សង្គមស៊ីវិលគ្រោងយកបណ្ដឹងពីភាពមិនប្រក្រតីក្នុងការបង់ពន្ធដាក់ជូនសមត្ថកិច្ច
2010.08.30
ទីតាំងប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ មួយកន្លែង នៅក្នុងរាជធានីភ្នំពេញ
មន្ត្រីអង្គការសង្គមស៊ីវិលបានទទួលពាក្យចំនួនជាង ៥០ករណី ពីប្រជាពលរដ្ឋមកពីបណ្ដាខេត្តក្រុងផ្សេងគ្នា ដែលបានរាយការណ៍ពីភាពមិនប្រក្រតីនានា ចំពោះការទារលុយពីពួកគាត់ក្នុងរដូវបង់ពន្ធ ករណីនេះគេនឹងដាក់ជូនទៅអគ្គនាយកដ្ឋានពន្ធដារ និងអង្គភាពប្រឆាំងអំពើពុករលួយ ដើម្បីសុំឲ្យចាត់វិធាន និងធ្វើការដាក់ពិន័យដើម្បីជាការឆ្លើយតបនឹងសេចក្ដីជូនដំណឹងរបស់នាយកដ្ឋានពន្ធដារ។
លោក សន ជ័យ អ្នកសម្របសម្រួលបណ្ដាញរួបរួមដើម្បីគណនេយ្យភាពសង្គមនៅអាស៊ីបូព៌ា និងប៉ាស៊ីហ្វិកប្រចាំកម្ពុជា បានថ្លែងនៅក្នុងនាទីវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃសុក្រ ទី២៧ ខែសីហា ថា តាមរយៈយុទ្ធនាការចែកខិត្តប័ណ្ណផ្សព្វផ្សាយដល់ប្រជាពលរដ្ឋ ដោយដាក់លេខទូរស័ព្ទ ដើម្បីផ្ញើសារ ឬហៅទូរស័ព្ទមកកាន់ក្រុមរបស់លោក ពីភាពមិនប្រក្រតីនានាក្នុងរដូវបង់ពន្ធនេះ មានករណីខ្លះ មន្ត្រីម្នាក់ត្រូវបានប្រជាពលរដ្ឋចោទប្រកាន់ដល់ទៅ ១០ករណីក៏មាន។
នៅក្នុងសេចក្ដីជូនដំណឹងរបស់នាយកដ្ឋានពន្ធដារកាលពីថ្ងៃទី១០ សីហា បានបង្ហាញថា អ្នកត្រូវបង់ពន្ធត្រូវបង់ឲ្យគ្រប់ចំនួនទឹកប្រាក់កំណត់ក្នុងតារាងពន្ធ។ ក្នុងករណីភ្នាក់ងារពន្ធដារទារប្រាក់លើសពីចំនួនដែលបានកំណត់ សូមរាយការណ៍ពីឈ្មោះ និងអត្តលេខរបស់ភ្នាក់ងារពន្ធដារទៅកាន់អគ្គនាយកដ្ឋានពន្ធដារ។
ក៏ប៉ុន្តែប្រធានសមាគមប្រជាធិបតេយ្យឯករាជ្យ និងសេដ្ឋកិច្ចក្រៅប្រព័ន្ធ លោក វន់ ពៅ បានឆ្លើយតបក្នុងនាទីវេទិកាអ្នកស្ដាប់វិទ្យុអាស៊ីសេរីដែរថា សេចក្ដីជូនដំណឹងរបស់នាយកដ្ឋានពន្ធដារ ពុំបានបញ្ជាក់ជូនប្រជាពលរដ្ឋច្បាស់លាស់ សម្រាប់ធ្វើការប្ដឹងផ្ដល់ពីករណីទារពន្ធលើសនោះទេ។ លោកថា ដូច្នេះសេចក្ដីជូនដំណឹងនេះពុំមានប្រសិទ្ធភាពនោះឡើយ។
អ្នកស្ដាប់មួយរូបឈ្មោះ វណ្ណៈ ទូរស័ព្ទមកពីខេត្តកំពង់ចាម បានថ្លែងថា លោកមិនសប្បាយចិត្តសោះ ចំពោះមន្ត្រីពន្ធនៅមូលដ្ឋានរបស់លោក ដែលបានទារប្រាក់លើសពីតម្លៃកំណត់ដោយអគ្គនាយកដ្ឋានពន្ធដារនៅពេលដែលគាត់ទៅទិញសន្លឹកពន្ធ។
លោក វណ្ណៈ បានលើកជាសំណួរមកកាន់វាគ្មិនថា តើខុសច្បាប់ដែរឬទេចំពោះភ្នាក់ងារពន្ធដារ ដែលបានចែកចាយសន្លឹកពន្ធទៅឲ្យបុគ្គលផ្សេង ដែលមិនមែនជាភ្នាក់ងារពន្ធដារយកទៅលក់បន្ត និងមានដាក់លក់គ្រប់ទីកន្លែងសាធារណៈនោះ?
ត្រង់ចំណុចនេះ លោក សន ជ័យ អ្នកសម្របសម្រួលបណ្ដាញរួបរួមដើម្បីគណនេយ្យភាពសង្គម បានឆ្លើយតបដូច្នេះ ៖ «ជាធម្មតា នៅតាមខេត្តក្រុងនីមួយៗ គេកំណត់ហើយតំបន់គោលដៅលក់ពន្ធ។ អ៊ីចឹងបើសិនជាយកទៅលក់នៅការ៉ាសសាំង ដូចពងទា ដូចកាតទូរស័ព្ទហ្នឹង ខ្ញុំយល់ថា នេះជាការខុសមួយ ហើយអ្នកដែលអនុវត្តក្នុងការលក់ហ្នឹង ពេលខ្លះឮប្រជាពលរដ្ឋប្ដឹងមក មានជាប៉ូលិស មានជាស្មៀនឃុំ មានជាមេភូមិ។ អ៊ីចឹងទាំងអស់នេះ គឺជាទង្វើមួយកំពុងតែចាកឆ្ងាយអំពីខ្លឹមសារនៃសេចក្ដីជូនដំណឹង ហើយវាជាទង្វើមួយខុសច្បាប់ ប៉ុន្តែអ្នកដែលខុសហ្នឹង ដូចជាមិនមានត្រូវទទួលពិន័យរដ្ឋបាលអីទាល់តែសោះ! អ៊ីចឹងហើយធ្វើឲ្យប្រជាពលរដ្ឋគាត់អស់សង្ឃឹមតែម្ដង!»។
ក្នុងចំណុចទី៦ នៃសេចក្ដីជូនដំណឹងរបស់អគ្គនាយកដ្ឋានពន្ធដារបានសរសេរថា ក្រសួងសេដ្ឋកិច្ច និងហិរញ្ញវត្ថុ នឹងចាត់វិធានការតាមផ្លូវច្បាប់ រួមជាមួយក្រសួងមានសមត្ថកិច្ច ដើម្បីចាប់ឃាត់ជនទាំងឡាយណាដែលបានលួចបន្លំបោះពុម្ពធ្វើអាជីវកម្មលក់ដូរ និងប្រើប្រាស់ប័ណ្ណក្លែងក្លាយទាំងនេះ។
ថ្លែងប្រាប់អ្នកសារព័ត៌មាននៅក្នុងសិក្ខាសាលាទាក់ទងនឹងបញ្ហាអំពើពុករលួយ ក្នុងទីក្រុងភ្នំពេញ កាលពីថ្ងៃទី២៣ ខែសីហា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មានប្រសាសន៍ថា លោកបានចាត់កម្លាំងក្នុងការឃ្លាំមើលភ្នាក់ងារប្រមូលពន្ធនៅតាមកន្លែងគោលដៅមួយចំនួន ឃើញថា មន្ត្រីពន្ធដារបានផ្លាស់ប្ដូរឥរិយាបថរបស់ខ្លួនជាងឆ្នាំមុនៗ ទាក់ទងការទារលុយពីប្រជាពលរដ្ឋលើសតម្លៃកំណត់ក្នុងសន្លឹកពន្ធនោះ។ ក៏ប៉ុន្តែទោះជាយ៉ាងណា លោកស្វាគមន៍នឹងចាត់វិធានការតាមផ្លូវច្បាប់ចំពោះជនណាដែលប្រព្រឹត្តអំពើពុករលួយ។
នៅក្នុងសន្និសីទសារព័ត៌មានមួយស្ដីពីយុទ្ធនាការប្រឆាំងអំពើពុករលួយ ក្នុងការប្រមូលពន្ធលើសពីតម្លៃកំណត់លើមធ្យោបាយធ្វើដំណើរគ្រប់ប្រភេទ ថ្ងៃទី១៦ ខែសីហាកន្លងទៅ អង្គការសង្គមស៊ីវិលបានប៉ាន់ប្រមាណថា ប្រជាពលរដ្ឋកម្ពុជាបានចំណាយប្រាក់ចំនួនប្រហែល ១លានដុល្លារអាមេរិកក្នុង ១ឆ្នាំៗ ដែលបានបង់ពន្ធលើយានយន្តលើសតម្លៃកំណត់ ទៅឲ្យមន្ត្រីអគ្គនាយកដ្ឋានពន្ធដារដែលបានប្រព្រឹត្តអំពើពុករលួយ។
ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១០ បានចាប់ផ្ដើមអនុវត្តតាំងពីថ្ងៃទី២០ ខែកក្កដា ឆ្នាំ២០១០ ហើយនឹងបញ្ចប់ទៅវិញនៅថ្ងៃទី២០ ខែតុលា ឆ្នាំ២០១០៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ