មានករណីយកលុយធ្វើបញ្ជីគ្រួសារនៅកំពង់ចាម
2010.08.20
ប្រជាពលរដ្ឋនៅភូមិជីពាំង ឃុំក្រែក ស្រុកពញាក្រែក ខេត្តកំពង់ចាម បានផ្ដល់សម្ភាសន៍នៅព្រឹក ថ្ងៃទី២០ សីហាថា ពួកគាត់បានខំស្វះស្វែងរកខ្ចីប្រាក់គេ និងខំបិចបោចប្រមូលប្រាក់សន្សំ ដើម្បីយកទៅឲ្យមន្ត្រីសមត្ថកិច្ចចុះធ្វើប័ណ្ណគ្រួសារថ្មី។
អ្នកស្រី ខា ស៊ីណា មានមុខរបរចាក់នំលក់ ប្តីទៅធ្វើកម្មករនៅប្រទេសថៃ បានផ្ដល់សម្ភាសន៍ថា ការតម្រូវឲ្យបង់ប្រាក់ថ្លៃធ្វើបញ្ជីគ្រួសារថ្មីមានតម្លៃខ្ពស់ហួសពីសមត្ថភាពនៃការរកចំណូលរបស់អ្នកស្រីប្រចាំថ្ងៃ។
អ្នកស្រី កែវ ជាកសិករស៊ីឈ្នួលជម្រះចម្ការ ឬស្ទូងស្រូវឲ្យគេមួយថ្ងៃរកចំណូលបានតែ១.២០០៛ ប៉ុណ្ណោះ ហើយពេលគេតម្រូវឲ្យបង់ប្រាក់ ២៥.០០០៛ ក្នុងការធ្វើបញ្ជីគ្រួសារបែបនេះ អ្នកស្រីក៏ត្រូវបង្ខំចិត្តទៅខ្ចីម្ចាស់ចម្ការយកមកធ្វើ ហើយចាំកាត់មួយថ្ងៃបន្តិចសងវិញ។
ទោះជាការតម្រូវនោះ ហួសពីសមត្ថភាពរកចំណូលបែបណាក្តី ក៏ជនក្រីក្រទាំងនោះខិតខំរកប្រាក់បង់ឲ្យបានគ្រប់ដែរ ដោយយល់ថាសៀវភៅគ្រួសារមានសារសំខាន់ក្នុងការបញ្ជាក់ទីលំនៅ ធ្វើអត្តសញ្ញាណប័ណ្ណ និងសំបុត្រកំណើតសម្រាប់កូនចូលរៀនទៅថ្ងៃក្រោយ។
ប៉ូលិសប៉ុស្តិ៍រដ្ឋបាលឃុំក្រែក ដែលចុះធ្វើប័ណ្ណគ្រួសារសុំមិនបញ្ចេញឈ្មោះបានសារភាពថា មានការតម្រូវឲ្យបង់ប្រាក់មែន តែមិនបង្ខំនោះទេ។
មន្ត្រីនៃអង្គការក្រៅរដ្ឋាភិបាល ដែលចុះពង្រឹងផ្នែកអភិបាលកិច្ចល្អ គឺលោក ប៊ុន រិទ្ធី បានបញ្ជាក់ថា ពុំមានច្បាប់ណាមួយចែងថា តម្រូវឲ្យបង់ប្រាក់ក្នុងការធ្វើប័ណ្ណគ្រួសារឡើយចាប់ពីពេលយុទ្ធនាការឆ្នាំ២០០២ ដល់ខែសីហា ឆ្នាំ២០០៥ តែចាប់ពីឆ្នាំ២០០៥ មក មានដាក់ការពិន័យដល់ប្រជាពលរដ្ឋណាដែលខកខានមិនបានបំពេញកាតព្វកិច្ចរបស់ខ្លួន ក្នុងការចុះរាល់បញ្ជីអត្រានុកូលដ្ឋាន តែមិនបានកំណត់ថាត្រូវបង់ប៉ុន្មានឡើយ។
អ្នកស្រី ទូច ស៊ីឈ្នួលជម្រះចម្ការឲ្យដឹងថា ទាំងខ្លួនអ្នកស្រីមិនដែលមានប័ណ្ណគ្រួសារទេ ហើយកូនទាំង៦នាក់ មិនដែលស្គាល់សាលាដែរ ដោយគ្មានប្រាក់បង់ថ្លៃធ្វើសំបុត្រកំណើតឲ្យកូន សម្រាប់កូនចុះឈ្មោះចូលរៀន ហើយគេក៏ពុំដែលរវល់ធ្វើឲ្យដែរ។
លោក នាង សាវ៉ាត មន្ត្រីសិទ្ធិមនុស្សនៃសមាគមអាដហុកបានសុំឲ្យក្រសួងមហាផ្ទៃចុះត្រួតពិនិត្យសកម្មភាពនោះ និងសម្រួលប័ណ្ណគ្រួសារដល់ប្រជាពលរដ្ឋគ្រប់រូប ដើម្បីកុំឲ្យស្ទះដល់ដំណើរការធ្វើអត្តសញ្ញាណប័ណ្ណសម្រាប់ការចុះឈ្មោះបោះឆ្នោត៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ