សកម្មភាពជួញដូរឈើប្រណីតនិងរត់ពន្ធប្រេងឥន្ធនៈឆ្លងដែន
2010.12.09
ក្រុមប្រជាពលរដ្ឋរស់នៅតំបន់ច្រកទ្វារដែនទឹកព្រែកបាក់ដៃ ព្រំដែនកម្ពុជា-វៀតណាម ស្ថិតក្នុងឃុំគោកធ្លក ខេត្តតាកែវ បានឲ្យដឹងថា ក្រុមឈ្មួញបានដឹកឈើប្រណីតប្រភេទគ្រញូងតាមកាណូតឆ្លងទៅលក់ឲ្យឈ្មួញវៀតណាម ដែលមានរយៈពេលជាងកន្លះឆ្នាំមកហើយ ដោយពុំមានការទប់ស្កាត់ពីក្រុមសមត្ថកិច្ចនៅតំបន់ព្រំដែននោះឡើយ។
សេចក្ដីរាយការណ៍ពីប្រជាពលរដ្ឋដែលមានរូបថតជាភស្តុតាង ផ្ញើមកការិយាល័យវិទ្យុអាស៊ីសេរីផងនោះ បានឲ្យដឹងថា ក្រុមសមត្ថកិច្ចប្រចាំច្រកទ្វារព្រំដែន មិនត្រឹមតែមិនបង្ក្រាបករណីជួញដូរឈើប្រណីតខុសច្បាប់ប៉ុណ្ណោះទេ ពួកគេថែមទាំងចាំជួយយាមផ្លូវ ឬបើកផ្លូវឲ្យក្រុមឈ្មួញធំៗដឹកជញ្ជូនឈើទាំងនោះបានងាយស្រួលទៀតផង ៖ «វាឡើងទៅដឹកឈើពីអង្គរមក ដឹកយកមកវៀតណាម ថ្លឹងឲ្យវៀតណាម ដឹករាល់ថ្ងៃ យប់មិញ (៧ ធ្នូ) ឡើងបីទៀត ចុះបីឡើងបី»។
ប្រជាពលរដ្ឋម្នាក់ទៀតដែលសុំមិនបញ្ចេញឈ្មោះ ដោយខ្លាចមានការគំរាមពីសមត្ថកិច្ច បានអធិប្បាយពីសកម្មភាពជួញដូរឈើពីកម្ពុជា ទៅលក់នៅវៀតណាម តាមច្រកព្រំដែនទឹកបាក់ដៃ នោះដែរថា ៖ «មានសមត្ថកិច្ចជួយដើរឆ្គកឲ្យទៀតផង យើងប្រជាពលរដ្ឋបានតែឃើញឈ្មួញធំៗ គេរកស៊ីអ៊ីចឹង ប្រជាជនតូចតាចបានត្រឹមតែឃើញ ដឹងឮដែរ តែមិនដឹងធ្វើម៉េចគេឥឡូវ»។
ប្រជាពលរដ្ឋនៅតំបន់ច្រកបាក់ដៃ បានឲ្យដឹងទៀតថា ក្រៅពីករណីជួញដូរឈើក៏មានករណីរត់ពន្ធប្រេងផងដែរ គឺគេដឹកពីប្រទេសវៀតណាម មកលក់នៅខេត្តតាកែវ កម្ពុជា។
តែទោះជាយ៉ាងនេះក្ដី ក្រុមសមត្ថកិច្ចខាងយោធា និងនគរបាលប្រចាំច្រកទ្វារព្រំដែនកម្ពុជា-វៀតណាម បានច្រានចោលចំពោះសេចក្ដីរាយការណ៍ពីប្រជាពលរដ្ឋខាងលើនេះ។
នាយទាហានសឹករងខេត្តតាកែវ លោក ជ្រែ ហុច មានប្រសាសន៍ថា ច្រកទ្វារព្រំដែនក្នុងស្រុកបុរីជលសា ឬច្រកក្នុងស្រុកអង្គរបុរីក្តី ក្នុងខេត្តតាកែវ ងាយគ្រប់គ្រង ដូច្នេះពុំមានករណីជួញដូឈើប្រណីត ឬរត់ពន្ធប្រេងនោះទេ។
លោក ជ្រែ ហុច មានប្រសាសន៍បន្ថែម ៖ «ច្រកយើងនេះម៉េចត្រូវមករួច អ្នកធ្វើការខាងចាំបង្ក្រាបបទល្មើសឈើអីហ្នឹងចាំតែមើលតើ! ឲ្យតែមានបង្ក្រាបគ្រឹបឥឡូវ»។
រដ្ឋាភិបាលកម្ពុជា ក្នុងរយៈពេលប្រមាណជិតមួយឆ្នាំមកនេះ បានដាក់វិធានការក្ដៅលើការបង្ក្រាបបទល្មើសព្រៃឈើ រហូតមានការផ្លាស់ប្ដូរតួនាទីមេរដ្ឋបាលព្រៃឈើ លោក ទី សុគន្ធ ទៀតផង ប៉ុន្តែគេឃើញនៅតែមានសេចក្ដីរាយការណ៍ពីតំបន់នានា ក្នុងប្រទេសកម្ពុជា ស្ដីពីបទល្មើសព្រៃឈើ ការជួញដូរឈើប្រណីតទៅក្រៅប្រទេសនៅតែកើតមានជាបន្តបន្ទាប់៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ