វេទិកា​ប្រជា​ពល​រដ្ឋ​ស្ដីពី​ការ​ពង្រឹង​ច្បាប់​នៅ​កំពង់ចាម

គ្រឹះស្ថាន​លទ្ធិ​ប្រជាធិបតេយ្យ​សម្រាប់​អភិវឌ្ឍ (DND) គាំទ្រ​ដោយ​អង្គការ​ស្តា​កម្ពុជា (Star Cambodia) បាន​សហ​ការ​បើក​វេទិកា​ប្រជា​ពល​រដ្ឋ​នៅ​ខេត្ត​កំពង់ចាម កាល​ពី​ថ្ងៃ​ទី​២៧ សីហា ដើម្បី​ផ្សព្វ​ផ្សាយ និង​ពង្រឹង​ផ្នែក​ច្បាប់​ចំនួន​៤ ដែល​ពាក់ព័ន្ធ​ជា​ប្រចាំ​ទៅ​នឹង​ការ​រស់​នៅ​ក្នុង​សង្គម។
ដោយ ឱ ភារិទ្ធ
2010-08-28
អ៊ីម៉ែល
មតិ
Share
បោះពុម្ព

លោក ប៊ុន រិទ្ធី នាយក​នៃ​អង្គការ (DND) បាន​ឲ្យ​វិទ្យុ​អាស៊ី​សេរី​ដឹង​ក្រោយ​បញ្ចប់​វេទិកា​ថា ច្បាប់​ដីធ្លី​ស្ដីពី​ភោគៈ​ស្រប​ច្បាប់ ច្បាប់​ទប់​ស្កាត់​បទ​ល្មើស​នេសាទ ច្បាប់​បង្ក្រាប​បទ​ល្មើស​ព្រៃ​ឈើ និង​ច្បាប់​សន្តិសុខ​សង្គម​ស្ដីពី​ចរាចរ​ផ្លូវ​គោក សុទ្ធ​តែ​មាន​ស្រាប់​មក​ហើយ​តែ​បញ្ហា​នៅ​តែ​កើត​មាន​ឡើង ពាក់ព័ន្ធ​ទៅ​នឹង​ច្បាប់​ទាំង​បួន​នេះ។

អ្នក​ស្រី សុវណ្ណ សុវ៉ៃ នៅ​ភូមិ​អូរ​ប្រាំ ឃុំ​ព្រែក​កក់ ស្រុក​ស​ទឹង​ត្រង់ ដែល​ចូល​រួម​ក្នុង​វេទិកា​ប្រជា​ពល​រដ្ឋ នៅ​ថ្ងៃ​ទី​២៧ សីហា ក្នុង​ចំណោម​ប្រជា​ពល​រដ្ឋ​ជាង​១០០​នាក់ បាន​លើក​ពី​បញ្ហា​ការ​ផ្ដល់​ដី​ទៅ​ឲ្យ​ក្រុមហ៊ុន​អភិវឌ្ឍ​ថា​បាន​ធ្វើ​លើ​គំនរ​ទុក្ខ​របស់​ប្រជា​រាស្ត្រ។

តំណាង​ប្រជា​ពល​រដ្ឋ​នៅ​ភូមិ​៣៣ ឃុំ​តា​អុង ស្រុក​ចម្ការ​លើ​បាន​លើក​ឡើង​ពី​ផល​លំបាក​ដូច​គ្នា​ដែរ​ថា ការ​ផ្តល់​ដី​ទៅ​ឲ្យ​ក្រុមហ៊ុន​អភិវឌ្ឍ​ពិត​ជា​មាន​ផល​ពិបាក​ដល់​ប្រជា​ពល​រដ្ឋ ដែល​ទោះ​ជា​មាន​ច្បាប់​ភោគៈ​ចែង​ថា ប្រជា​ពល​រដ្ឋ​មាន​សិទ្ធិ​កាន់​កាប់​ដីធ្លី​លើស​ពី​៥​ឆ្នាំ​មុន​ច្បាប់​ភូមិបាល​ចេញ​ឆ្នាំ​២០០១ ក៏​ដោយ ក៏​បញ្ហា​នេះ​នៅ​តែ​មាន​បញ្ហា​សម្រាប់​រាស្ត្រ​រហូត លោក ម៉ៅ មនី​វណ្ណ តំណាង​រាស្ត្រ​ខេត្ត​កំពង់ចាម​លើក​ឡើង​ក្នុង​វេទិកា​នោះ​ថា ៖ «អ្នក​ដែល​ពុំ​ធ្លាប់​ទទួល​រង​នូវ​បញ្ហា​បែប​នេះ ពិត​ជា​មិន​ដឹង​ថា​ត្រូវ​ទទួល​ការ​ឈឺ​ចាប់​បែប​ណា​ឡើយ»

ពាក់ព័ន្ធ​ទៅ​នឹង​ច្បាប់​ទាំង​បួន​ក្នុង​វេទិកា​នេះ​ដែរ លោក ប៊ុន រិទ្ធី នាយក​នៃ​អង្គការ​គ្រឹះស្ថាន​លទ្ធិ​ប្រជាធិបតេយ្យ​សម្រាប់​អភិវឌ្ឍ​ជាតិ បាន​បញ្ជាក់​ថា​ហាក់​ដូច​ជា​ពុំ​មាន​ចំណុច​ជា​វិជ្ជមាន​ធំ​ដុំ ក្នុង​ការ​ដោះ​ស្រាយ​ទេ ប៉ុន្តែ​លោក​សង្ឃឹម​ថា បញ្ហា​ដែល​បាន​លើក​ឡើង​របស់​ប្រជា​ពល​រដ្ឋ​នឹង​បាន​ជ្រាប​ដល់​ស្ថាប័ន​ជំនាញ សម្រាប់​ធ្វើ​អន្តរាគមន៍​តាម​ច្បាប់ ពិសេស​នឹង​បាន​ជ្រាប​ដល់​ប្រមុខ​រាជ​រដ្ឋាភិបាល​តាម​រយៈ​អ្នក​តំណាង​រាស្ត្រ​ដែល​មក​ចូល​រួម៕

ព័ត៌មាន (0)
Share
គេហទំព័រ​ទាំងមូល