ពលរដ្ឋចោទអាជ្ញាធរក្រចេះថាដោះលែងជនប្រព្រឹត្តបទល្មើសនេសាទ
2010.11.29
គេហទំព័រខេត្តក្រចេះ
លោក កិះ អ៊ីម ប្រធានសហគមន៍នេសាទនៅភូមិថ្មរាប ឃុំព្រែកប្រសព្វ ខេត្តក្រចេះ បានផ្ដល់សម្ភាសន៍កាលពីព្រឹកថ្ងៃទី២៩ វិច្ឆិកាថា ឧបករណ៍ដាក់កាវ និងស្បៃមុងរួមទាំងជនល្មើសត្រូវចាប់បាន កាលពីថ្ងៃទី១៨ ខែកក្កដា បញ្ជូនទៅរដ្ឋអំណាចមូលដ្ឋាន ប៉ូលិស និងជំនាញ តែត្រូវគេលែងមកវិញ ដែលជាហេតុធ្វើឲ្យលោកអស់ទឹកចិត្ត ក្នុងការបង្ក្រាបបទល្មើសតទៅទៀត ៖ «ដល់លែងមកវិញ ពួកអាបទល្មើសវាទិញកាវទិញអីដាក់រួច ខ្ញុំប្ដឹងចូលក្នុងតុលាការ ឃើញគេហៅជនល្មើសទៅឃើញចេញមកវិញដដែល ចង់សួរពីច្បាប់ហ្នឹង បើថាមិនដោះស្រាយមិនធ្វើទេ ខ្ញុំប្រហែលផ្អាកហើយឈប់ហើយ»។
លោក កិះ អ៊ីម បន្ថែមថា ជនល្មើសដែលមានត្រកូលសុង បានដាក់កាវទទឹងបឹងជាង ១០០ម៉ែត្រ ដែលលោកថាអាចយកអស់ត្រីនៅក្នុងបឹង សម្រាប់តម្រូវការរបស់ប្រជាពលរដ្ឋជាច្រើនរយគ្រួសារ ហើយគ្រួសារជនល្មើសនេះ គ្មានខ្លាចញញើតអ្នកណាឡើយ។ លោកមេឃុំព្រែកប្រសព្វ គឺលោក ធូ ង៉ាន បានអះអាងថា លោកបានចូលរួមតែបន្តិច ហើយប៉ូលិសប៉ុស្តិ៍ជាអ្នកដោះស្រាយ ប៉ុន្តែនាយប៉ុស្តិ៍រដ្ឋបាលឃុំព្រែកប្រសព្វ គឺលោក ប៉ែន ញ៉ និងមន្ត្រីសង្កាត់ជលផលស្រុកព្រែកប្រសព្វ គឺលោក សាវុធ មិនអាចសុំការបំភ្លឺបានឡើយ ដោយទូរស័ព្ទរោទ៍ជាច្រើនដង តែពុំមានអ្នកទទួល។
លោក ស៊ាន គិន នាយខណ្ឌរដ្ឋបាលជលផលបានបញ្ជាក់នៅថ្ងៃទី២៩ វិច្ឆិកាថា លោកនឹងធ្វើការស៊ើបអង្កេតបើដូចការចោទប្រកាន់មែន លោកនឹងចាត់វិធានការទៅលើការដោះលែងជនល្មើសនោះ ៖ «បើសិនជាមានកិច្ចការអ៊ីចឹងមែន ក្នុងនាមជាអ្នកទទួលខុសត្រូវ គឺកោះហៅមន្ត្រីហ្នឹងមកសួររកហេតុផល ហើយត្រូវព្រមានណែនាំកុំធ្វើប្រាសចាកនឹងច្បាប់ ខ្លួនជាមន្ត្រីនគរបាលយុត្តិធម៌អនុវត្តច្បាប់ជលផល ហើយធ្វើអ៊ីចឹង ឃុបឃិតដោះលែងយ៉ាងម៉េច ត្រូវតែព្រមានសមនឹងមានទោសទណ្ឌផង»។
លោក កិះ អ៊ីម បានឲ្យដឹងថា តំបន់ថ្មរាបសម្បូណ៌បទល្មើសនេសាទ ដែលជនល្មើសពេលខ្លះវាយទាំងប៉ូលិសយកកាំភ្លើងក៏មាន ហើយពេលខ្លះទៀត វាយទាហានឲ្យលីអាគុយឆក់យកទៅឲ្យខ្លួនដល់ផ្ទះទៀតផងក៏មាន ហេតុនេះហើយ លោកទាមទារឲ្យមានការចាត់វិធានការទៅលើគ្រួសារជនល្មើស ដែលមានឈ្មោះ សុង ភក្តិ សុង ផល សុង បូរិន សុង អូន និងកូនប្រសាដែលគ្មានខ្លាចនរណា ដើម្បីឲ្យជនល្មើសដទៃរាងចាល៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ