ឈើប្រណិត៥ឡាន ត្រូវគេជញ្ជូនចេញពីទីតាំងលាក់បំពួននៅខេត្តរតនគិរី
2010.05.05
ទីតាំងអារឈើត្រូវបានរកឃើញនៅក្នុងព្រៃស្រោង ក្នុងស្រុកលំផាត់ ខេត្តរតនគិរី។
អ្នកភូមិជនជាតិដើម ដែលជាអ្នកដឹងពីទីតាំងលាក់ឈើប្រណិត ហើយបានផ្ដល់ព័ត៌មាន ដើម្បីក្រុមសមត្ថកិច្ចព្រៃឈើទៅរឹបអូស ឲ្យដឹងថា ឈើចំនួន ៥រថយន្តច្នៃ ឬគោយន្ត ត្រូវគេដឹកជញ្ជូនចេញពីទីតាំងលាក់ឈើ កាលពីពាក់កណ្ដាលអាធ្រាត្រ យប់ថ្ងៃអង្គារ ឆ្លងចូលថ្ងៃពុធ ទី៥ ខែឧសភា ឆ្នាំ២០១០។
អ្នកភូមិសុំមិនបញ្ចេញឈ្មោះ ឲ្យដឹងថា ដំណឹងស្ដីពីការរកឃើញឈើ បានបែកការដល់ក្រុមអ្នកលាក់ទុកឈើ ហើយឈើដែលគេលាក់ទុក ត្រូវគេដឹកជញ្ជូនចេញទៅកន្លែងផ្សេង ដោយរថយន្តច្នៃចំនួនពីរគ្រឿង ដោយសារតែមន្ត្រីព្រៃឈើខកខានមិនបានទៅរឹបអូសយកឈើមករក្សាទុក កាលពីថ្ងៃអង្គារ ទី៤ ខែឧសភា កន្លងទៅនេះ។
គាត់និយាយថា ៖ «ជិះមួយឡានមកដល់ហ្នឹង។ ប្រាប់ខ្ញុំថា កន្លែងនេះ វាជិះជិតវាត្រឡប់មកវិញ យប់មិញគេដឹកអស់ប្រាំឡានតែម្ដង!»។
នាយខណ្ឌរដ្ឋបាលព្រៃឈើរតនគិរី កាលពីថ្ងៃអង្គារ ទី៤ កន្លងទៅ បញ្ជាក់ប្រាប់វិទ្យុអាស៊ីសេរីថា លោកបានចាត់មន្ត្រីព្រៃឈើ ទៅកាន់ទីតាំងដែលមានសេចក្ដីរាយការណ៍ពីការលាក់ឈើនោះហើយ។ ចំណែកអ្នកភូមិ ដែលឃ្លាំមើលគំនរឈើ ឲ្យដឹងថា គាត់បានបង្ហាញដល់មន្ត្រីព្រៃឈើ ៣នាក់ បានមកជួបគាត់ កាលពីរសៀលម៉ោង៣ ថ្ងៃដដែល ក៏ប៉ុន្តែមិនឃើញមន្ត្រីព្រៃឈើចាត់ការដឹកជញ្ជូនឈើយកទៅរក្សាទុកនោះទេ។
នាយខណ្ឌរដ្ឋបាលព្រៃឈើរតនគិរី លោក វង្ស សុខ សេរី មានប្រសាសន៍ថា មន្ត្រីលោកបានប្រមូលឈើ ដែលលាក់ទុកនោះហើយ នៅថ្ងៃពុធ ទី៥ ខែឧសភា ឆ្នាំ២០១០ ប៉ុន្តែបរិមាណឈើចំនួនប៉ុន្មាន មិនទាន់ដឹងនៅឡើយ។
លោកបញ្ជាក់ថា មិនមានសេចក្ដីរាយការណ៍ពីឈើបាត់នោះទេ ៖ «សម័យនេះហើយ អាណាទៅយកឡានទៅដឹកទៅណាទៅណីទៀត បងមិនឃើញទេ»។
អ្នកសម្របសម្រួលសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ថា អត្តសញ្ញាណអ្នកលាក់ទុកឈើ មានសាក្សីស្គាល់ច្បាស់ ដូច្នេះសមាគមលោក និងអន្តរាគមន៍សុំឲ្យមានការស៊ើបអង្កេតជុំវិញការលាក់ទុកឈើខុសច្បាប់ និងអ្នកឃុបឃិត ធ្វើឲ្យឈើបាត់ចេញពីទីលាក់បំពួន។
លោក ប៉ែន ប៊ុណ្ណារ៍ មានប្រសាសន៍ថា ៖ «រឿងនេះវាកើតមានបីលើកហើយ ដែលយើងអន្តរាគមន៍ទៅហើយ វាធ្វើការធ្វេសប្រហែល។ យើងគិតថា វាមានការពាក់ព័ន្ធគ្នា ហើយរវាងបុគ្គលដែលជាសមត្ថកិច្ច។ ឃើញថាវាកំពុងផ្គើននឹងបទបញ្ជា និងប្រឆាំងនឹងការខិតខំរបស់ប្រមុខរាជរដ្ឋាភិបាលហើយ»។
ប្រភពពីអ្នកភូមិខាងលើឲ្យដឹងថា ឈើដែលលាក់ទុកនោះ គឺនៅពីក្រោយដីចម្ការគាត់ ចម្ងាយ ២០០ម៉ែត្រ និងក្នុងស្រែរបស់គាត់ ឋិតនៅភូមិដេះ ឃុំបរខាំ ស្រុកបរកែវ មានចំនួន ១០ឡាន គិតជាបរិមាណ ឈើប្រមាណពី ២០ទៅ៣០ម៉ែត្រគូប៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ