សហគមន៍ខ្មែរនៅស.រ.អា.អង្គាសថវិកាជួយ ពៅ បញ្ញាពេជ្រ
2008.05.17
អតីតតារាចម្រៀង សេក សារីរ័ត្ន កូនប្រសារម្ចាស់ភោជនីយដ្ឋានប៉ៃលិន ទីក្រុងឡូវែល ដែលជាមិត្តភក្ដិរួមអាជីពសិល្បៈរបស់កញ្ញា ពៅ បញ្ញាពេជ្រ និងជាពិធីការិនី នៃពិធីលៀងសាយភោជន៍ផងនោះបានមានប្រសាសន៍កត់សម្គាល់ថា ៖ «បងប្អូនខ្មែរនៅអាមេរិកភាគច្រើនចិត្តទូលាយណាស់ ឲ្យតែកម្មវិធីអីច្បាស់លាស់ពិតជាជួយ ដូចជួយសង្រ្គោះដល់ជនក្រីក្រ ទុរគត ក្មេងកំព្រា ព្រោះខ្ញុំជួបកម្មវិធី Fund Raising ហ្នឹងសឹងតែរៀងរាល់ខែ ។ ខ្ញុំចូលរួមនារាត្រីនេះ ដោយសារ ពៅ បញ្ញាពេជ្រ និងខ្ញុំធ្លាប់រួមអាជីពសិល្បៈជាមួយគ្នាតាំងពីនៅស្រុកខ្មែរ ហើយនាងក៏ជានិស្សិតម្នាក់ដែរ ហើយខ្ញុំក៏ធ្លាប់រៀនមហាវិទ្យាល័យដូចគ្នា ហើយចង់ជួយផ្សព្វផ្សាយឲ្យបងប្អូនខ្មែរយើងនៅនេះ ចូលរួមគាំទ្រ ហើយចំណាយប្រាក់របស់គេផ្ទាល់ហ្នឹង ដើម្បីជួយសង្រ្គោះ បញ្ញាពេជ្រ ។ ...ប្រាក់កាសខ្ញុំមិនច្បាស់ទេ ព្រោះតុខ្លះភ្ញៀវមិនបានអញ្ជើញមក តែគេបានចូលថវិកា ខ្ញុំគិតថា កាត់ខាង Restaurant កាត់ខាងភ្លេងអីហើយ ម៉េចក៏នៅសល់គួរសមសម្រាប់ បញ្ញាពេជ្រ ដែរ» ។
រីឯអតីតអ្នកតំណាងរាស្ត្រស្រុកសំរោង ខេត្តឧត្ដរមានជ័យ គឺលោក ឱក សឿម ដែលបានអញ្ជើញចូលរួមដែរនោះ បានភ្ជាប់ខ្សែទូរស័ព្ទពីកម្មវិធីរៃអង្គាសដែលផ្ដួចផ្ដើមឡើងដោយលោក លី អ៊ី ចាងហ្វាងកាសែតខ្មែរក្រៅប្រទេសឈ្មោះ ពោធិព្រឹក្ស ទៅកាន់មន្ទីរពេទ្យ ដើម្បីផ្ដល់ឱកាសឲ្យ បញ្ញាពេជ្រ បាននិយាយផ្ទាល់ពីមន្ទីរពេទ្យទៅកាន់ភ្ញៀវ ដែលបានចូលរួមនោះ ។
លោក ឱក សឿម បានមានប្រសាសន៍ថា ៖ «ឥឡូវអស់លោកខាងឡូវែលកំពុងតែរៀបចំដើម្បីធ្វើវិភាគទានជូនលុយកាក់ដល់នាង ឥឡូវនាងមានពាក្យផ្ដាំអរគុណដល់បងប្អូន ដែលអញ្ជើញមកយ៉ាងម៉េចខ្លះ ? សូមអញ្ជើញ» ។
កញ្ញា ពៅ បញ្ញាពេជ្រ បានថ្លែងយ៉ាងដូច្នេះ ៖ «ឆ្លៀតក្នុងឱកាសនេះដែរ ខ្ញុំ ពៅ បញ្ញាពេជ្រ សូមថ្លែងអំណរគុណ ដល់បងប្អូន លោកពូ លោកមីង លោកអ៊ុំ ដែលបានចូលរួម ខ្ញុំក៏ថ្លែងអំណរគុណជាមួយនឹងលោក លី អ៊ី ដែលជាម្ចាស់កម្មវិធី ហើយក៏ជាចាងហ្វាងកាសែត ពោធិព្រឹក្ស ជាមួយនឹងលោកព្រឹទ្ធាចារ្យ ឱក សឿម ដែលជាអ្នកត្រួតពិនិត្យនៅក្នុងការងារនេះដែរ ។ ហើយក៏អរគុណដល់បងស្រី សេរីរ័ត្ន ជាពិធីករនៅក្នុងកម្មវិធីនេះ ហើយអរគុណដល់បងប្អូនទាំងអស់...» ។
ព័ត៌មានដាច់ដោយឡែកពីរដ្ឋវ៉ាស៊ីនតោន រដ្ឋភាគខាងលិចប្រទេសអាមេរិក តាមរយៈលោក ខេវិន ក្ដឹប អនុប្រធានសហព័ន្ធខ្មែរអភិវឌ្ឍន៍ ឲ្យដឹងថា សហគមន៍របស់លោក បានធ្វើការរៃអង្គាសនាឱកាសបុណ្យចូលឆ្នាំខ្មែរកន្លងទៅនេះ រួមជាមួយពុទ្ធបរិស័ទវត្ដខេមរារាម និងសប្បុរសជនជាច្រើនរូបទៀត ក៏បានរួមវិភាគទានសរុបចំនួន ១ពាន់ដុល្លារផងដែរ ៕