លោក ហ៊ុន សែន ប្រកាសធ្វើនាយករដ្ឋមន្ត្រីអស់មួយជីវិត
2011.04.04
ជាថ្មីម្ដងទៀត លោកនាយករដ្ឋមន្ត្រី ហ៊ុន សែន បានប្រកាសជាសាធារណៈយ៉ាងឱឡារិកថា លោកនឹងនៅកាន់អំណាចរហូតជាបន្តទៀតដោយគ្មានថ្ងៃកំណត់ បើសិនជាគណបក្សប្រជាជននៅតែគាំទ្រលោកជាបេក្ខភាពនាយករដ្ឋមន្ត្រី ហើយបើប្រជាជនខ្មែរនៅតែបោះឆ្នោតគាំទ្រគណបក្សប្រជាជនបន្តទៅទៀត។
ថ្លែងនៅក្នុងពិធីសម្ពោធវិទ្យាល័យមួយកន្លែងនៅព្រែកតាមាក់ ក្នុងស្រុកខ្សាច់កណ្ដាល ខេត្តកណ្ដាល នៅថ្ងៃទី៤ មេសា លោកនាយករដ្ឋមន្ត្រីបញ្ជាក់ថា ៖ «ខ្ញុំព្រះករុណាខ្ញុំនឹងបន្តនៅក្នុងរយៈពេលខាងមុខនេះ ដែលមិនមានកាលកំណត់ជាក់លាក់ថា ពេលណានឹងដកខ្លួនចេញ។ បញ្ហាធំបំផុតគឺប្រជាជនបោះឆ្នោតឲ្យ ឬក៏អត់តែប៉ុណ្ណឹងទេ រឿងតែប៉ុណ្ណឹងទេ! ហើយកុំនិយាយរឿងយូររឿងឆាប់ រឿងអីនៅឯណាឯនោះ រឿងបញ្ហានៅកម្ពុជា បញ្ហា ៥ឆ្នាំបោះឆ្នោតម្ដង បើគណបក្សនៅតែគាំទ្រ ប្រជាជននៅតែបោះឆ្នោត ខ្ញុំព្រះករុណាខ្ញុំនឹងខិតខំធ្វើ»។
លោក ហ៊ុន សែន ថ្លែងថា ស្ថានភាពនយោបាយនៅប្រទេសកម្ពុជា ខុសពីដំណើរការនយោបាយនៅប្រទេសលោកខាងលិច ដែលកំណត់អាណត្តិនាយករដ្ឋមន្ត្រី ៖ «មានអាមកស្អីដាក់លក្ខខណ្ឌអាណត្តិ ២អាណត្តិ ៣អាណត្តិ ទេ! លោកដាក់លក្ខខណ្ឌដាក់ខ្លួនឯងអីទៅ ធើប្រធានបក្ស៣អាណត្តិ ៤អាណត្តិ លោកឯងធ្វើអីធ្វើទៅ។ ប្រធានបក្សខ្ញុំ ទោះបីគាត់ចាស់យ៉ាងម៉េច គាត់ទន់យ៉ាងម៉េច នៅតែប្រធានបក្សតែអ៊ីចឹង ប្រធានកិត្តិយសនៅតែប្រធានកិត្តិយស អត់មានដោះដូរទេ អ្នកឯងចង់មកដាក់ system (ប្រព័ន្ធ) ធ្វើទៅ ស្រេចលោកឯង តែនៅស្រុកខ្មែរជារឿងស្រុកខ្មែរ មួយៗឡើងទៅសុំកំណត់អាណត្តិ។ ទេ! ប្រកាច់ខ្មោចយកអី!»។
ការថ្លែងអះអាងរបស់លោកនាយករដ្ឋមន្ត្រី មិនបានបញ្ជាក់ចំឈ្មោះអ្នកនយោបាយខ្មែរដែលបានទាមទារឲ្យមានការកំណត់អាណត្តិនាយករដ្ឋមន្ត្រី និងកំណត់អាណត្តិប្រធានបក្សនោះទេ។ ក៏ប៉ុន្តែអ្នកវិភាគនយោបាយខ្មែរខ្លះយល់ថា លោក ហ៊ុន សែន មានប្រសាសន៍សំដៅទៅមេដឹកនាំបក្សប្រឆាំង ជាពិសេសទៅលើលោក កឹម សុខា ប្រធានគណបក្សនយោបាយសិទ្ធិមនុស្សដែលទើបចូលប្រឡូកនយោបាយថ្មីៗ នឹងកំពុងមានប្រជាប្រិយភាពនាពេលបច្ចប្បន្ន។
កន្លងមក លោក កឹម សុខា តែងតែបានប្រកាសជាញឹកញាប់នៅតាមវេទិកាសាធារណៈធ្វើឡើងនៅតាមខេត្តនានាថា បើរូបលោកឈ្នះឆ្នោតជានាយករដ្ឋមន្ត្រី លោកនឹងកំណត់អាណត្តិនាយករដ្ឋមន្ត្រីត្រឹមតែពីរអាណត្តិប៉ុណ្ណោះ ដើម្បីទុកឱកាសឲ្យអ្នមានសមត្ថភាពផ្សេងទៀតដឹកនាំប្រទេស ឲ្យបានជឿនលឿន ព្រោះលោកយល់ថា ការដឹកនាំប្រទេសអស់មួយជីវិត ច្រើនតែធ្វើឲ្យប្រទេសជាតិមិនរីកចម្រើន ហើយមេដឹកនាំច្រើនតែប្រើអំណាចផ្ដាច់ការ ប្រព្រឹត្តអំពើពុករលួយ បក្សពួកនិយម និងធ្វើឲ្យប្រជាជនក្រតោយាក។
លោក កឹម សុខា ដែលតែងរិះគន់រដ្ឋាភិបាលមិនសំចៃមាត់នោះ ក៏ធ្លាប់បានរិះគន់បក្សនយោបាយផ្សេងទៀតដែរ ចំពោះការលោភលន់កាន់អំណាចមួយជីវិត ដូចជាលោកបានរិះគន់ ព្រះអង្គម្ចាស់ នរោត្តម រណឫទ្ធិ អតីតប្រធានបក្សហ៊្វុនស៊ិនប៉ិចថា ជាព្រះប្រធានបក្សអស់មួយជីវិត ហើយលោកក៏បានរិះគន់ លោក សម រង្ស៊ី ប្រធានគណបក្ស សម រង្ស៊ី ដែលគេដឹងថា ជាបក្សប្រកាន់លទ្ធិប្រជាធិបតេយ្យដែរនោះ ក៏មេបក្សចង់កាន់អំណាចជាមេបក្សអស់មួយជីវិតដែរ។
នេះមិនមែនជាលើកទីមួយទេដែលលោកនាយករដ្ឋមន្ត្រី បានប្រកាសកាន់អំណាចយូរអស់មួយជីវិតដូច្នេះ។
ទាក់ទងការប្រកាសជាថ្មីរបស់លោកនាយករដ្ឋមន្ត្រីនេះ លោក យឹម សុវណ្ណ បានគាំទ្រជំហរលោកនាយករដ្ឋមន្ត្រីចំពោះមេបក្សដែលអាចកាន់អំណាចអស់មួយជីវិត ក៏ប៉ុន្តែលោកមិនគាំទ្រទេចំពោះអាណត្តិនាយករដ្ឋមន្ត្រីកាន់អំណាចអស់មួយជីវិត ដោយលោកជឿថា ការកាន់អំណាចដុះស្នឹមដូច្នេះ វាអាចធ្វើឲ្យមេដឹកនាំកាន់អំណាចផ្ដាច់ការ និងបង្កើតឲ្យមានអំពើពុករលួយ និងបក្សពួកនិយម ប្រទេសជាតិមិនជឿនលឿន។
អ្នកវិភាគនយោបាយខ្មែរខ្លះមិនបានភ្ញាក់ផ្អើលទេចំពោះការប្រកាសកាន់អំណាចអស់មួយជីវិតរបស់លោកនាយករដ្ឋមន្ត្រី ហ៊ុន សែន ដោយបានអះអាងថា ប្រវត្តិសាស្ត្រ និងវប្បធម៌ប្រពៃណីខ្មែរកន្លងមក មេដឹកនាំគ្រប់ៗជំនាន់តែងតែក្រាញនឹងអំណាចដូចៗគ្នា ដូចជាមេដឹកនាំខ្មែរសម័យបុរាណបានទៅពឹងបរទេសឲ្យជួយវាយគ្នាឯងដណ្ដើមអំណាច រួចហើយបរទេសបាននាំគ្នាកាត់ដីយកជាថ្នូរជំនួយបរទេសជាដើម។
សតវត្សក្រោយៗមកទៀត ដោយបានលើកជាឧទាហរណ៍ ដូចជានៅឆ្នាំ១៩៧០ សម្ដេចព្រះនរោត្តម សីហនុ ត្រូវបានលោកសេនាប្រមុខ លន់ នល់ ធ្វើរដ្ឋប្រហារទម្លាក់ពីអំណាច។ លោក លន់ នល់ បានឡើងកាន់អំណាចដោយប្រើកម្លាំងទ័ពមិនបាន ៥ឆ្នាំ ស្រួលបួលផង ត្រូវចាញ់សង្គ្រាមពួកខ្មែរក្រហម ប៉ុល ពត នៅឆ្នាំ១៩៧៥ទៀត ហើយ ប៉ុល ពត ក៏ត្រូវបានកងទ័ពវៀតណាម វាយរំលំចេញពីអំណាចយ៉ាងតក់ក្រហល់ នៅឆ្នាំ១៩៧៩ បន្តទៀត។ ការប្រើកម្លាំងយោធាវាយគ្នាចុះឡើងដើម្បីអំណាច បានបន្តរហូតមកដល់ឆ្នាំ១៩៩៧ ដែលអ្នកវិភាគនយោបាយខ្មែរ ថ្លែងថា រឿងនេះគឺព្រោះតែដោយសារមេដឹកនាំម្នាក់ៗចង់កាន់អំណាចតែឯង។
ក៏លោក ហង្ស ពុទ្ធា ទីប្រឹក្សាគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា មានប្រសាសន៍បន្ថែមថា បើទោះបីជាអតីតមេដឹកនាំខ្មែរកន្លងមកចង់កាន់អំណាចតែម្នាក់ឯងយ៉ាងណាក្ដី ក៏មានអ្នកដឹកនាំភាគច្រើនមានឆន្ទៈស្នេហាជាតិ ស្រឡាញ់ប្រជាជនដែរ ៖ «ខ្ញុំចង់និយាយថា ប្រវត្តិសាស្ត្រកម្ពុជា បើកាន់អំណាចហើយត្រូវព្យាយាមការពារឲ្យបានល្អ ហើយល្អហ្នឹង គឺទាមទារឲ្យមានការគាំទ្រពីប្រជាពលរដ្ឋ ប្រសិនបើប្រជាពលរដ្ឋមានការគាំទ្របន្តមិនបញ្ហាទេ តែបើសិនជាប្រជាពលរដ្ឋមិនគាំទ្រ វាក៏ជាបញ្ហាមួយដែរក្នុងសង្គមខ្មែរ»។
លោកនាយករដ្ឋមន្ត្រី ហ៊ុន សែន បានកាន់អំណាចជានាយករដ្ឋមន្ត្រី ២៦ឆ្នាំមកហើយ ដែលធ្វើឲ្យបក្សប្រឆាំងរិះគន់ថា លោកកាន់អំណាចយូរពេក។ លោកក៏ធ្លាប់បានប្រកាសផងដែរថា លោកនឹងចុះចេញពីតំណែងភ្លាមបើលោកចាញ់ឆ្នោត។ ក៏ប៉ុន្តែលោកនៅតែបន្តកាន់តំណែងមកទល់សព្វថ្ងៃនេះ ដោយសារគណបក្សប្រជាជនឈ្នះឆ្នោតជាបន្តបន្ទាប់មកទល់សព្វថ្ងៃនេះ ហើយគណបក្សប្រជាជនបានផ្ដល់សេចក្ដីទុកចិត្តលើរូបលោកឲ្យធ្វើជានាយករដ្ឋមន្ត្រីម្ដងហើយម្ដងទៀត៕