ខ្មែរ-ថៃ ជួបជុំបួងសួងសុំសន្តិភាព
2010.07.11
ទាហានខ្មែរអង្គុយជាមួយទាហានថៃនៅក្បែរប្រាសាទព្រះវិហារ ជាប់ព្រំដែនថៃក្នុងខេត្តព្រះវិហារ នាថ្ងៃទី ១៨ កក្កដា ២០០៨ ។
តំណាងបណ្ដាញពុទ្ធសាសនិកខ្មែរ-ថៃ ជាច្រើននាក់ កាលពីល្ងាចថ្ងៃសៅរ៍ និងថ្ងៃអាទិត្យ ទី១១ ខែកក្កដានេះ បានជួបប្រជុំគ្នា នៅក្នុងខេត្តស្រះកែវ ប្រទេសថៃ ដែលមានព្រំដែនជាប់ខេត្តបន្ទាយមានជ័យ ប្រទេសកម្ពុជា ក្នុងគោលដៅប្រមូលផ្តុំទស្សនៈរួមគ្នា ដើម្បីឈានទៅការរៀបចំពិធីនានា ដើម្បីជំរុញឲ្យរដ្ឋាភិបាលប្រទេសថៃ និងរដ្ឋាភិបាលប្រទេសកម្ពុជា ពង្រឹងចំណងមិត្តភាពនឹងគ្នាឡើងវិញ បន្ទាប់ទំនាក់ទំនងរវាងប្រទេសខ្មែរ-ថៃ មានការស្រុតចុះនារយៈពេលកន្លងមក។
ឧបាសក រស់ សុថា ប្រធានអង្គការបណ្ដាញពុទ្ធសាសនិកសង្គមខ្មែរ បានមានប្រសាសន៍ថា តំណាងពុទ្ធសាសនិកសង្គមខ្មែរ (Buddhist and Khmer Society Network) ចំនួនជាង ១០នាក់ ពីប្រទេសកម្ពុជា និងតំណាងពុទ្ធសាសនិកថៃ (Thai People Foundation) ចំនួនជាង ១០នាក់ដូចគ្នា បានជួបប្រជុំគ្នានៅស្រុកអារ៉ាញ់ប្រាថេត ខេត្តស្រះកែវ ប្រទេសថៃ នាល្ងាចថ្ងៃសៅរ៍ និងថ្ងៃអាទិត្យ ទី១១ ខែកក្កដានេះ ៖ «ដើម្បីរៀបចំផែនការជាទស្សនៈរួមមួយទៅថ្ងៃមុខ ដើម្បីធ្វើផែនការជាដុំកំភួនមួយច្បាស់លាស់ ដើម្បីឈានទៅរកការពង្រឹងមិត្តភាពកម្ពុជា-ថៃ ក៏ដូចជាជួយជំរុញឲ្យរដ្ឋាភិបាលប្រទេសទាំងពីរ ឲ្យខិតចូលគ្នាតាមតែអាចធ្វើបាន តាមសំឡេងរបស់ប្រជាពលរដ្ឋ។ សំខាន់គឺសុខដុមរមនា ដើម្បីធានាស្ថិរភាពនយោបាយ ដើម្បីឈានទៅរកការងារផ្សេងៗ ទៀត ផ្នែកសេដ្ឋកិច្ចសង្គម វប្បធម៌ ដូចជាស្អីផ្សេងៗទៀត ដើម្បីឲ្យបានជឿនលឿនទៅមុខ កុំឲ្យមានការរាំងស្ទះ»។
ប្រធានអង្គការបណ្ដាញពុទ្ធសាសនិកសង្គមខ្មែរ លោកឧបាសក រស់ សុថា បានបន្តថា ការជួបប្រជុំរវាងតំណាងពុទ្ធសាសនិកខ្មែរ-ថៃ នៅក្នុងខេត្តស្រះកែវនេះ ក៏មានគោលដៅអំពាវនាវឲ្យអាជ្ញាធរថៃបញ្ឈប់ការប្រើអំពើហិង្សាវាយដំ និងបាញ់សម្លាប់មកលើប្រជាពលរដ្ឋខ្មែរ ដែលនិយមឆ្លងដែនខុសច្បាប់ទៅរកការងារធ្វើនៅក្នុងប្រទេសថៃ។
ប្រធានមន្ទីរធម្មការ និងកិច្ចការសាសនាខេត្តបន្ទាយមានជ័យ លោក យិន យឿន បានមានប្រសាសន៍ថា ប្រទេសកម្ពុជាតាំងពីដើមរហូតមកទល់នឹងពេលបច្ចុប្បន្ននេះ គឺមិនដែលបានប្រើអំពើហិង្សាទៅលើប្រជាពលរដ្ឋថៃ ដូចដែលអាជ្ញាធរថៃប្រព្រឹត្តិមកលើប្រជាពលរដ្ឋខ្មែរទេ។ ទោះបីជាបន្តបន្ទាប់មកនេះ មានប្រជាពលរដ្ឋថៃជាច្រើន បានឆ្លងដែនខុសច្បាប់មកក្នុងទឹកដីកម្ពុជាក៏ដោយ។
លោក យិន យឿន បានមានប្រសាសន៍បន្តថា ការជួបប្រជុំគ្នារបស់បណ្ដាញពុទ្ធសាសនិកសង្គមខ្មែរ និងពុទ្ធសាសនិកថៃ នៅក្នុងខេត្តស្រះកែវ គឺសកម្មភាពដ៏ល្អមួយ ៖ «ព្រោះថា អាចជួយជាចំណែកមួយដល់រដ្ឋាភិបាល កាត់បន្ថយនូវអំពើហិង្សា ដូចជាការកេងប្រវ័ញ្ចផ្លូវភេទ ការជួញដូរគ្រឿងញៀនអី។ ការយោកយល់គ្នា ប្រទេសទាំងពីរ ព្រោះព្រះពុទ្ធសាសនា គឺរឿងកាប់សម្លាប់គឺអត់មានទេ»។
លោក ស៊ុំ ច័ន្ទគា មន្ត្រីសិទ្ធិមនុស្ស នៃសមាគមអាដហុក បានមានប្រសាសន៍ថា សកម្មភាពរបស់បណ្ដាញពុទ្ធសាសនិកសង្គមខ្មែរ និងបណ្ដាញពុទ្ធសាសនិកថៃ ដែលបានជួបប្រជុំគ្នានៅក្នុងខេត្តស្រះកែវ ប្រទេសថៃនេះ គឺជាសារមួយ ដែលអាចជំរុញឲ្យរដ្ឋាភិបាលប្រទេសទាំងពីរ កម្ពុជា-ថៃ គិតគូរក្នុងការពង្រឹងទំនាក់ទំនងគ្នា ដើម្បីរក្សាស្ថិរភាពនយោបាយ និងការជួយចាត់វិធានការទប់ស្កាត់រាល់ការប្រើអំពើហិង្សានានា ដែលធ្លាប់បានកើតមានឡើង នារយៈពេលកន្លងមកនេះ ៖ «ការបួងសួងសុំសន្តិភាពហ្នឹង គឺជាការល្អមួយ ដែលយើងជាអ្នកកាន់ព្រះពុទ្ធសាសនា ហើយថៃជាអ្នកកាត់ព្រះពុទ្ធសាសនាដូចគ្នាដែរ សូមកុំឲ្យយកគំនុំផ្ទាល់ខ្លួន ដែលខឹងទៅលើមេដឹកនាំដូចគ្នាហ្នឹង យកមកប៉ះពាល់ប្រជាពលរដ្ឋខ្មែរ និងថៃ»។
ឆ្លើយតបទៅបញ្ហាខាងលើនេះ មន្ត្រីរដ្ឋាភិបាលខ្មែរ លោកឧត្ដមសេនីយ៍ ឌី ភេន នាយការិយាល័យទំនាក់ទំនងព្រំដែនកម្ពុជ-ថៃ បានមានប្រសាសន៍ថា រាជរដ្ឋាភិបាលកម្ពុជា និងអាជ្ញាធរខ្មែរជាបន្តបន្ទាប់ បានស្នើយ៉ាងទទូច សុំឲ្យភាគីថៃយោកយល់ចំពោះប្រជាពលរដ្ឋខ្មែរ ដែលបានឆ្លងដែនខុសច្បាប់ចូលទៅរកការងារធ្វើក្នុងប្រទេសថៃ។
លោកបានបន្តថា យោងតាមកិច្ចព្រមព្រៀងរវាងកម្ពុជា ថៃ រាល់កំហុសឆ្គងណាមួយ ដែលបានកើតមានឡើង ភាគីថៃ គួរតែអនុវត្តដោយយោងទៅលើកិច្ចព្រមព្រៀង ៖ «យើងបាននិយាយគ្នា បើសិនមានប្រជាពលរដ្ឋយើងពាក់ព័ន្ធចំណុចខ្លះៗ អី សុំឲ្យមានការយោកយល់ផង ពីព្រោះពួកគាត់មានទីកន្លែងខ្លះ គាត់មិនអាចដឹងបានកន្លែងណាដីថៃ កន្លែងណាដីខ្មែរ ទៅអ៊ីចឹងខុសឆ្គងបន្តិចបន្តួច យើងសម្រួលបាន សម្រួលទៅ»។
កាលពីថ្ងៃទី២៥ និងថ្ងៃទី២៨ ខែឧសភា ឆ្នាំ២០១០ នេះ ពុទ្ធសាសនិកខ្មែរ-ថៃ រាប់រយនាក់ ក៏ប្រារព្ធពិធីបួងសួងសន្តិភាពនៅខេត្តសៀមរាប ប្រទេសកម្ពុជា និងខេត្តស៊ីសាកេត ប្រទេសថៃ ដើម្បីសុំឲ្យប្រជាជាតិ និងរដ្ឋាភិបាលប្រទេសទាំងពីរ កម្ពុជាថៃ លុបបំបាត់ការប្រើប្រាស់អំពើហិង្សា និងចាប់ផ្ដើមពង្រឹងស្ថិរភាពនយោបាយ រវាងប្រទេសទាំងពីរឡើងវិញ។
ប្រទេសកម្ពុជា និងប្រទេសថៃ បានកើតមានជម្លោះនយោបាយតានតឹងដាក់គ្នា រហូតឈានទៅដល់ការដកឯកអគ្គរាជទូតរៀងៗខ្លួន និងការប្រើប្រាស់ពាក្យសំដីធ្ងន់ៗដាក់គ្នា រវាងមេដឹកនាំ រហូតមានការគំរាមរកបិទព្រំដែននៃប្រទេសទាំងពីរ គឺចាប់ផ្ដើមឡើងក្រោយថ្ងៃទី១៥ ខែកក្កដា ឆ្នាំ២០០៨ បន្ទាប់ពីប្រាសាទព្រះវិហាររបស់ខ្មែរត្រូវបានអង្គការយូនីស្កូស្រេចដាក់បញ្ចូលជាសម្បត្តិបេតិកភណ្ឌពិភពលោករួចមក។
ការស្រេចរបស់អង្គការយូនីស្កូ ក្នុងការដាក់បញ្ចូលប្រាសាទព្រះវិហារ ទៅបេតិកភណ្ឌពិភពលោក បានធ្វើឲ្យរដ្ឋាភិបាលថៃ បញ្ជូនកងទ័ពរបស់ខ្លួនចូលឈ្លានពានកាន់កាប់តំបន់ប្រាសាទព្រះវិហារ រហូតមានការផ្ទុះអាវុធជាច្រើនលើកច្រើនសារ ធ្វើឲ្យកងទ័ពប្រទេសទាំងពីររងរបួស និងស្លាប់រៀងៗខ្លួន៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ