មន្ត្រីសិទ្ធិមនុស្សស៊ើបអង្កេតរោងចក្រកែច្នៃដែលប៉ះពាល់សុខភាពពលរដ្ឋ
2010.03.20
១៩-មីនា-២០១០: រោងចក្រកែច្នៃកម្ទេចអាគុយចាស់ៗយកសំណ ស្ថិតនៅឃុំរូង ស្រុកមេមត់ ខេត្តកំពង់ចាម
លោក នាង សាវ៉ាត មន្ត្រីសិទ្ធិមនុស្សនៃសមាគមអាដហុក បានអះអាងតាមពិនិត្យឃើញរបស់លោកថា រោងចក្រនេះមានការប៉ះពាល់ដល់សុខភាពប្រជាពលរដ្ឋ ព្រោះចំហាយរបស់វាអាចធ្វើឲ្យឈ្លក់ពេលគេរំលាយយកសំណដែលមានប្រតិកម្មជាមួយនឹងអាស៊ីដយូរហើយ។
លោក នាង សាវ៉ាត មានប្រសាសន៍ថា ៖ «ក្រុមហ៊ុននេះយើងមើលទៅឃើញថា វាប៉ះពាល់ខ្លាំងដល់ជីវភាពរបស់ប្រជាពលរដ្ឋ ព្រោះនៅពេលដែលគេដុតអាគុយចាស់ដើម្បីយកសំណ វាមានប្រតិកម្មជាមួយអាស៊ីដយូរមកហើយ ហើយនៅពេលដែលដុតទៅផ្សែងវាប៉ះពាល់ដល់សុខភាពពលរដ្ឋ។ រយៈពេលមួយឆ្នាំដែលក្រុមហ៊ុននេះបើកហើយ យើងគិតថា ប្រជាពលរដ្ឋដែលរងគ្រោះនោះវារាប់រយរាប់ពាន់នាក់។ យើងនឹងធ្វើការស៊ើបអង្កេតមួយទៅដល់ក្រុមហ៊ុនហ្នឹង ដើម្បីឲ្យប្រជាពលរដ្ឋលោកបានទៅមើលសុខភាព ហើយបើសិនជាមានប៉ះពាល់ដល់សុខភាព យើងនឹងប្ដឹងឲ្យក្រុមហ៊ុននេះសងសុខភាពពលរដ្ឋនៅទីនោះផង»។
ប្រជាពលរដ្ឋឲ្យដឹងថា រោងចក្រនោះសង់នៅចម្ងាយប្រមាណ ៨០០ម៉ែត្រពីព្រំដែនវៀតណាម ដែលពេលគេរំលាយយកសំណម្ដងៗតែងធ្វើឲ្យមានការពិបាកក្នុងខ្លួនស្ទើរទ្រាំមិនបាន ៖ «ចង់ឲ្យបិទចោលបានប្រជាជនរស់នៅបាន បើថា មិនបិទរស់នៅអត់បានទេ។ សុខភាពយើងវាកណ្ដាស់ ក្អក ក្រហល់ក្រហាយ វាជាតិអាស៊ីដចំហាយតាមខ្យល់។ មានរងគ្រោះដល់ដេកពេទ្យខ្លះហើយ។ រោងចក្រហ្នឹងជារបស់យួន ខ្មែរយើងអ្នកឈរ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺពីតំណាងរោងចក្រកែច្នៃបាននៅឡើយទេ។
លោក គង់ សំអាង តំណាងក្រុមប្រឹក្សាស្រុកមេមត់ បានចុះពិនិត្យផ្ទាល់បន្ទាប់ពីទទួលបានដំណឹងពីប្រជាពលរដ្ឋ ដោយលោកបញ្ជាក់ថា លោកបានធ្វើការស៊ើបអង្កេតនិងសាកសួរព័ត៌មានគ្រប់គ្រាន់ ហើយលោកនឹងអន្តរាគមន៍ឲ្យមានការប្រជុំក្រុមប្រឹក្សាដើម្បីរកមធ្យោបាយជួយប្រជាពលរដ្ឋ។
លោក គង់ សំអាង បានឲ្យដឹងដូច្នេះ ៖ «សំបកអាគុយគរ ហើយម៉ាស៊ីនកំពុងបញ្ឆេះបង្ហុយហ្នឹង សួរទៅគេថា កន្លែងហ្នឹងកន្លែងគេចម្រាញ់ គេគាបយកសំណចេញទៅស្រុកយួន ព្រោះនៅខាងយួនគេសុំច្បាប់រំលាយហ្នឹងអត់បាន អ៊ីចឹងហើយគេមកធ្វើនៅស្រុកខ្មែរហ្នឹង។ ប្រជាពលរដ្ឋឲ្យព័ត៌មានបន្ថែមទៀតថា គាត់ទទួលរងផលប៉ះពាល់ពីចំហាយជាតិអាស៊ីដដែលគេចម្រាញ់ចេញហ្នឹង វាភាយមួយសាៗធ្វើឲ្យគាត់ក្អក កណ្ដាស់ ផ្សាភ្នែកអី។ បានព័ត៌មានហ្នឹង ខ្ញុំនឹងជម្រាបបញ្ហាហ្នឹងទៅខាងក្រុមប្រឹក្សាដើម្បីឲ្យគេជួយដោះស្រាយរឿងហ្នឹង»។
ប្រជាពលរដ្ឋបានឲ្យដឹងថា ពួកគេកំពុងផ្ដិតមេដៃលើពាក្យបណ្ដឹងតវាសុំឲ្យគេបិទរោងចក្រនោះ ដើម្បីដាក់ជូនមេឃុំ និងបន្តទៅថ្នាក់លើក្នុងការការពារសុខភាព ដែលក្នុងនោះមន្ត្រីសិទ្ធិមនុស្សក៏បានអះអាងដែរថា នឹងជួយស្រាវជ្រាវរកអាជ្ញាប័ណ្ណនៃការផ្ដល់ឲ្យបើករោងចក្រនោះថា តើមានការធានាលើបរិស្ថាននិងធានាដល់សុខភាពប្រជាពលរដ្ឋដែរឬទេ?៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ