ខ្មែរ-ថៃ​ប្រឈម​មុខ​ដាក់​គ្នា​សាជា​ថ្មី

ការ​ប្រឈម​មុខ​ដាក់​គ្នា​រវាង​ទាហាន​ថៃ និង​កម្ពុជា បាន​ចាប់​ផ្ដើម​សាជា​ថ្មី​ឡើង​វិញ នៅ​ថ្ងៃ​សុក្រ ទី​២៨ មករា ឆ្នាំ​២០១១ បន្ទាប់​ពី​ទាហាន​ថៃ​បាន​គំរាម​ចូល​មក​ដក​ទង់​ជាតិ​ខ្មែរ​នៅ​ក្នុង​វត្ត​កែវសិក្ខា​គិរី​ស្វារៈ។
ដោយ យន់ សាមៀន
2011-01-29
អ៊ីម៉ែល
មតិ
Share
បោះពុម្ព
០៦-កុម្ភៈ-២០១០: អាវុធ​ប្រឆាំង​យន្តហោះ​ធុន DCA របស់​ទាហាន​ខ្មែរ​នៅ​ក្នុង​បន្ទាយ​ជិត​ប្រាសាទ​ព្រះវិហារ ក្នុង​ខែត្រ​ព្រះវិហារ
០៦-កុម្ភៈ-២០១០: អាវុធ​ប្រឆាំង​យន្តហោះ​ធុន DCA របស់​ទាហាន​ខ្មែរ​នៅ​ក្នុង​បន្ទាយ​ជិត​ប្រាសាទ​ព្រះវិហារ ក្នុង​ខែត្រ​ព្រះវិហារ
RFA Photo/Hang Savyouth

ក្រសួង​ការ​ពារ​ជាតិ​កម្ពុជា នៅ​ល្ងាច​ថ្ងៃ​សុក្រ ទី​២៨ មករា បាន​បញ្ជូន​រថក្រោះ និង​រថ​ពាស​ដែក​ជា​ច្រើន​គ្រឿង ទៅ​កាន់​តំបន់​ជម្លោះ​ក្បែរ​ប្រាសាទ​ព្រះវិហារ ដើម្បី​ការ​ពារ​ទឹក​ដី​កម្ពុជា បន្ទាប់​ពី​នាយក​រដ្ឋ​មន្ត្រី​ថៃ​ទាមទារ​ឲ្យ​កម្ពុជា​ដក​ទង់​ជាតិ​ខ្មែរ​ចេញ​ពី​ក្នុង​វត្ត​កែវ​សិក្ខា​គិរី​ស្វារៈ របស់​កម្ពុជា​រួច​មក។

មន្ត្រី​យោធា​ការពារ​នៅ​ប្រាសាទ​ព្រះវិហារ​បាន​ឲ្យ​ដឹង​ថា កង​ទ័ព​កម្ពុជា និង​ថៃ​កំពុង​ប្រឈម​មុខ​ដាក់​គ្នា នៅ​តំបន់​ក្បែរ​ប្រាសាទ​ព្រះវិហារ ចាប់​តាំង​ពី​ព្រឹក​រហូត​ដល់​ល្ងាច​ថ្ងៃ​សុក្រ ហើយ​កងទ័ព​កម្ពុជា​បាន​ត្រៀម​ខ្លួន​ជា​ស្រេច​ដើម្បី​ការ​ពារ​មិន​ឲ្យ​ទាហាន​ថៃ​ចូល​ទៅ​ដក​ទង់​ជាតិ​ខ្មែរ​ក្នុង​ទី​វត្ត​ខ្មែរ​បាន​ទេ។

មន្ត្រី​យោធា​ម្នាក់​ប្រចាំ​នៅ​ប្រាសាទ​ព្រះវិហារ​សុំ​មិន​បញ្ចេញ​ឈ្មោះ​មាន​ប្រសាសន៍​ថា ទាហាន​ថៃ​បាន​រៀបចំ​កម្លាំង​ខ្លួន​តាំង​ពី​យប់​ថ្ងៃ​ព្រហស្បតិ៍ ទី​២៧ មករា ដើម្បី​ចូល​មក​ដក​ទង់​ជាតិ​កម្ពុជា ប្រសិន​បើ​កម្ពុជា​មិន​ព្រម​ដក​ទង់​ជាតិ​ខ្លួន​ចេញ ៖ "ថ្វីត្បិត​តែ​សភាព​ការណ៍​វា​តាន​តឹង​មែន ប៉ុន្តែ​បើ​ភាគី​ថៃ​នៅ​តែ​ឈ្លាន​ពាន​តំបន់​ដែល​យើង​ហាម​ឃាត់​នោះ យើង​ត្រូវ​ផ្ទុះ​អាវុធ​ភ្លាម។ តែ​បើ​ភាគី​មិន​ឈ្លាន​ពាន​តំបន់​កំណត់​យើង​ក៏​មិន​អាច​ផ្ទុះ​អាវុធ​ដែរ"

ការ​ទាម​ទារ​របស់​ថៃ ធ្វើ​ឡើង​ក្រោយ​ពេល​ដែល​ទាហាន​កម្ពុជា​បាន​បំផ្លាញ​ផ្ទាំង​ស្លាក​ថ្ម​ចំនួន​ពីរ​ផ្ទាំង តាម​សំណូមពរ​របស់​រដ្ឋាភិបាល​ថៃ។ ផ្ទាំង​ស្លាក​ថ្ម​ចំនួន​ពីរ​ផ្ទាំង​ត្រូវ​បាន​ដាក់​ដោយ​កង​ទ័ព​កម្ពុជា នៅ​ក្បែរ​ប្រាសាទ​ព្រះវិហារ ដែល​មាន​ខ្លឹមសារ​ថា ទី​តាំង​ផ្ទាំង​ស្លាក​ថ្ម​នេះ ជា​កន្លែង​ថៃ​ឈ្លាន​ពាន​កម្ពុជា ហើយ​ទីនេះ​ជា​ទឹក​ដី​កម្ពុជា។ ភាគី​ថៃ​បាន​ទាម​ទារ​ឲ្យ​កម្ពុជា​រុះរើ​ផ្ទាំង​ថ្ម​ទាំង​នោះ​ចេញ ដោយ​សារ​ខ្លួន​សំអាង​ថា ផ្ទៃ​ដី​ទំហំ ៤,៦ គីឡូ​ម៉ែត្រ​ការ៉េ ក្បែរ​ប្រាសាទ​ព្រះវិហារ​កំពុង​ឋិត​ក្នុង​ជម្លោះ​ទឹក​ដី ដូច្នោះ​គ្មាន​ភាគី​ណា​មួយ​អាច​អះអាង​ថា ជា​ទឹកដី​របស់​ខ្លួន​បាន​ទេ។

នាយក​រដ្ឋ​មន្រ្តី​ថៃ លោក អាប់ភីស៊ីត វិជ្ជាជីវ៉ា (Abhisit Vejjajiva) កាល​ពី​ថ្ងៃ​ទី​២៧ មករា ឆ្នាំ​២០១១ បាន​ទាម​ទារ​ឲ្យ​កម្ពុជា​ទម្លាក់​ទង​ជាតិ​ចេញ​ពី​ទីតាំង​វត្ត​កែវ​សិក្ខា​គិរី​ស្វារៈ ដោយ​បាន​អះអាង​ថា កម្ពុជា​គ្មាន​សិទ្ធិ​ដាក់​ទង់​ជាតិ​កម្ពុជា​នៅ​ក្នុង​តំបន់​ជម្លោះ។ នាយក​រដ្ឋ​មន្ត្រី​ថៃ​បន្ត​ទៀត​ថា ប្រសិន​បើ​មាន​ទង់​ជាតិ​កម្ពុជា​ក្នុង​តំបន់​ជម្លោះ​មែន ទង់​ជាតិ​នោះ​ត្រូវ​តែ​ទម្លាក់​ចោល។

ឆ្លើយ​តប​ទៅ​និង​ការ​ទាមទារ​របស់​នាយក​រដ្ឋ​មន្ត្រី​ថៃ ក្រសួង​ការ​បរទេស​កម្ពុជា នៅ​ថ្ងៃ​សុក្រ​បាន​បដិសេធន៍​មិន​ព្រម​ដក​ទង់​ជាតិ​កម្ពុជា​ចេញ​ពី​វត្ត​កែវ​សិក្ខា​គិរី​ស្វារៈ​ទេ ពីព្រោះ​វត្ត​កែវ​សិក្ខា​គិរី​ស្វារៈ​ជា​ទឹក​ដី​កម្ពុជា​ស្រប​ច្បាប់។ ក្រសួង​ការ​បរទេស​កម្ពុជា​បញ្ជាក់​ថា សាលក្រម​តុលាការ​យុត្តិធម៌​អន្តរ​ជាតិ​ឆ្នាំ​១៩៦២ បាន​កាត់​ក្តី​ករណី​ប្រាសាទ​ព្រះវិហារ​តាម​ផែនទី​ផលិត​ដោយ​គណៈកម្មការ​បារាំង-សៀម ដោយ​កំណត់​ថា ប្រាសាទ​ព្រះវិហារ​ស្ថិត​នៅ​ក្នុង​ដែនដី​ក្រោម​អធិបតេយ្យភាព​របស់​កម្ពុជា។

ក្រសួង​ការ​បរទេស​កម្ពុជា​បាន​បន្ត​ទៀត​ថា ការ​ទាម​ទារ​របស់​នាយក​រដ្ឋ​មន្ត្រី​ថៃ ស្រប​ពេល​ដែល​ទាហាន​ថៃ បាន​ធ្វើ​សមយុទ្ធ​យោធា​ជាប់​ព្រំដែន​កម្ពុជា ហើយ​កម្ពុជា​ចាត់​ទុក​ថា គឺ​ជា​ការ​ញុះញង់​ដើម្បី​ឈ្លាន​ពាន​ប្រឆាំង​និង​កម្ពុជា​នៅ​ថ្ងៃ​អនាគត។ ដូច្នោះ​ប្រទេស​កម្ពុជា​សូម​រក្សា​សិទ្ធិ​ស្រប​ច្បាប់ ដើម្បី​ការពារ​បូរណភាព និង​អធិបតេយ្យ​ភាព​ខ្លួន។

មន្រ្តី​ជាន់​ខ្ពស់​យោធា​កម្ពុជា នៅ​ថ្ងៃ​សុក្រ ទី​២៨ មករា បាន​ឲ្យ​ដឹង​ថា នាយក​រដ្ឋ​មន្រ្តី​កម្ពុជា លោក ហ៊ុន សែន បាន​បញ្ជា​ឲ្យ​ក្រសួង​ការ​ពារ​ជាតិ​បញ្ជូន​រថ​ក្រោះ និង​រថ​ពាស​ដែក​ទៅ​តំបន់​ប្រាសាទ​ព្រះ​វិហារ ដើម្បី​ត្រៀម​ប្រយុទ្ធ។

ទាហាន​ថៃ​ក៏​បាន​ត្រៀម​លក្ខណៈ​ធ្វើ​សង្គ្រាម​ជា​មួយ​កម្ពុជា​រួច​ជា​ស្រេច ដោយ​ពួក​គេ​បាន​បង្កើត​ផែន​ការ​សម្រាប់​សង្គ្រាម​ចំនួន ៥​ចំណុច ប្រសិន​កម្ពុជា​មិន​ព្រម​តាម​សំណើ​របស់​ខ្លួន។

កាសែត​ថៃ បាងកក​ប៉ុស្តិ៍ (Bangkok Post) ផ្សាយ​នៅ​ថ្ងៃ​សុក្រ​បាន​ឲ្យ​ដឹង​ថា ការ​គំរាម​ប្រើ​កម្លាំង​យោធា​របស់​ថៃ មក​លើ​កម្ពុជា​បាន​ជោគ​ជ័យ ដោយ​កម្ពុជា​ព្រម​កម្ទេច​ស្លាក​ផ្ទាំង​ថ្ម​ចំនួន​ពីរ​ផ្ទាំង។ ប្រភព​ម្នាក់​បាន​ប្រាប់​កាសែត​ថៃ​ថា ការ​គំរាម​ប្រើ​កម្លាំង​យោធា​ទៅ​លើ​កម្ពុជា ត្រូវ​បាន​អនុញ្ញាត​ពី​នាយក​រដ្ឋ​មន្ត្រី​ថៃ។ ផែនការ​ដាក់​គំនាប​ទៅ​លើ​កម្ពុជា​រួម​មាន​ដំបូង​យោធា​ថៃ ចាប់​ផ្ដើម​ធ្វើ​សមយុទ្ធ​យោធា​ដោយ​ប្រើប្រាស់​អាវុធ​ប្រភេទ​ធុន​ធំ បន្ទាប់​មក​ទៀត​ទាហាន​ថៃ​បួន​ក្រុម និង​ចាប់​ផ្ដើម​ប្រយុទ្ធ​ប្រសិន​បើ​ទាហាន​កម្ពុជា​មិន​ព្រម​ដក​ផ្ទាំង​ស្លាក​ថ្ម​ចេញ។ ក្រុម​ទាហាន​ថៃ​ត្រៀម​នឹង​ប្រើប្រាស់​អាវុធ​ធុន​ធំ​បាញ់​នៅ​ជិត​ទីនោះ បន្ទាប់​មក​ទាហាន​ថៃ​នឹង​ប្រើ​ប្រាស់​កង​ទ័ព​អាកាស​របស់​ខ្លួន និង​រារាំង​មិន​ឲ្យ​ប្រជា​ពល​រដ្ឋ​ថៃ ឆ្លង​ចូល​លេង​ល្បែង​កាស៊ីណូ​នៅ​ប៉ោយប៉ែត។

លោក ជាម យៀប ប្រធាន​គណៈកម្មការ​សេដ្ឋកិច្ច ហិរញ្ញវត្ថុ ធនាគារ សភា​ជាតិ​កម្ពុជា នៅ​ថ្ងៃ​សុក្រ ទី​២៨ មករា មាន​ប្រសាសន៍​ឲ្យ​ដឹង​ថា រដ្ឋាភិបាល​កម្ពុជា​បាន​ត្រៀម​ថវិកា​បម្រុង​គ្រប់​គ្រាន់ សម្រាប់​ប្រើ​ប្រាស់​ដើម្បី​ការ​ពារ​ប្រទេស ប្រសិន​បើ​កម្ពុជា​មាន​សង្គ្រាម​និង​ប្រទេស​ថៃ ៖ "កន្លង​មក​យើង​ត្រៀម​លក្ខណៈ ដើម្បី​ការ​ពារ​បូរណភាព​គ្រប់​ជ្រុង​ជ្រោយ ទាំង​ជា​មួយ​វៀតណាម ឡាវ ទាំង​ជា​មួយ​សៀម"

លោក ជាម យៀប បន្ត​ថា​ប្រទេស​ជា​មិត្ត​របស់​កម្ពុជា​ដូច​ប្រទេស​វៀតណាម និង​ចិន​ប្រហែល​ជា​ជួយ​កម្ពុជា ប្រ​សិន​បើ​មាន​ការ​ឈ្លាន​ពាន​ពី​សំណាក់​ប្រទេស​ថៃ ហើយ​ចំពោះ​រូប​លោក​ផ្ទាល់ លោក​នឹង​ស្ម័គ្រ​ចិត្ត​ធ្វើ​ទាហាន ប្រសិន​បើ​ប្រទេស​កម្ពុជា​ត្រូវ​ការ​លោក។

ក្រសួង​ការពារ​ជាតិ​កម្ពុជា​ក្នុង​កិច្ច​ខំ​ប្រឹងប្រែង​ពង្រឹង​សមត្ថភាព​កង​យោធពល​ខេមរភូមិន្ទ កាល​ពី​ខែ​កញ្ញា ឆ្នាំ​២០១០ បាន​ទិញ​រថក្រោះ និង​រថ​ពាស​ដែក​ថ្មី​ចំនួន​៩៦​គ្រឿង ពី​អឺរ៉ុប​ខាង​កើត ដើម្បី​ការ​ពារ​ពី​ការ​ឈ្លាន​ពាន​របស់​បរទេស។ ប៉ុន្តែ​ទោះបី​កម្ពុជា​បាន​ត្រៀម​លក្ខណៈ​ជា​មុន​ក៏​ដោយ របាយ​ការណ៍​មួយ​ចំនួន​បញ្ជាក់​ថា សមត្ថភាព​យោធា​របស់​កម្ពុជា​នៅ​មាន​កម្រិត បើ​ប្រៀបធៀប​ទៅ​នឹង​ប្រទេស​ថៃ។

គេហទំព័រ​ភ្នាក់ងារ​ស៊ើប​ការណ៍​កណ្ដាល​របស់​សហ​រដ្ឋ​អាមេរិក (CIA) បាន​ឲ្យ​ដឹង​ថា ធនធាន​មនុស្ស​នៅ​កម្ពុជា​សម្រាប់​ធ្វើ​ទាហាន​មាន​ចំនួន ៤​លាន​នាក់ ចំណែក​ប្រទេស​ថៃ​វិញ មាន​ធនធាន​មនុស្ស​សម្រាប់​ធ្វើ​ទាហាន​មាន​រហូត​ទៅ​ដល់ ២៧​លាន​នាក់។

លោក ជាម យៀប បន្ថែម​ទៀត​ថា ទោះបី​សមត្ថភាព​យោធា​នៅ​កម្ពុជា​នៅ​មាន​កម្រិត ប៉ុន្តែ​កង​ទ័ព​កម្ពុជា​មាន​ទឹក​ចិត្ត​ដើម្បី​ធ្វើ​សង្គ្រាម​ការ​ពារ​ប្រទេស​ខ្លួន ៖ "យើង​មិន​ថា​យើង​ល្អ​ជាង ខ្លាំង​ជាង​ទេ ប៉ុន្តែ​យើង​ជា​ជន​រង​គ្រោះ ត្រូវ​គេ​ឈ្លាន​ពាន​រំលោភ។ យើង​ឈឺ​ចិត្ត ទី​មួយ យើង​មាន​ទឹក​ចិត្ត​ដើម្បី​ការ​ពារ​ខ្លួន​យើង ការ​ពារ​បូរណភាព​យើង​ខ្លាំង​ជាង​អ្នក​ដែល​រំលោភ​គេ វា​មិន​សូវ​មាន​ទឹក​ចិត្ត​ប៉ុន្មាន​នោះ​ទេ"

អ្នក​វិភាគ​ស្ថានភាព​ថៃ-កម្ពុជា បាន​ឲ្យ​ដឹង​ថា ស្ថានភាព​តាន​តឹង​យោធា​កម្ពុជា-ថៃ ក៏​អាច​បណ្ដាល​មក​ពី​ការ​ដណ្ដើម​អំណាច​រវាង​ក្រុម​អាវ​លឿង និង​គណ​បក្ស​កាន់​អំណាច​របស់​លោក អាប់ភីស៊ីត វិជ្ជាជីវ៉ា ដែរ។

ក្រុម​អ្នក​ស្នេហា​ជាតិ​ថៃ ឬ​ក្រុម​សម្ពន្ធភាព​ប្រជា​ជន​ដើម្បី​លទ្ធិ​ប្រជាធិបតេយ្យ កាល​ថ្ងៃ​ទី​២៥ មករា ឆ្នាំ​២០១១ បាន​ចាប់​ផ្ដើម​ប្រមូល​ផ្តុំ​គ្នា​តវ៉ា​នៅ​ទីក្រុង​បាងកក ដើម្បី​សំដែង​ការ​មិន​ពេញ​ចិត្ត​របស់​ខ្លួន ប្រឆាំង​និង​រដ្ឋាភិបាល​ថៃ ក្នុង​ការ​ដោះ​ស្រាយ​ជម្លោះ​ព្រំដែន​កម្ពុជា-ថៃ។ ទី​ភ្នាក់ងារ​ព័ត៌មាន​បារាំង (AFP) ផ្សាយ​កាល​ពី​ថ្ងៃ​អង្គារ បាន​ដក​ស្រង់​សំដី​របស់​មេ​ដឹក​នាំ​ក្រុម​អាវ​លឿង​ថៃ​ម្នាក់​ថា ការ​តវ៉ា​នេះ​ធ្វើ​ឡើង​ក្រោយ​ពី​រដ្ឋាភិបាល​ខ្លួន​បរាជ័យ​ក្នុង​ការ​ដោះ​ស្រាយ​សំណើ​របស់​ក្រុម​អាវ​លឿង ដើម្បី​លុប​ចោល​អនុស្សរណៈ​ឆ្នាំ​២០០០ និង​បណ្ដេញ​ប្រជា​ពល​រដ្ឋ​កម្ពុជា​ចេញ​ពី​តំបន់​ជម្លោះ​ក្បែរ​ប្រាសាទ​ព្រះវិហារ។ ក្រុម​អាវ​លឿង​នឹង​បន្ត​ធ្វើ​បាតុកម្ម​របស់​ខ្លួន​ជា​បន្ត​ទៀត ដោយ​គ្មាន​ពេល​កំណត់ រហូត​ដល់​ក្រុម​នេះ​បាន​ជោគ​ជ័យ៕

ព័ត៌មាន (0)
Share
គេហទំព័រ​ទាំងមូល