Global Witness សរសើរវិធានការរក្សាខ្សាច់របស់នាយករដ្ឋមន្ត្រីខ្មែរ
2009.05.13
កប៉ាល់បូមខ្សាច់នៅតាមដងទន្លេមេគង្គ ក្នុងខេត្តកណ្ដាល។
សេចក្តីថ្លែងការណ៍បានធ្វើឡើងក្រោយការមន្ត្រីរដ្ឋាភិបាលបានចេញសេចក្តីសម្រេចចិត្តមួយកាលពីថ្ងៃសុក្រ ទី៨ ឧសភាសប្តាហ៍មុន។
សេចក្តីសម្រេចរបស់រដ្ឋាភិបាលគឺបានបញ្ឈប់ការនាំខ្សាច់ចេញក្រៅប្រទេសនិងការបូមខ្សាច់នៅតាមតំបន់សមុទ្រនិងបឹងទន្លេ បើសិនណាជាមានការសិក្សាទៅឃើញថា ការបូមនោះនឹងអាចមានផលប៉ះពាល់ដល់សុវត្ថិភាពបរិស្ថាននិងការរស់នៅរបស់ប្រជាជន។
លោកស្រី Amy Barry អ្នកនាំពាក្យអង្គការ Global Witness បានថ្លែងកាលពីថ្ងៃអង្គារពីទីក្រុងឡុងដ្រ៍ ប្រទេសអង់គ្លេស ចាត់ទុកថា សេចក្តីសម្រេចរបស់លោកនាយករដ្ឋមន្ត្រីខ្មែរ ហ៊ុន សែន ចំពោះវិធានការរក្សាខ្សាច់នៅកម្ពុជានោះ គឺជាអំពើដ៏ត្រឹមត្រូវ ៖ «Global Witness មានក្ដីរីករាយយ៉ាងខ្លាំង ដែលបានឃើញរដ្ឋាភិបាលកម្ពុជា ឆ្លើយតបចំពោះក្ដីកង្វល់ដែលយើងនិងអង្គការដទៃទៀត បានលើកឡើងទាក់ទងនឹងការបំផ្លាញបរិស្ថានដែលបណ្ដាលមកពីការបូមនិងការលក់ដូរខ្សាច់នេះ។ អង្គការ Global Witness សូមស្វាគមន៍ចំពោះគំនិតផ្ដួចផ្ដើមរបស់លោកនាយករដ្ឋមន្រ្តី ដែលបានចេញបម្រាមនេះ ដែលយើងគិតថាជាជំហានដំបូងមួយឆ្ពោះទៅកាន់ការអភិបាលបរិស្ថាននិងធនធានធម្មជាតិប្រកបដោយចិរភាពមួយសម្រាប់កម្ពុជា»។
អង្គការ Global Witness នៅបានសរសេរស្នើទៅរដ្ឋាភិបាលសុំកុំឲ្យផ្តល់សម្បទានដែលគ្មានតម្លាភាពចំពោះការជីករកប្រេងនៅលើតំបន់ដីគោកនិងការជីករុករករ៉ែនៅក្នុងតំបន់ដែលមានសារសំខាន់ខ្លាំងចំពោះបរិស្ថាន។
អ្នកនាំពាក្យអង្គការ Global Witness ដដែល បានមានប្រសាសន៍បញ្ជាក់យ៉ាងនេះថា ៖ «យើងបានរំលេចបញ្ហាបូមខ្សាច់លក់នេះ ក្នុងរបាយការណ៍របស់យើងថាជាការប្រើប្រាស់ធនធានធម្មជាតិ ចម្រាញ់យកផលប្រយោជន៍មួយដ៏មិនត្រឹមត្រូវ ហើយអំពើនេះធ្វើឲ្យពលរដ្ឋខ្មែរក្រីក្របាត់សិទ្ធិទទួលផលពីធនធានធម្មជាតិ ដែលប្រទេសជាតិខ្លួនមាននោះ។ ឆ្លៀតឱកាសនេះ យើងសូមអំពាវនាវឲ្យរដ្ឋាភិបាលកម្ពុជាយករឿងបូមខ្សាច់លក់នេះជាគំរូគេក្នុងការបែងចែកធនធានដទៃទៀតរបស់ប្រទេសជាតិប្រកបដោយតម្លាភាព ដូចជាការធ្វើសម្បទានព្រៃឈើ រ៉ែធម្មជាតិ ដូចជាប្រេងឧស្ម័នជាដើម ឲ្យបានជាប្រយោជន៍ដល់ជនជាតិខ្មែរជាម្ចាស់ស្រុកទាំងអស់ មិនមែនសម្រាប់តែមនុស្សមួយក្ដាប់តូចនោះឡើយ»។
មន្ត្រីរាជរដ្ឋាភិបាលនៅមិនទាន់មានប្រតិកម្មចំពោះសេចក្តីថ្លែងការណ៍នេះនៅឡើយទេ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ