ក្រសួងព័ត៌មានឈប់ប្ដឹងកាសែតខ្មែរអមតៈ
2010.07.16
ក្រសួងព័ត៌មានប្រទេសកម្ពុជា បានសម្រេចដកពាក្យបណ្ដឹងពីតុលាការក្រុងភ្នំពេញហើយ គឺឈប់ប្ដឹងកាសែត ខែ្មរអមតៈ ដែលបានផ្សាយព័ត៌មានកាលពីថ្ងៃទី៥ ខែកក្កដាថ្មីៗនេះ ស្ដីអំពីខួបលើកទី១៣ នៃរដ្ឋប្រហារ ខែកក្កដា ឆ្នាំ១៩៩៧ ថាជាសញ្ញានៃការប្រមូលអំណាចផ្ដាច់មុខរបស់លោក ហ៊ុន សែន។
ចាងហ្វាងកាសែតខ្មែរអមតៈ លោក ប៊ុន ថា អាយុ៤៦ឆ្នាំ ដែលអះអាងថា កាសែតរបស់លោក ជាកាសែតឯករាជ បានមានប្រសាសន៍ប្រាប់វិទ្យុអាស៊ីសេរី នៅថ្ងៃសុក្រ ទី១៦ ខែកក្កដានេះថា ៖ «ចរចាម្សិលមិញ ម៉ោង៣ល្ងាច បានព្រមដកពាក្យបណ្ដឹងវិញហើយ។ ឥឡូវវាមានការសប្បាយចិត្តដូចធម្មតាវិញ។ ទីមួយខ្ញុំធ្វើលិខិតព្រមចុះបំភ្លឺវិញ នូវរាល់អត្ថបទដែលក្រសួងបានផ្ញើមក ហើយនឹងសុំអធ្យាស្រ័យ វាមានការខុសឆ្គង»។
កាលពីថ្ងៃទី១២ ខែកក្កដា ថ្មីៗនេះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានជូនដំណឹងជាលាយលក្ខណ៍អក្សរ ទៅប្រធានតុលាការក្រុងភ្នំពេញ លោក ជីវ កេង ថាសំណើសុំប្ដឹងសារព័ត៌មានខ្មែរអមតៈ ពីបទផ្សាយព័ត៌មានមិនពិតដោយចេតនា។
អត្ថបទព័ត៌មានដែលរងការប្ដឹងនោះ មានចំណងជើងថា "ខួបទី ១៣ឆ្នាំ នៃរដ្ឋប្រហារ ខែកក្កដា ឆ្នាំ១៩៩៧ ជាសញ្ញាប្រមូលអំណាចផ្ដាច់មុខរបស់លោក ហ៊ុន សែន"។
លិខិតបណ្ដឹងរបស់ក្រសួងព័ត៌មាន ដែលវិទ្យុអាស៊ីសេរីទទួលបាន បានពណ៌នាថា អត្ថបទនេះគឺអសុទ្ធចិត្ត បង្កឲ្យមានការភ័ន្តច្រឡំ ពីសំណាក់មហាជន និងសហគមន៍អន្តរជាតិ ក្នុងបំណងបំផ្លិចបំផ្លាញមកលើកិច្ចប្រឹងប្រែងការពារប្រទេស របស់ប្រមុខរដ្ឋាភិបាល។
ប្រធាននាយកដ្ឋានមណ្ឌលព័ត៌មាន របស់ក្រសួងព័ត៌មាន លោក យ៉ែម ណយ បានមានប្រសាសន៍បញ្ជាក់ថា លោកបានដកពាក្យបណ្ដឹងរួចហើយ នៅថ្ងៃទី១៦ ខែកក្កដានេះ ៖ «លិខិតសុំទោសឯកឧត្ដមរដ្ឋមន្ត្រីហ្នឹង។ គាត់ (លោក ខៀវ កាញារីទ្ធ) បានធ្វើលិខិតមួយសុំដកទៅតុលាការនោះ។ បានជូនទៅតុលាការព្រឹកមិញហើយ»។
ការយល់ព្រមដកពាក្យបណ្ដឹងនេះ បានធ្វើឡើងនៅក្នុងជំនួបរវាងលោក ប៊ុន ថា ចាងហ្វាងកាសែតខ្មែរអមតៈ ជាមួយរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ កាលពីល្ងាចថ្ងៃព្រហស្បតិ៍ ទី១៥ ខែកក្កដាថ្មីៗ នេះ ដើម្បីសុំទោស និងសន្យាចុះផ្សាយកែតម្រូវឡើងវិញ នៅសប្ដាហ៍ក្រោយនេះ។
កាលពីឆ្នាំ២០០៩ កន្លងមកនេះ អ្នករិះគន់រដ្ឋាភិបាលជាច្រើននាក់បានរងការប្ដឹងជាបន្តបន្ទាប់ ក្រោមបទបរិហារកេរ្តិ៍ និងផ្សាយព័ត៌មានមិនពិត ក្នុងនោះមានដូចជា លោក ហង្ស ចក្រា ចាងហ្វាងកាសែតខ្មែរម្ចាស់ស្រុក លោក ដាំ សិទ្ធិ ចាងហ្វាងកាសែតមនសិការខ្មែរ លោក មឿង សុន ប្រធានមូលនិធិទ្រទ្រង់អរិយធម៌ខ្មែរ លោកស្រី មូរ សុខហួរ លោក ហូ វ៉ាន់ តំណាងរាស្ត្រគណបក្សសមរង្ស៊ី និងលោក សម រង្ស៊ី៕