តុលាការ​ខេត្ត​កំពង់ស្ពឺ​កោះ​ហៅ​សកម្មជន​ការពារ​ព្រៃឈើ​ម្នាក់​ទៅ​សាកសួរ

សកម្មជន​ការពារ​ព្រៃឈើ​ម្នាក់​នៅ​ខេត្ត​កំពង់ស្ពឺ ត្រូវ​បាន​តុលាការ​កោះ​ហៅ​ទៅ​សាកសួរ​ក្នុង​បទ​ចោទ​ប្រកាន់​ថា បាន​រំលោភ​ដែន​ដី​ការពារ​ព្រៃឈើ​របស់​ក្រសួង​បរិស្ថាន​និង​ជំរិត​ទារ​ប្រាក់​ពី​ឈ្មួញ​កាប់​ព្រៃឈើ​ខុស​ច្បាប់។
ដោយ សុខ សេរី
2009.12.22
Share on WhatsApp
Share on WhatsApp
កាប់​ឈើ​កំពង់ស្ពឺ ឈើ​ដែល​អ្នកភូមិ​កាប់​យក​មក​ធ្វើ​អុស នៅ​ស្រុក​ឱរ៉ាល់ ខេត្ត​កំពង់ស្ពឺ។
RFA File Photo/Ouk Savborey

តុលាការ​សាលា​ដំបូង​ខេត្ត​កំពង់ស្ពឺ បាន​កោះ​ហៅ​សម្មជន​ការពារ​ព្រៃ​ឈើ​ម្នាក់​ទៅ​សាកសួរ​នៅ​ថៃ្ង​ទី​២៣ ខែ​ធ្នូ​ឆាប់ៗ​នេះ នៅ​ជុំវិញ​សំណុំ​រឿង​ព្រហ្មទណ្ឌ​ចោទ​ប្រកាន់​ថា សកម្មជន​រូប​នោះ​បាន​រំលោភ​ដែន​ការពារ​ព្រៃឈើ​របស់​ក្រសួង​បរិស្ថាន​នៅ​ក្នុង​ដែន​ជម្រក​សត្វ​ព្រៃ​ភ្នំ​ឱរ៉ាល់ ខេត្ត​កំពង់ស្ពឺ​នោះ និង​បទ​ចោទ​ប្រកាន់​ថា លោក​បាន​ជំរិត​ទារ​ប្រាក់​ពី​ឈ្មួញ​កាប់​ព្រៃឈើ​ខុស​ច្បាប់​កាល​ពី​ឆ្នាំ​២០០៨​កន្លង​ទៅ។

ដើម​បណ្តឹង​ដែល​បាន​ប្តឹង​សកម្មជន​រូប​នេះ គឺ​ជា​ប្រធាន​អនុរក្ស​នៃ​ដែន​ជម្រក​សត្វព្រៃ​ភ្នំ​ឱរ៉ាល់​នោះ។

លោក ម៉ុត ដារ៉ា ជា​ព្រះរាជ​អាជ្ញា​រង​នៃ​តុលាការ​ខេត្ត​កំពង់ស្ពឺ បាន​មាន​ប្រសាសន៍​ថា នឹង​មិន​មាន​ការ​ចាប់​ឃាត់​ខ្លួន​ទេ​ក្រោយ​ពី​ការ​សាកសួរ​នោះ។

លោក ម៉ុត ដារ៉ា មាន​ប្រសាសន៍​ដូច្នេះ ៖ «អញ្ជើញ​គាត់​មក​សាកសួរ មើល​ក្នុង​ដីកា​ហ្នឹង​មាន​ហើយ ហៅ​គាត់​ទៅ​សាកសួរ​ទេ មិន​មែន​ហៅ​មក​ចាប់​ខ្លួន​ឯ​ណា»

លោក ជា ហ៊ាន ជា​ប្រធាន​អង្គការ​ឃ្លាំមើល​និង​ការពារ​សម្បត្តិ​ធនធាន​ធម្មជាតិ​នៃ​ប្រទេស​កម្ពុជា ដែល​រង​ការ​កោះ​ហៅ​នោះ​បាន​មាន​ប្រសាសន៍​ប្រាប់​វិទ្យុ​អាស៊ី​សេរី​ថា ៖ «លោក​ព្រះរាជ​អាជ្ញា​ឲ្យ​ចូល​ខ្លួន​ថ្ងៃ​ទី​២៣ (ធ្នូ)។ ខ្ញុំ​ត្រូវ​តែ​ចូល។ ខ្ញុំ​មាន​ការ​ព្រួយ​បារម្ភ​ដែរ​ចំពោះ​បញ្ហា​តុលាការ បើ​លោក​មាន​យុត្តិធម៌​មិន​បញ្ហា​ទេ ខ្លាច​ក្រែងលោ​លោក​ពុំ​មាន​យុត្តិធម៌។ ឲ្យ​ខ្ញុំ​ចូល​នៅ​ថ្ងៃ​ទី​២៣ វេលា​ម៉ោង​២​និង​៣០​នាទី​ល្ងាច»

លោក អំ សំអាត ជា​ប្រធាន​ក្រុម​ស៊ើប​អង្កេត​នៃ​អង្គការ​ការពារ​សិទ្ធិ​មនុស្ស​ហៅ​កាត់​ថា លីកាដូ បាន​មាន​ប្រសាសន៍​ថា ៖ «ជា ហ៊ាន គាត់​បាន​ទៅ​ស្នាក់ការ​លីកាដូ​កំពង់ស្ពឺ ដើម្បី​សុំ​ឲ្យ​យើង​ជួយ​ឃ្លាំ​មើល​អំពី​សុវត្ថិភាព​របស់​គាត់។ លោក​បំពេញ​តួនាទី​ដើម្បី​ការពារ​ធនធាន​ធម្មជាតិ​ត្រូវ​បាន​ប្ដឹង​បក​ចោទ​ប្រកាន់​ថា​រំលោភ​ទៅ​វិញ ដែល​ជា​ការ​មួយ​ដ៏​សោកស្ដាយ​ដែល​សកម្មជន​ការពារ​ធនធាន​ធម្មជាតិ​និង​បរិស្ថាន​បែរ​ជា​ត្រូវ​បាន​រង​ការ​ចោទ​ប្រកាន់​ទៅ​វិញ»

ក្រុម​មន្រ្តី​អនុរក្ស​នៃ​ដែន​ជម្រក​សត្វ​ព្រៃ​ភ្នំ​ឱរ៉ាល់ ខេត្ត​កំពង់ស្ពឺ បាន​បឹ្តង​ចោទ​ប្រកាន់​លោក ជា ហ៊ាន ខាង​លើ​នេះ ដោយសារ​តែ​លោក​បាន​ដឹក​នាំ​សកម្មជន​របស់​លោក​ជា​ច្រើន​នាក់​ចូល​ទៅ​តាម​ដាន​ និង​ឃ្លាំមើល​សកម្មភាព​កាប់​ព្រៃ​ឈើ​និង​ដឹក​ឈើ​ប្រណីត​ខុស​ច្បាប់ កាល​ពី​ខែ​កញ្ញា ឆ្នាំ​២០០៨ និង​សកម្មភាព​កាប់​ព្រៃ​ឈើ​វាតទី​យក​ដី​ធ្លី​ចំនួន​៣.០០០​ហិកតា នៅ​ចំណុច​ស្ទឹង​អូរអញ្ចាញ ឃុំ​តាសាល ស្រុក​ឱរ៉ាល់ ខេត្ត​កំពង់ស្ពឺ។

លោក ជា ហ៊ាន ត្រូវ​បាន​គេ​កត់​សម្គាល់​ថា ជា​សកម្មជន​ការពារ​ព្រៃ​ឈើ​ដែល​បាន​រិះគន់​ដោយ​ចំហ​ចំពោះ​មន្រ្តី​បរិស្ថាន​នៅ​ក្នុង​ខេត្ត​កំពង់ស្ពឺ អំពី​ការ​បណ្តែត​បណ្តោយ​ឲ្យ​មាន​បទ​ល្មើស​ព្រៃ​ឈើ​ខុស​ច្បាប់​នៅ​ទី​នោះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល