ព្រៃ​ឈើ​ជិត​១​ពាន់​ហិកតារ​នៅ​ក្នុង​ខេត្ត​បាត់ដំបង​ត្រូវ​ភ្លើង​ឆាប​ឆេះ

អាជ្ញាធរ​មូលដ្ឋាន​បាន​ថ្លែង​ថា យ៉ាង​ហោច​ណាស់​មាន​ព្រៃ​ឈើ​ជិត​មួយ​ពាន់​ហិកតារ ត្រូវ​ភ្លើង​ឆេះ​លេប​ត្របាក់​រាប​ដល់​ដី​ក្នុង​រយៈពេល​បី​ថ្ងៃ​ជាប់​គ្នា ចំណែក​ឯ​អាជ្ញាធរ​វិញ​មិន​មាន​វិធានការ ឬ​លទ្ធភាព​ទប់​ស្កាត់​បាន។
ដោយ សុផលមុន្នី
2009.04.22
Share on WhatsApp
Share on WhatsApp

គ្រោះ​ធម្មជាតិ​ឆេះ​ព្រៃ​នេះ​បាន​កើត​ឡើង​នៅ​ឃុំ​ព្រៃ​ចាស់ ស្រុក​ឯក​ភ្នំ កាល​ពី​ថ្ងៃ​ទី​១៩ រហូត​ដល់​ថ្ងៃ​ពុធ ទី​២២​ខែ​មេសា​នេះ ក៏​មិន​ទាន់​រលត់​នៅ​ឡើយ។

មេឃុំ​ព្រៃ​ចាស់ លោក ឈន ឈាង បាន​មាន​ប្រសាសន៍​នៅ​ថ្ងៃ​ពុធ​ថា ព្រៃ​ឈើ​លើ​ផ្ទៃ​ដី​ទំហំ​ជិត​១​ពាន់​ហិកតារ ជា​ប្រភេទ​ព្រៃ​រនាម​លិច​ទឹក​ត្រូវ​បាន​ភ្លើង​ឆេះ​បំផ្លាញ ហើយ​នៅ​ថ្ងៃ​ពុធ​នេះ កម្សួល​ផ្សែង​នៅ​តែ​បន្ត​ហុយ​ឡើង​លើ។

លោក ឈន ឈាង មាន​ប្រសាសន៍​ដូច្នេះ​ថា ៖ «ខ្យល់​មក​វា​អាច​ឆេះ​បន្ត​ទៀត ព្រោះ​វា​ឆេះ​គល់​ធំៗ​អី​ទៅ កាល​ណា​មាន​ខ្យល់​វា​អាច​ផាត់​ទាញ​ទៅ​ទៀត។ វិធានការ​ការពារ​មិន​ដឹង​ថា​មាន​ស្អី បើ​សិន​ជា​យើង​បូម​ទឹក​បាញ់ ក៏​មិន​ដឹង​ថា​បាញ់​យ៉ាង​ម៉េច​កើត ព្រៃ​ខ្ពស់ ហើយ​បើ​សិន​ជា​អាច​យក​ឡាន​មក​បាន ក៏​ចូល​មិន​ចុះ​នឹង​ព្រៃ​ដែរ»

មិន​មាន​ប្រភព​ផ្លូវការ​ណា​មួយ​អះអាង​បញ្ជាក់​ពី​មូលហេតុ ដែល​បណ្តាល​ឲ្យ​មាន​ភ្លើង​ឆេះ​ព្រៃ​នេះ​ទេ ក៏​ប៉ុន្តែ​អ្នក​ភូមិ​និង​អាជ្ញាធរ​មូលដ្ឋាន​សន្និដ្ឋាន​ថា ការ​ឆេះ​នេះ​ទំនង​ដោយសារ​ការ​កាប់​រាន​ដី​ព្រៃ​និង​មាន​អ្នក​បោះ​កន្ទុយ​បារី គួប​ផ្សំ​នឹង​រដូវ​នេះ​ជា​រដូវ​ក្តៅ។

កាល​ព្រលប់​វេលា​ម៉ោង​ប្រហែល ៧ និង​៣០​នាទី​យប់​ថ្ងៃ​ម្សិល​មិញ រថយន្ត​ពន្លត់​អគ្គិភ័យ​ចំនួន​ពីរ​គ្រឿង​ត្រូវ​បាន​គេ​បញ្ជូន​ចេញ​ទៅ​ដើម្បី​ជួយ​ពន្លត់​ការ​ឆេះ​រាល​ដាល​នោះ ប៉ុន្តែ​ក្រុម​ពន្លត់​អគ្គិភ័យ​បាន​បរ​ទៅ​ខុស​គោលដៅ ដោយសារ​ការ​ផ្ដល់​ព័ត៌មាន​មិន​ច្បាស់​លាស់ ហើយ​ក៏​បើក​ត្រឡប់​ទុក​នៅ​កន្លែង​ដើម​វិញ។

លោក​ឧត្តម​សេនីយ៍​ត្រី ស ថេត ស្នងការ​នគរបាល​ខេត្ត​បាត់ដំបង បាន​មាន​ប្រសាសន៍​ថា អាជ្ញាធរ​មិន​មាន​លទ្ធភាព​បញ្ជូន​រថយន្ត​ពន្លត់​អគ្គិភ័យ​នោះ​បាន​ទេ ដោយសារ​មិន​មាន​ផ្លូវ​ចូល ៖ «បើ​យើង​ទៅ​ធ្វើ​ផ្លូវ​គមនាគមន៍​អី​ចូល​ទៅ​វា​មិន​អាច​ថា នឹង​បាន​ងាយ​ស្រួល​ទេ វា​ដូច​ក្នុង​យប់​មិញ​អ៊ីចឹង វា​ពិបាក​អ៊ីចឹង»

ក្រុម​អ្នក​ភូមិ​បាន​ឲ្យ​ដឹង​ថា អណ្តាត​ភ្លើង​បាន​ឆេះ​ឡើង​យ៉ាង​ក្រហម​ឆ្អៅ​កាល​ពី​យប់​មិញ ហើយ​អ្នក​ភូមិ​នៅ​ទី​នោះ​មាន​ការ​ភ័យ​ខ្លាច បាន​នំា​គ្នា​ស្លន់​ស្លោ​រុះ​ជញ្ជាំង​ផ្ទះ​ទម្លាក់ ខ្លះ​ទៀត​បាន​ប្រើ​ម៉ាស៊ីន​បូម​ទឹក​បាញ់​ពន្លត់​អណ្តាត​ភ្លើង​ដែល​ឆេះ​ដល់​ជើង​សសរ ៖ «ភ័យ​ដែរ រុះ​ជញ្ជាំង​ផ្ទះ​អី​ទម្លាក់​អស់​ដែរ ជញ្ជូន​អីវ៉ាន់​ចុះ​ក្រោម ហើយ​ដំបូល​វា​ស័ង្កសី។ តែ​ឆេះ​ផ្ទះ​អស់​ហើយ​សម្បត្តិ​ទ្រព្យ​អី​នោះ»

ក្រុម​អ្នក​ស្រុក​បាន​បន្ត​ថា គ្រោះថ្នាក់​ឆេះ​ព្រៃ​នេះ អណ្តាត​ភ្លើង​បាន​សម្លាប់​សត្វ​ព្រៃ​យ៉ាង​ច្រើន​សន្ធឹក​សន្ធាប់ ដូចជា សត្វ​ពស់ អណ្តើក សត្វ​ស្វា និង​សត្វ​ស្លាប​ជា​ដើម ដែល​រត់​ចេញ​មិន​រួច ៖ «ដល់​រលត់​នាំ​គ្នា​ក៏​ទៅ​ដើរ​រក​មើល​សត្វ​អ៊ីចឹង បាន​របស់​គេ​មែន បាន​ដូច​អណ្ដើក ដូច​ពស់ ជួនកាល​អាច​ស្វា វា​រត់​អត់​រួច»

នេះ​ជា​លើក​ទី​មួយ​ហើយ​ក្នុង​ខេត្ត​បាត់ដំបង​ដែល​មាន​គ្រោះ​អគ្គីភ័យ​ឆេះ​ព្រៃ​អស់​យ៉ាង​ច្រើន​សន្ធឹក​សន្ធាប់​នេះ​ដែល​មិន​ធ្លាប់​មាន​ពី​មុន​មក។ ចំណែក​អាជ្ញាធរ​ខេត្ត​មិន​មាន​លទ្ធភាព​ជួយ​បាន គ្រាន់​តែ​អំពាវ​នាវ​ឲ្យ​ប្រជា​ពលរដ្ឋ​ប្រុង​ប្រយ័ត្ន​តែ​ប៉ុណ្ណោះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល