ប្រជាពលរដ្ឋទំាងនោះបានថ្លែងថា ការនេសាទខុសច្បាប់នៅចំពេលដែលច្បាប់នេសាទបានហាមឃាត់នៅរដូវត្រីពង ក៏ប៉ុន្តែប្រជាពលរដ្ឋមួយចំនួននោះ ខំរកគ្រប់មធ្យោបាយនេសាទយកកូនត្រីតូចៗ ដោយប្រើអួនស្បៃនិងឧបករណ៍ផ្សេងៗទៀត។
ប្រជាពលរដ្ឋឈ្មោះ វ៉ាន់ ថេង បានមានប្រសាសន៍ថា លោកព្រួយបារម្ភខ្លាចអស់ពូជត្រីដោយមានអ្នកនេសាទខុសច្បាប់ច្រើនពេកនៅតាមដងទន្លេមេគង្គ ៖ «ឥឡូវសមត្ថកិច្ចឃុបឃិតជាមួយអ្នករកស៊ីខុសច្បាប់ ព្រោះប្រាក់ខែវាតិច ធ្វើការតាមប្រាក់ខែ វារួមសមគំនិតជាមួយជនខិលខូច»។
ប្រជាពលរដ្ឋឈ្មោះ សុខ ណាំ បានមានប្រសាសន៍ថា អ្នកនេសាទខុសច្បាប់ទាំងនោះបានធ្វើការនេសាទគ្រប់រដូវមិនថារដូវហាមឃាត់ឬយ៉ាងណានោះទេ។ លោកបានបន្តថា ចំពោះអ្នកមានមុខរបរនេសាទជាលក្ខណៈគ្រួសារកាន់តែមានជីវភាពលំបាកទៅៗ។
លោក សុខ ណាំ មានប្រសាសន៍ដូច្នេះថា ៖ «ដោះស្រាយលក្ខណៈគ្រួសារ គ្នាអត់មានបច្ចេកទេសរក ឧបករណ៍តូចតាចរកមិនបាន វាទៅជាពាយ»។
ប្រជាពលរដ្ឋសុំមិនបញ្ចេញឈ្មោះបានមានប្រសាសន៍ថា ប្រជាពលរដ្ឋនៅក្នុងស្រុកកោះសូទិនមួយចំនួនបានសហការនឹងជនជាតិវៀតណាមដែលបានបង្កើតជាភូមិជីហែ ឃុំពាមប្រធ្នួស ប្រើឧបករណ៍នេសាទខុសច្បាប់ធំៗ មានដូចជា ដាយ និងឧបករណ៍ឆក់ត្រីផ្សេងៗទៀត រីឯមន្រ្តីជលផលពុករលួយពុំមានការហាមឃាត់នោះឡើយ ៖ «ភូមិយួននៅកន្លែងទន្លេហ្នឹង អាហ្នឹងមានបែត្រីរាប់រយ ប្រើស្បៃមុងហ្នឹងដើម្បីយកនុយត្រីល្អិតៗ យកមកឲ្យត្រីធំស៊ី ហើយដល់ពេលខែខុសពីខែហ្នឹងទៀត អូសយ៉ាងកាវអីតាមទន្លេទៀត។ អូសយ៉ាងកាវ ភាសាវៀតណាមគេហៅយ៉ាងកាវ អាហ្នឹងវាមានប្រដាប់ឆក់ឲ្យត្រីប្រកាច់ ចូលក្នុងកាវហ្នឹងទៀត»។
វិទ្យុអាស៊ីសេរីមិនអាចធ្វើការទំនាក់ទំនងនិងអ្នកនេសាទ ដែលប្រជាពលរដ្ឋខាងលើ បានចោទប្រកាន់បានទេនៅថ្ងៃនេះ។
រីឯនាយអធិការដ្ឋានជលផលមេគង្គ លោក ឡង់ គន បានមានប្រសាសន៍ជុំវិញបញ្ហាខាងលើថា លោកក៏បានដឹងអំពីការនេសាទខុសច្បាប់នេះដែរ។ កាលពីថ្ងៃទី២៥ សីហានេះ លោកបានកោះហៅមន្ត្រីក្រោមបង្គាប់ប្រជុំដើម្បីចាត់វិធានការក្នុងពេលឆាប់ៗនេះ។
លោក ឡង់ គន ថ្លែងដូច្នេះថា ៖ «តាមបទពិសោធន៍កន្លងមក វាអាចមានដែរនៅខាងក្រោម ព្រោះយើងមើលមិនអស់ដែរ ជួនកាលវាអាចមានបញ្ហាហ្នឹងកើតឡើងដែរ តែជួនកាលក៏វាមិនមែនជារឿងគេឃុបឃិតទេ ប៉ុន្តែជារឿងបទល្មើសវាកើតឡើងឯង ហើយវាលួច»។
សូមជម្រាបថា បណ្តាប្រជាពលរដ្ឋខាងលើសំណូមពរដល់មន្ត្រីជលផលឲ្យចាត់វិធានការឲ្យបានតឹងរ៉ឹងនិងចាប់ឲ្យបានច្បាស់លាស់ កុំប្រព្រឹត្តអំពើពុករលួយ ចាប់ហើយដោះលែងវិញ ពិសេស ជនជាតិវៀតណាមប្រើឧបករណ៍នេសាទខុសច្បាប់យ៉ាងអនាធិបតេយ្យ៕