មុខរបរជាងទងជួបការលំបាកដោយសារបញ្ហាទំនិញឡើងថ្លៃ
2008.08.21
ដោយសារមូលហេតុនេះទើបនៅក្នុងភូមិកោះចិន ឃុំកោះចិន ស្រុកពញាឮ ខេត្តកណ្ដាល ដែលជាភូមិមួយកាលពីប៉ុន្មានឆ្នាំមុនគេធ្លាប់តែឮសូរសំឡេងដំឆ្លាក់របស់ជាងទងជាប់មិនដាច់ ដូចជាឆ្លាក់ផ្តិល ជើងពាន តូចធំ និងវត្ថុផ្សេងៗទៀតជាច្រើនមុខនោះ ក៏ស្រាប់តែមកដល់ពេលនេះនៅក្នុងភូមិកោះចិន ហាក់មានសភាពស្ងាត់ជ្រងំមិនសូវឃើញមានសកម្មភាពដំឆ្លាក់ប៉ុន្មានដែរទេ ។
បុរសជាងទងមួយរូបឈ្មោះ ពិន វុឌ្ឍី ដែលកំពុងអង្គុយដុសខាត់កងដៃធ្វើពីស្ពាន់នៅខាងក្រោមផ្ទះរបស់គាត់នៅភូមិកោះចិន បានបញ្ជាក់ប្រាប់អ្នកយកព័ត៌មានវិទ្យុអាស៊ីសេរីដែលបានចុះផ្ទាល់ដល់ទីនោះថា អ្នកធ្វើជាងទងផ្នែកឆ្លាក់គ្រឿងស្ពាន់នៅក្នុងភូមិនេះ គឺនៅសល់ប្រមាណតែ៤ទៅ៥គ្រួសារប៉ុណ្ណោះដោយរួមទាំងគ្រួសាររបស់គាត់ផង ក្រៅពីនេះគេបានទម្លាក់ការងារជាងទងនោះចោលពីព្រោះតែបានកម្រៃមិនអាចចិញ្ចឹមគ្រួសារបាននោះ ។
បុរសជាងទងរូបនោះបានបន្តថា សម្រាប់គ្រួសារជាងទងរបស់គាត់ក៏កំពុងតែប្រឈមមុខនឹងការបាត់បង់មុខរបរនេះដែរនៅពេលខាងមុខ ពីព្រោះវត្ថុធាតុដើមរួមមានទង់ដែងនិងស្ពាន់ជាដើមនោះគឺកំពុងតែបន្តការឡើងថ្លៃខ្ពស់ឥតឈប់ឈរ ។
លោក ពិន វុឌ្ឍី បានឲ្យដឹងថា ៖ «តម្លៃមុនមួយគីឡូក្រាមវា១៥ដុល្លារអ៊ីចឹង ។ ឥឡូវឡើងមួយគីឡូ៣០អី ហើយយើងធ្វើបានតាម តម្លៃមុន យើងអត់ចំណេញ គ្រាន់តែទប់ទល់សេដ្ឋកិច្ចគ្រួសារបាន» ។
ស្ត្រីអ្នកជាងទងមួយរូបទៀតបានបញ្ជាក់ប្រាប់ពីបញ្ហានេះដែរថា ការឡើងថ្លៃវត្ថុធាតុដើមបានធ្វើឲ្យប៉ះពាល់ដល់មុខរបររបស់គាត់ខ្លាំងណាស់ ៖ «រាល់ឆ្នាំមុនៗមកគ្រាន់បានចំណេញខ្លះ ដល់ពេលឥឡូវហ្នឹងទើបឡើង អត់សូវបានទេ សឹងថាអត់តែម្ដង» ។
ក្រៅពីការត្អូញត្អែរប្រាប់របស់ជាងទងនៅភូមិកោះចិន ឃុំកោះចិន ស្រុកពញាឮ ខេត្តកណ្ដាល អំពីការឡើងថ្លៃទំនិញនិងវត្ថុធាតុដើម មានស្ពាន់ ទង់ដែង សម្រាប់ផលិតជាគ្រឿងប្រើប្រាស់ផ្សេងៗដែលធ្វើឲ្យប៉ះពាល់ដល់ការរកស៊ីចិញ្ចឹមជីវិតនោះ គេក៏ឃើញមានបញ្ហានេះកើតឡើងដូចគ្នាដែរចំពោះជាងទងមួយចំនួននៅឯភូមិត្រពាំងឈូក ឃុំសុភី ស្រុកបាទី ខេត្តតាកែវ ។
នៅក្នុងចំណោមជាងទងនៅតំបន់នោះបុរសមួយរូបឈ្មោះ ម៉ិល មេត បានប្រាប់ឲ្យដឹងថាការផលិតគ្រឿងស្ពាន់របស់គាត់សព្វថ្ងៃនេះ មានដូចជាផ្តិល មានជើងទម្រ ជើងពានជាដើម គឺលក់មិនបានចំណេញច្រើនទេ ដែលខុសពីកាលពីប៉ុន្មានឆ្នាំមុនគឺមានការងាយស្រួល ដោយគ្រាន់តែចំណាយដើមទុនតិចតួចក្នុងផ្តិលមួយប្រមាណតែ៤ម៉ឺនរៀលប៉ុណ្ណោះ គឺគាត់អាចទទួលបានប្រាក់ចំណេញមកវិញជាងពាក់កណ្ដាល ដែលជួយផ្គត់ផ្គង់ជីវភាពគ្រួសារគាត់បានធូរធារ ។
បុរសដដែលនោះបានបន្តថា មកដល់ពេលនេះគាត់បានដំឡើងថ្លៃផ្តិលដល់ទៅជិត២០ម៉ឺនរៀលហើយក៏នៅតែទប់មិនឈ្នះនឹងការឡើងថ្លៃទំនិញនិងវត្ថុធាតុដើមស្ពាន់ដែរ ៖ «អីវ៉ាន់ឡើងពេក ឡើងហួសពីការស្មាន» ។
បញ្ជាក់ប្រាប់ពីបញ្ហានេះដែរប្រធានសមាគមសេដ្ឋកិច្ចកម្ពុជា លោក ច័ន្ទ សុផល បានមានប្រសាសន៍ថាបញ្ហាទំនិញឡើងថ្លៃ សព្វថ្ងៃគឺពិតជាធ្វើឲ្យប៉ះពាល់ដល់ជីវភាពរស់នៅរបស់ប្រជាពលរដ្ឋជនបទតូចតាចដែលមានប្រាក់ចំណូលទាប ។
លោកបានបន្តថាចំពោះប្រជាពលរដ្ឋដូចជាជាងទងឆ្លាក់គ្រឿងស្ពាន់នោះជាដើម លោកមិនដឹងថាតើគេអាចរកចំណូលបានប៉ុន្មានសម្រាប់សេដ្ឋកិច្ចគ្រួសារគេនោះទេ ប៉ុន្តែបើតាមការយល់ឃើញរបស់លោក គឺថាសម្រាប់វត្ថុនេះគឺពិតជាពិបាកក្នុងការលក់ដូរ ពីព្រោះមិនមែនជាវត្ថុត្រូវការចាំបាច់ដូចជាម្ហូបអាហារប្រចាំថ្ងៃនោះឡើយ ដូច្នេះបើមានការឡើងថ្លៃវត្ថុធាតុដើមគឺអ្នកជាងទងនឹងមានស្ថានភាពរស់នៅលំបាកដែលចាំបាច់ត្រូវទាមទារឲ្យមានការជួយពីរាជរដ្ឋាភិបាល ឬមួយអ្នកភូមិខ្លួនឯងធ្វើការផ្លាស់ប្តូរមុខរបរទើបអាចដោះស្រាយបញ្ហាបានខ្លះ ។
ទាក់ទងនឹងការលើកឡើងខាងលើនេះអគ្គលេខាធិការគណៈកម្មការជាតិជំរុញចលនាភូមិមួយ ផលិតផលមួយ លោក ស៊ុន គន្ធ បានមានប្រសាសន៍ថាកន្លងមករាជរដ្ឋាភិបាលបានជួយដោះស្រាយដល់ការប្រកបមុខរបរតូចតាចរបស់ប្រជាពលរដ្ឋតាមជនបទដោយមានបង្កើតកម្មវិធី ភូមិមួយ ផលិតផលមួយ ដើម្បីជួយឲ្យអ្នកភូមិទាំងនោះដែលផលិតបាននូវផលិតផលរបស់ខ្លួនអាចមានទីផ្សារលក់បានថ្លៃសម្រាប់ផ្គត់ផ្គង់ជីវភាព ។
លោកបានបន្តទៀតថាភូមិមួយផលិតផលមួយនោះរួមមានផលិតផលកសិកម្មផ្នែកតម្បាញសូត្រ សិប្បកម្មដូចជាគ្រឿងចម្លាក់ប្រាក់ស្ពាន់ ។ល។ ហើយរាជរដ្ឋាភិបាលបានជួយជាជំហានដំបូងគឺឲ្យគេដាក់លក់ក្នុងស្រុកមានដូចជាលក់នៅទីផ្សាររាត្រីជាដើម ។
លោក ស៊ុន គន្ធ បានមានប្រសាសន៍ថា ៖ «ជាច្រើនដងយើងបានផ្សព្វផ្សាយអំពីការផលិតផលិតផលយើងឲ្យបានគុណភាពល្អ ហើយមានកម្រិតខ្ពស់ដើម្បីលក់ទៅបានថ្លៃ ហើយបានគេទិញច្រើន ។ ដូចជាថ្មនៅពោធិ៍សាត់ ធ្វើសិប្បកម្ម ចម្លាក់ប្រាក់ បានណែនាំរបៀបម៉េចៗ ។ គេបានសង់ស្តង់មួយ គំរូមួយសម្រាប់នាំភ្ញៀវមកទិញ ។ នៅផ្សាររាត្រីក៏យើងបានណែនាំដែរ ដាក់ស្តង់មួយដែលសុំឲ្យក្រុមហ៊ុនទារតម្លៃមួយថ្ងៃតែ ៣ ឬ ៥ដុល្លារប៉ុណ្ណោះ សមាជិកភូមិវប្បធម៌មួយ ។ ហ្នឹងយើងជំរុញហើយ» ។
អគ្គលេខាធិការគណៈកម្មការជាតិជំរុញចលនាភូមិមួយផលិតផលមួយ បានបញ្ជាក់ទៀតដែរថាមកដល់ពេលនេះកម្មវិធីភូមិមួយផលិតផលនិងបន្តធ្វើទៅមុខទៀត ហើយទាក់ទងនឹងជាងទងគ្រឿងចម្លាក់ប្រាក់ស្ពាន់នោះ គឺមន្រ្តីរាជរដ្ឋាភិបាលដែលមានការងារផ្នែកនេះនិងចុះសិក្សាស្រាវជ្រាវបន្ថែមទៀតនៅមូលដ្ឋានណាដែលមិនទាន់បានធ្វើ ។ រីឯចំពោះបញ្ហាការឡើងថ្លៃវត្ថុធាតុដើមនោះ លោកបានបញ្ជាក់ថាមិនជាចោទប៉ុន្មានទេកក្ដាសំខាន់ គឺអ្នកផលិតត្រូវខិតខំផលិតរបស់របរនោះឲ្យមានគុណភាពល្អហើយបានច្រើន ពីព្រោះបើមានគុណភាពល្អនោះគេអាចលក់បានថ្លៃទៅតាមនោះដែរ ។
ប្រជាពលរដ្ឋអ្នកប្រកបមុខរបរជាងទងផ្នែកចម្លាក់គ្រឿងស្ពាន់និងប្រាក់ នៅក្នុងខេត្តកណ្ដាលនិងខេត្តតាកែវ បានបញ្ជាក់ប្រាប់ដែរថាផលិតផលរបស់គេជាទូទៅភាគច្រើនគេបានធ្វើការសម្រិតសម្រាំងស្នាដៃដែរ ប៉ុន្តែអ្នកទិញច្រើនតែចង់បានតម្លៃថោក ឯវត្ថុធាតុដើមដែលគេទិញមកឡើងថ្លៃជាបន្តបន្ទាប់ឥតឈប់ ។
ប្រជាពលរដ្ឋទាំងនោះបានបន្ថែមថា គេចង់ឲ្យរាជរដ្ឋាភិបាលជួយធ្វើយ៉ាងណាជួយឲ្យទំនិញទីផ្សារចុះថ្លៃ មានដូចជាគ្រឿស្ពាន់ ប្រាក់ ឬក៏ឧស ប្រេងសាំងជាដើម បើមិនដូច្នោះពួកគាត់ជឿជាក់ថា មុខរបរជាងទងចម្លាក់ស្ពាន់នៅក្នុងខេត្តទាំងពីរនេះប្រាកដជាឈានទៅរកការបាត់បង់នៅពេលដ៏ខ្លីខាងមុខ ដែលនឹងធ្វើឲ្យប៉ះពាល់ដល់ជីវភាពរស់នៅរបស់គេ ពីព្រោះតែការផលិតមិនបានប្រាក់ចំណេញ ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ