ថៃ​ប៉ុនប៉ង​ដាក់​ទង់ជាតិ​របស់​ខ្លួន​នៅ​វត្ត​កែវ​សិក្ខា​គិរី​ស្វារៈ

ប្រភព​ពី​មន្ត្រី​យោធា​ខ្មែរ​បាន​ឲ្យ​ដឹង​កាល​ពី​ថ្ងៃ​សៅរ៍​កន្លង​ទៅ​នេះ​ថា កង​ទ័ព​ថៃ​បាន​លើក​ទ័ព អម​ដោយ​ទង់​ជាតិ​របស់​ខ្លួន ក្នុង​បំណង​យក​ទង់​ជាតិ​មក​បោះ​នៅ​មុខ​វត្ត​កែវ​សិក្ខា​គិរី​ស្វារៈ។
ដោយ តាំង សារ៉ាដា
2011-01-30
អ៊ីម៉ែល
មតិ
Share
បោះពុម្ព
ទាហាន​ថៃ​ដើរ​ក្បែរ​តំបន់​​ប្រាសាទ​ព្រះវិហារ​ខ្មែរ​នៅ​ថ្ងៃ​ទី​១៩ កក្កដា ២០០៨។
ទាហាន​ថៃ​ដើរ​ក្បែរ​តំបន់​​ប្រាសាទ​ព្រះវិហារ​ខ្មែរ​នៅ​ថ្ងៃ​ទី​១៩ កក្កដា ២០០៨។
RFA File Photo/Savyouth

ក្រុម​មន្ត្រី​យោធា​ខ្មែរ​ដែល​កំពុង​ការ​ពារ​ព្រំដែន​នៅ​តំបន់​ប្រាសាទ​ព្រះវិហារ បាន​ថ្លែង​ក្នុង​លក្ខខ័ណ្ឌ​មិន​បញ្ចេញ​ឈ្មោះ​ថា កាល​ពី​រសៀល​ថ្ងៃ​សុក្រ កង​ទ័ព​ថៃ​បាន​លើក​ទ័ព​អម​ដោយ​ទង់​ជាតិ​របស់​ខ្លួន ក្នុង​គោល​បំណង​យក​មក​បោះ​នៅ​មុខ​វត្ត​កែវ​សិក្ខា​គិរី​ស្វារៈ។

ប្រភព​ដដែល​បាន​ឲ្យ​ដឹង​ថា ខណៈ​កង​ទ័ព​ថៃ​ត្រៀម​យក​ទង់​ជាតិ​របស់​ខ្លួន​មក​បោះ​នៅ​មុខ​វត្ត​កែវ​សិក្ខា​គិរី​ស្វារៈ កង​ទ័ព​ខ្មែរ ដែល​កំពុង​ត្រៀម​យាម​កាម​នៅ​ទី​នោះ បាន​បក់​ដៃ​ហៅ​ក្រុម​យោធា​ថៃ​ទាំង​នោះ​ឲ្យ​ចូល​មក ប៉ុន្តែ​ពួក​ទាហាន​ថៃ​បាន​ដក​ថយ​ទៅ​វិញ។

អ្នក​នាំ​ពាក្យ​ក្រសួង​ការ​ពារ​ជាតិ​កម្ពុជា លោក​ឧត្ដម​សេនីយ៍ ឈុំ សុជាតិ បាន​មាន​ប្រសាសន៍​ទាក់​ទង​រឿង​នេះ​ថា ថៃ​មិន​អាច​ធ្វើ​ដូច្នោះ​បាន​ទេ ខណៈ​កង​កម្លាំង​របស់​កម្ពុជា​កំពុង​ការ​ពារ​បូរណភាព​ទឹក​ដី​របស់​ខ្លួន​នោះ ៖ «ថៃ​មិន​អាច​ធ្វើ​អ៊ីចឹង​បាន​ទេ ព្រោះ​កង​ទ័ព​របស់​យើង​នៅ​ពេញ​ទី​នោះ។ នេះ​ជា​ព័ត៌មាន​មិន​ពិត។»

កាល​ពី​ថ្ងៃ​សុក្រ កង​ទ័ព​របស់​កម្ពុជា និង​ថៃ​បាន​ដាក់​ពង្រាយ​កង​កម្លាំង​យោធា និង​អាវុធយុទ្ធភណ្ឌ​ធន​ធ្ងន់​នៅ​តាម​ព្រំដែន ក្បែរ​តំបន់​ប្រាសាទ​ព្រះវិហារ​រៀង​ៗ​ខ្លួន។

ភាព​តាន​តឹង​រវាង​កម្ពុជា និង​ថៃ​បាន​កើត​ឡើង​សា​ជា​ថ្មី បន្ទាប់​ពី​ប្រទេស​ថៃ​ទាម​ទារ​ឲ្យ​កម្ពុជា​ដោះ​ទង់​ជាតិ​របស់​ខ្លួន ចេញ​ពី​មុខ​វត្ត​កែវ​សិក្ខា​គិរី​ស្វារៈ ដែល​ថៃ​អះអាង​ទី​តាំង​នោះ ស្ថិត​នៅ​ជា​តំបន់​ជម្លោះ​នៅ​ឡើយ។

ក្រសួង​ការ​បរទេស​កម្ពុជា កាល​ពី​ថ្ងៃ​សុក្រ​បាន​ចេញ​សេចក្ដី​ប្រកាស​ព័ត៌មាន​បដិសេធ​ដាច់​អហង្ការ​ចំពោះ​នាយក​រដ្ឋ​មន្ត្រី​ថៃ លោក Abhisit Vejjajiva ក្នុង​ការ​ទាមទារ​ឲ្យ​កម្ពុជា​ដោះ​ទង់​ជាតិ​របស់​ខ្លួន ចេញ​ពី​មុខ​វត្ត​កែវ​សិក្ខា​គិរី​ស្វារៈ​នោះ​ដែរ។

លោក​មាន​ប្រសាសន៍​បន្ត​ថា កង​ទ័ព​របស់​កម្ពុជា​តស៊ូ​អស់​ពី​កម្លាំង​កាយ កម្លាំង​ចិត្ត ដើម្បី​ការពារ​ទឹក​ដី​របស់​ខ្មែរ មិន​ឲ្យ​មាន​ការ​ឈ្លាន​ពាន​ណា​មួយ​ពី​បរទេស​ទេ ៖ «យើង​កំពុង​ប្រុងប្រៀប​សម្រាប់​រាល់​ស្ថានការណ៍​ទាំង​អស់ ដែល​អាច​កើត​មាន​ឡើង។ យើង​ត្រៀម​លក្ខណៈ​ប្រយុទ្ធ​ជា​និច្ច​ជា​កាល ដើម្បី​ការ​ពារ​មាតុភូមិ​របស់​យើង ក្នុង​កាលៈ​ទេសៈ​ណា​ក៏​ដោយ យើង​មិន​អាច​ឲ្យ​សត្រូវ​ឈ្លាន​ពាន​បាន​ទេ។»

កាល​ពី​ថ្ងៃ​ពុធ ទី​២៦ កន្លង​ទៅ​នេះ កម្ពុជា​បាន​សម្រេច​កម្ទេច​ផ្ទាំង​ថ្ម ដែល​ដាក់​ក្បែរ​វត្ត​កែវ​សិក្ខា​គីរី​ស្វារៈ ដែល​បញ្ជាក់​អំពី​ទី​កន្លែង​ដែល​កង​ទ័ព​សៀម​ឈ្លាន​ពាន​កម្ពុជា​ចេញ ក្រោយ​ពី​មាន​ការ​ទទូច​ទាម​ទារ​ឲ្យ​ដក​ពី​សំណាក់​ប្រមុខ​រដ្ឋាភិបាល​ថៃ។

ផ្ទាំង​ថ្ម​ដែល​កម្ពុជា​ដក​ចេញ​នោះ បាន​សរសេរ​ថា នៅ​ទី​នេះ​ជា​កន្លែង​កង​ទ័ព​សៀម​ចូល​មក​ឈ្លាន​ពាន​ទឹក​ដី​កម្ពុជា កាល​ពី​ថ្ងៃ​ទី​១៥ ខែ​កក្កដា ឆ្នាំ​២០០៨ ហើយ​ដក​ទ័ព​ទៅ​វិញ​នៅ​វេលា​ម៉ោង​១០ និង​៣០​នាទី​ព្រឹក ថ្ងៃ​ទី​១ ខែ​ធ្នូ ឆ្នាំ​២០១០។ ផ្ទាំង​ថ្ម​នេះ បាន​សរសេរ​ជំនួស​ដោយ​ពាក្យ​ថា ទី​នេះ​កម្ពុជា។

ជម្លោះ​ព្រំដែន​កម្ពុជា-ថៃ បាន​កើត​ឡើង​នៅ​ពេល​ដែល​ប្រាសាទ​ព្រះវិហារ ត្រូវ​បាន​ដាក់​បញ្ចូល​ក្នុង​បញ្ជី​បេតិកភណ្ឌ​ពិភព​លោក កាល​ពី​ខែ​កក្កដា ឆ្នាំ​២០០៨ ហើយ​ថៃ​បាន​អះអាង​ថា ដី​ទំហំ ៤,៦​គីឡូ​ម៉ែត្រ​ការ៉េ ក្បែរ​ប្រាសាទ​ព្រះវិហារ ជា​ទឹក​ដី​របស់​ខ្លួន។ ទាហាន​ថៃ និង​កម្ពុជា បាន​ប្រយុទ្ធ​គ្នា​ចំនួន ៣​លើក​កន្លង​មក បាន​បណ្ដាល​ឲ្យ​កងទ័ព​ទាំង​សង​ខាង​ស្លាប់ និង​របួស​រៀងៗខ្លួន៕

ព័ត៌មាន (2)
Share

អ្នក​អាន​អនាមិក

hey stupip thai(seim) goverment.what's wrong with your brain?you know how many province where you stole from Combodia,bitch?your ambition never end? Why piggy? you must stop ur moronic
dreaming,now.we suggest to Cambodia must give them(seim) some lesson.Do not be patien any more.best kick them's ass.

Feb 01, 2011 11:31 PM

អ្នក​អាន​អនាមិក

ពត៌មានរបស់អ្នកមានសភាពយឺតយ៉ាវណាស់។​ គួរតែកែលំអលើចំនុចយឺតយ៉ាវនេះចេញ

Jan 30, 2011 04:14 AM

គេហទំព័រ​ទាំងមូល