល បាន​មាន​ប្រសាសន៍​ថា លោក​ពុំ​ដឹង​អំពី​ព័ត៌មាន​ទាំង​នោះ​ទេ ប៉ុន្តែ​លោក​ឆ្លល់​ថា ប្រសិន​បើ​មាន​បញ្ហា​កើត​ឡើង​ដូច្នោះ​មែន ហេតុ​អ្វី​ បាន​ជា​តំណាង​សហគមន៍​មិន​ប្រាប់​មក​មន្ត្រី​រដ្ឋាបាល​ព្រៃ​ឈើ​ឲ្យ​ជួយ​ចាត់​វិធានការ​បង្រ្កាប?

លោក ខម ខែម មាន​ប្រសាសន៍​ដូច្នេះ​ថា ៖ «គាត់​រាយ​ការណ៍​មក​ទាន់​ពេល​វេលា​ខាង​ខ្ញុំ​នឹង​ចាត់​ការ​ហើយ បើ​ថា​ពាក់ព័ន្ធ​ខាង​ណា​ខាង​ណី ពួកខ្ញុំ​នឹង​សួរ​ទៅ​ថ្នាក់​ដឹកនាំ​លើ​ទៀត។ គាត់​រាយ​ការណ៍​មក​ខ្ញុំ​មក ខាង​ខ្ញុំ​នឹង​ចាត់ការ ប៉ុន្តែ​បើ​ជួនកាល​គាត់​ដឹង​ហើយ​គាត់​ព្រងើយ​កន្តើយ​ដែរ​អាហ្នឹង ខ្ញុំ​មិន​ដឹង​ទៅ​ធ្វើ​ម៉េច​ដែរ បើ​ខ្ញុំ​សមត្ថកិច្ច​យើង​នៅ​ឯ​ណេះ ហើយ​គាត់​នៅ​ក្បែរ​មូលដ្ឋាន​គាត់​មិន​រាយ​ការណ៍»

អ្នក​កាសែត​មួយ​ក្រុម​ដែល​កំពុង​តាម​ប្រមាញ់​រូបភាព​រថយន្ត​ដឹក​ជញ្ជូន​ឈើ​ខុស​ច្បាប់​នៅ​ពេល​យប់​ក្នុង​ខេត្ត​ឧត្តរមានជ័យ បាន​ឲ្យ​ដឹង​ថា សកម្មភាព​ដឹក​ជញ្ជូន​ឈើ​ខ្លះ​ពាក់ព័ន្ធ​ជាមួយ​ក្រុម​ទាហាន​ប្រដាប់​អាវុធ។

កាល​ពី​យប់​ថ្ងៃ​ទី​៣១ ធ្នូ ឆ្នាំ​២០០៩ កន្លង​មក អ្នក​កាសែត​ក្នុង​ស្រុក​ចំនួន​១១​នាក់​នៅ​ខេត្ត​ឧត្តរមានជ័យ ត្រូវ​កង​ទាហាន​ដែល​ការពារ​ឡាន​ដឹក​ឈើ​ឃាត់​ខ្លួន​ជាង​១​ម៉ោង ដោយ​ដក​ហូត​យក​ម៉ាស៊ីន​ថត​រូប​ផង​នៅ​ពេល​ដែល​ថត​យក​រូបភាព​ឡាន​ដឹក​ឈើ​នោះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Jan 05, 2010 03:56 PM

if ccp people did not do that, how can those peole bring money to look after the ccp or north vietnamse communist party. who is the want that tried to protect thos forst must be paid attent to what did you do. ong ho told Hun xen to kill all the cambodian asset. so better stop oppose to the ccp people, or north vietnamese communist troops.