សង្ឃ​ខ្មែរ​ក្រោម​ស្វែង​រក​អន្តរាគមន៍​ពី​អង្គការ​សហ​ប្រជា​ជាតិ

ព្រះ​សង្ឃ​ខ្មែរ​កម្ពុជា​ក្រោម​មួយ​ព្រះអង្គ គង់​នៅ​វត្ត​សាមគ្គី​រង្សី សង្កាត់​ស្ទឹង​មានជ័យ ខណ្ឌ​មានជ័យ រាជ​ធានី​ភ្នំពេញ កំពុង​ភ័យ​ប៉ូលិស​ចាប់​ខ្លួន។
ដោយ ទីន ហ្សាការីយ៉ា
2011-12-28
Share
សង្ឃខ្មែរក្រោម៣០៥ ប៉ូលិស​កម្ពុជា​បង្ក្រាប​ព្រះ​សង្ឃ​ខ្មែរ​ក្រោម​ធ្វើ​បាតុកម្ម​នៅ​ខាង​មុខ​ស្ថានទូត​វៀតណាម ប្រចាំកម្ពុជា កាលពី​ថ្ងៃ​ទី​១៧ ខែ​ធ្នូ ឆ្នាំ​២០០៧
RFA/Quoc Viet

អង្គការ​សមាគម​ខ្មែរ​កម្ពុជា​ក្រោម​ចំនួន​១១ នៅ​កម្ពុជា បាន​ផ្ញើ​របាយការណ៍​រួម​គ្នា​ទៅ​ការិយាល័យ​ឧត្ដម​ស្នងការ​នៃ​អង្គការ​សហ​ប្រជា​ជាតិ​ទទួល​បន្ទុក​ផ្នែក​សិទ្ធិ​មនុស្ស និង​អង្គការ​សិទ្ធិ​មនុស្ស​នៅ​ក្នុង​ស្រុក​មួយ​ចំនួន​ទៀត នៅ​ថ្ងៃ​ទី​២៨ ខែ​ធ្នូ ឆ្នាំ​២០១១។

របាយការណ៍​រួម​គ្នា ដែល​ផ្ញើ​ទៅ​កាន់​ស្ថាប័ន​សិទ្ធិ​មនុស្ស​ជាតិ និង​អន្តរ​ជាតិ​នេះ ដើម្បី​ស្នើ​សុំ​ឲ្យ​អង្គការ​សិទ្ធិ​មនុស្ស​ទាំង​នោះ ធ្វើ​អន្តរាគមន៍​ជួយ​ព្រះ​សង្ឃ​ខ្មែរ​កម្ពុជា​ក្រោម​ព្រះ​នាម សៀង សុវណ្ណរា ដែល​​សាលា​ដំបូង​រាជ​ធានី​ភ្នំពេញ បាន​និមន្ត​សាក​សួរ​កាល​ពី​ថ្ងៃ​ទី​២១ ធ្នូ ឆ្នាំ​២០១១ ចោទ​ប្រកាន់​ពី​បទ​ញុះញង់​ឲ្យ​ប្រព្រឹត្តិ​បទ​ល្មើស​ជា​អាទិ៍។ និង​ករណី​ព្រះ​ចៅ​អធិការ​វត្ត​មួយ​អង្គ​ទៀត ដែល​ត្រូវ​គេ​បណ្ដេញ​ចេញ​ពី​វត្ត​នៅ​ខែត្រ​កណ្ដាល កាល​ពី​ដើម​ខែ​វិច្ឆិកា ឆ្នាំ​២០១១ ដោយ​គ្មាន​មូលហេតុ។

នាយក​កម្ម​វិធី​នៃ​សមាគម​ខ្មែរ​កម្ពុជា​ក្រោម​ដើម្បី​សិទ្ធិ​មនុស្ស និង​អភិវឌ្ឍន៍ លោក សឺន ជំជួន មាន​ប្រសាសន៍​ថា ការ​ធ្វើ​របាយការណ៍​ទៅ​ឧត្ដម​ស្នងការ​សហ​ប្រជា​ជាតិ​ទទួល​បន្ទុក​ផ្នែក​សិទ្ធិ​មនុស្ស​នេះ មាន​គោល​បំណង​ពីរ​សំខាន់ ទី​១ សុំ​ឲ្យ​ស្ថាប័ន​សិទ្ធិ​មនុស្ស​អន្តរ​ជាតិ​មួយ​នេះ ជួយ​អន្តរាគមន៍​ឲ្យ​ព្រះ​សង្ឃ​ដើម​កំណើត​ខ្មែរ​ក្រោម ព្រះ​នាម ជា សុវណ្ណភូមិ មាន​សិទ្ធិ​គង់​នៅ​វត្ត​ព្រែក​ឫស នៅ​ឃុំ​សំបួរ​មាស ស្រុក​មុខ​កំពូល ខែត្រ​កណ្ដាល ដែល​គេ​បាន​បណ្ដេញ​ព្រះ​អង្គ​ចេញ​ពី​វត្ត​កាល​ពី​ខែ​វិច្ឆិកា​កន្លង​ទៅ។

ទី​២ សុំ​ឲ្យ​ធ្វើ​អន្តរាគមន៍​ទៅ​សាលា​ដំបូង​រាជ​ធានី​ភ្នំពេញ លើក​លែង​ការ​ចោទ​ប្រកាន់​ព្រះ​សង្ឃ​ខ្មែរ​កម្ពុជា​ក្រោម​មួយ​អង្គ​ទៀត ព្រះ​នាម សៀង សុវណ្ណារា ដែល​សាលា​ដំបូង​រាជ​ធានី​ភ្នំពេញ​ចោទ​ប្រកាន់​ព្រះ​អង្គ​ថា​ជាប់​ពាក់ព័ន្ធ​ជា​មួយ​ក្រុម​របស់​លោក សួន សេរីរដ្ឋា នៅ​សហ​រដ្ឋ​អាមេរិក ៖ "ដោយ​សារ​ធ្វើ​កន្លង​មក​ហ្នឹង​មិន​មាន​ការ​សម្រេច​ណា​មួយ​ច្បាស់​លាស់​ពី​គណៈ​សង្ឃ​ខែត្រ​ទេ ហើយ​ការ​បណ្ដេញ​ព្រះ​អង្គ ជា សុវណ្ណភូមិ ហ្នឹង ឲ្យ​ចេញ​មិន​ឲ្យ​គង់​នៅ​វត្ត​ណា​ៗ ទាំង​អស់ ឲ្យ​តែ​ស្ថិត​នៅ​ខែត្រ​កណ្ដាល ខ្ញុំ​គិត​ថា ការ​ធ្វើ​ដូច្នេះ​ជា​រឿង​អយុត្តិធម៌​សម្រាប់​លោក ហើយ​ឥឡូវ​នេះ មិន​ដឹង​ថា​ព្រះ​អង្គ​គង់​នៅ​ទី​ណា​ផង"

លោក សួន សេរីរដ្ឋា ជា​ប្រធា​គណៈកម្មាធិការ​ប្រព្រឹត្តិកម្ម​ដើម្បី​យុត្តិធម៌ និង​សមធម៌ ដែល​លោក​បាន​ប្រឆាំង​និង​រដ្ឋាភិបាល​កម្ពុជា។ ហើយ​កាល​ពី​ថ្ងៃ​ទី​២១ ធ្នូ ឆ្នាំ​២០១១ នោះ ក្រឡា​បញ្ជី​សាលា​ដំបូង​រាជ​ធានី​ភ្នំពេញ លោក សេង សុខា បាន​សាក​សួរ​ព្រះ​តេជ​គុណ សៀង សុវណ្ណារា ទាក់ទង​ទៅ​នឹង​ករណី​លោក សួន សេរីរដ្ឋា នេះ តែ​ព្រះ​តេជ​គុណ សៀង សុវណ្ណារា បាន​បដិសេធ ហើយ​អះអាង​ថា ព្រះ​អង្គ​មិន​ដែល​ស្គាល់​លោក សួន សេរីរដ្ឋា នោះ​ឡើយ។

ព្រះ​តេជ​គុណ សៀង សុវណ្ណារា មាន​ថេរដីកា​នៅ​ថ្ងៃ​ទី​២៨ ធ្នូ ដោយ​ព្រះ​អង្គ​បាន​លើក​ជា​ចម្ងល់​ថា ព្រះ​អង្គ​មិន​ដែល​ស្គាល់​លោក សួន សេរីរដ្ឋា ឬ​ក្រុម​របស់​លោក សួន សេរីរដ្ឋា នោះ​ទេ ប៉ុន្តែ​មូល​ហេតុ​អ្វី​បាន​ជា​តុលាការ​និមន្ត​ព្រះ​អង្គ​សួរ​អំពី​ករណី​នេះ​ទៅ​វិញ។ ទាក់​ទង​ទិង​បញ្ហា​នេះ ព្រះ​តេជ​គុណ សៀង សុវណ្ណារា មាន​ថេរដីកា​បញ្ជាក់​ថា ព្រះ​អង្គ​កំពង់​ស្ថិត​ក្នុង​ភាព​ភ័យ​ខ្លាច ៖ "បច្ចុប្បន្ន​នេះ អាត្មា​នៅ​តែ​ភ័យ​ខ្លាច​ចំពោះ​សុវត្ថិភាព​របស់​អាត្មា ដូច្នេះ​អាត្មា​សុំ​ឲ្យ​បញ្ចប់​ឲ្យ​បាន​ឆាប់ៗ ទៅ ដើម្បី​ឲ្យ​អាត្មា​គង់​នៅ​សុខ​ក្នុង​វត្ត​ផង កុំ​ឲ្យ​មាន​បញ្ហា​អី​កើត​ឡើង​ចំពោះ​អាត្មា​ទៀត"

រហូត​មក​ទល់​ថ្ងៃ​ទី​២៨ ខែ​ធ្នូ ឆ្នាំ​២០១១ នេះ សាលា​ដំបូង​រាជ​ធានី​ភ្នំពេញ​មិន​ទាន់​ផ្ដល់​ដំណឹង​ថា​យ៉ាង​ណា​នៅ​ឡើយ​ទេ ទាក់​ទង​ទៅ​នឹង​ករណី​និមន្ត​សាក​សួរ​ព្រះ​តេជ​គុណ សៀង សុវណ្ណារា កាល​ពី​ថ្ងៃ​ទី​២១ ធ្នូ ឆ្នាំ​២០១១។

នៅ​ក្នុង​របាយការណ៍​របស់​អង្គការ​សមាគម​ខ្មែរ​កម្ពុជា​ក្រោម​ចំនួន​១១ នោះ បាន​សរសេរ​បញ្ជាក់​អំពី​ក្ដី​ព្រួយ​បារម្ភ​អំពី​ករណី​ព្រះ​សង្ឃ​ខ្មែរ​កម្ពុជា​ក្រោម​ទាំង​ពីរ​ព្រះ​អង្គ​នេះ​ថា ប្រសិន​បើ​មិន​មាន​ដំណោះ​ស្រាយ​ចំពោះ​ព្រះ​សង្ឃ​ខ្មែរ​កម្ពុជា​ក្រោម​ទាំង​ពីរ​ព្រះ​អង្គ ឲ្យ​បាន​ច្បាស់​លាស់​ក្នុង​ការ​ផ្ដល់​យុត្តិធម៌​ជូន​ព្រះ​អង្គ​ទេ នៅ​ថ្ងៃ​អនាគត ប្រហែល​នឹង​មាន​បញ្ហា​ដទៃ​ទៀត​កើត​ឡើង​ចំពោះ​ព្រះ​សង្ឃ និង​បង​ប្អូន​ខ្មែរ​កម្ពុជា​ក្រោម​ទៀត។

ទាក់​ទង​ទៅ​និង​បញ្ហា​នេះ ប្រធាន​សហគមន៍​ខ្មែរ​កម្ពុជា​ក្រោម​លោក ថាច់ សេដ្ឋា បាន​ពន្យល់​ថា សកម្មភាព​របស់​ព្រះ​សង្ឃ​ខ្មែរ​កម្ពុជា​មួយ​ចំនួន និង​អង្គការ​សមាគម​ខ្មែរ​កម្ពុជា​ក្រោម​នៅ​កម្ពុជា គឺ​គ្មាន​សកម្មភាព​អ្វី​ក្រៅ​ពី​ធ្វើ​ការ​ទាម​ទារ​សិទ្ធិ​សេរីភាព និង​ទាមទារ​សិទ្ធិ​កាន់​កាប់​ដី​ស្រែ​ចម្ការ​នៅ​ប្រទេស​វៀតណាម ពី​អាជ្ញាធរ​វៀតណាម នៅ​ខណៈ​ដែល​មាន​មន្ត្រី​ជាន់​ខ្ពស់​វៀតណាម​មក​បំពេញ​ទស្សនកិច្ច​នៅ​កម្ពុជា​ម្ដង​ៗ នោះ។ ពួក​គាត់​គ្មាន​បំណង​ណា​មួយ​ធ្វើ​ការ​ប្រឆាំង​និង​រដ្ឋាភិបាល​កម្ពុជា​នោះ​ឡើយ ៖ "ដូច្នេះ​ខ្ញុំ​សូម​ជម្រាប​ជា​សាធារណៈ​ទៅ​ថា អង្គការ​សមាគម​ខ្មែរ​កម្ពុជា​ក្រោម​បង្កើត​ឡើង​ដើម្បី​ការ​ពារ​សិទ្ធិ​រស់​នៅ​របស់​ប្រជា​ពល​រដ្ឋ​ខ្មែរ​ក្រោម និង​វប្បធម៌ សាសនា ប្រពៃណី​របស់​ខ្មែរ​ក្រោម​នៅ​ទឹក​ដី​ខ្មែរ​ក្រោម​ទេ ដូច្នេះ​ការ​ចោទ​ប្រកាន់​ថា ខ្មែរ​កម្ពុជា​ក្រោម​ចង់​ផ្ដួល​រដ្ឋាភិបាល ដើម្បី​កាន់​អំណាច​អី អត់​មាន​ទាល់​តែ​សោះ ដូច្នេះ​ការ​លាប​ពណ៌​ចោទ​ប្រកាន់​ថា​ចង់​ប្រឆាំង​និង​រដ្ឋាភិបាល​អី ជា​ការ​លាប​ពណ៌​ចង់​បំបាក់​ស្មារតី​ខ្មែរ​កម្ពុជា​ក្រោម​ទេ"

លោក ថាច់ សេដ្ឋា បាន​លើក​ឡើង​ទៀត​ថា អង្គការ​សមាគម​ខ្មែរ​កម្ពុជា​ក្រោម រួម​មាន​ព្រះ​សង្ឃ​ផង​នោះ កន្លង​មក​តែង​ទទួល​នូវ​ការ​បង្ក្រាប​ពី​អាជ្ញាធរ​កម្ពុជា នៅ​ពេល​ពួក​គេ​បាន​ធ្វើ​ការ​ទាម​ទារ​សិទ្ធិ​សេរីភាព និង​បញ្ហា​ផ្សេងៗ រហូត​ដល់​មាន​ការ​សម្លាប់​ព្រះ​សង្ឃ​ខ្មែរ​កម្ពុជា​ក្រោម​ទៀត​កន្លង​មក ប៉ុន្តែ​រហូត​មក​ទល់​ពេល​នេះ គេ​មិន​ទាន់​រក​យុត្តិធម៌​ជួន​នៅ​ឡើយ ៖ "ដូច​ជា​ការ​តវ៉ា​អាជ្ញាធរ យួន​ចាប់​ប្រជា​ពល​រដ្ឋ និង​ព្រះ​សង្ឃ​ខ្មែរ​កម្ពុជា​ក្រោម​អី យើង​តែង​តែ​នាំ​គ្នា​បាតុកម្ម​ទាមទារ​សិទ្ធិ និង​ការ​រំលោភ​នៅ​ប្រទេស​កម្ពុជា យើង​ក៏​មាន​ការ​ធ្វើ​បាតុកម្ម ប៉ុន្តែ​តែង​តែ​មាន​ការ​បង្ក្រាប​ពី​អាជ្ញាធរ​កម្ពុជា រហូត​ដល់​មាន​ការ​សម្លាប់​ព្រះ​សង្ឃ​ព្រះ​នាម អៀង សុខធឿន មិន​ទាន់​មាន​ការ​ស្រាវ​ជ្រាវ"

លោក សឺន ជំជួន បាន​អះអាង​ថា តុលាការ​បាន​និមន្ត​ព្រះ​សង្ឃ​ខ្មែរ​កម្ពុជា​ក្រោម​ព្រះ​នាម សៀង សុវណ្ណារា ហើយ​ចោទ​ប្រកាន់​ពី​បទ​ព្រហ្មទណ្ឌ​នោះ វា​ជា​រឿង​អយុត្តិធម៌ និង​បំបាក់​ស្មារតី​ទៅ​ដល់​ព្រះ​សង្ឃ​ខ្មែរ​កម្ពុជា​ក្រោម​គង់​នៅ​កម្ពុជា ៖ "ខ្ញុំ​គិត​ថា ព្រះ​តេជ​គុណ សៀង សុវណ្ណារា ព្រះ​អង្គ​មិន​មែន​ដូច​ជា​តុលាការ​ចោទ​ប្រកាន់​នេះ​ទេ"

តំណាង​អង្គការ​សមាគម​ខ្មែរ​កម្ពុជា​ក្រោម​បាន​លើក​ឡើង​ថា ព្រះ​សង្ឃ​ខ្មែរ​កម្ពុជា​ក្រោម​គង់​នៅ​កម្ពុជា​មួយ​ចំនួន បាន​ប្រឈម​នឹង​ការ​ធ្វើ​បាប​ផ្សេងៗ ដូច​ជា​ការ​ចាប់​ផ្សឹក​ព្រះ​តេជ​គុណ ទឹម សាខន កាល​ពី​ឆ្នាំ​២០០៧ ករណី​ចាប់​ខ្លួន និង​បណ្ដេញ​ព្រះ​ចៅ​អធិការ​វត្ត​​នៅ​ខែត្រ​កណ្ដាល ព្រះ​នាម ជា សុវណ្ណ​ភូមិ កាល​ពី​ខែ​វិច្ឆិកា ឆ្នាំ​២០១១ និង​ករណី​តុលាការ​និមន្ត និង​ចោទ​ប្រកាន់​ព្រះ​តេជ​គុណ សៀង សុវណ្ណារា នេះ​ជា​ដើម។ ពួក​គេ​អះអាង​ថា សកម្មភាព​បែប​នេះ ជា​រឿង​ផ្ទុយ​ទៅ​នឹង​សេចក្ដី​ប្រកាស​របស់​អង្គការ​សហ​ប្រជា​ជាតិ​ស្ដីពី​សិទ្ធិ​ជន​ជាតិ​ដើម។

មាត្រា​៣៤ សេចក្ដី​ប្រកាស​របស់​អង្គការ​សហ​ប្រជា​ជាតិ​ស្ដីពី​សិទ្ធិ​ជន​ជាតិ​ដើម​បាន​ចែង​ថា ជន​ជាតិ​ដើម​មាន​សិទ្ធិ​ក្នុង​ការ​លើក​កម្ពស់ បង្កើត និង​រក្សា​រចនាសម្ព័ន្ធ ទំនៀម​ទម្លាប់ សាសនា ប្រពៃណី និង​នីតិ​វិធី​ប្រតិបត្តិ​ជា​ពិសេស​របស់​ពួក​គេ ហើយ​ក្នុង​ករណី​ដែល​មាន​ប្រព័ន្ធ​វិនិច្ឆ័យ​ក្ដី ឬ​ការ​វិនិច្ឆ័យ​ក្ដី តាម​ទំនៀម​ទម្លាប់ ត្រូវ​ធ្វើ​ទៅ​តាម​បទដ្ឋាន​សិទ្ធិ​មនុស្ស​អន្តរ​ជាតិ៕

ព័ត៌មាន (5)

មើល​មតិ​ទាំង​អស់.

Anonymous says:
Dec 29, 2011 12:13 PM

I thinks that would be quicker than corruption laws ,why ,they need times launder money in banks legally,Some of them fake doccuments sold lands and set up bussines as game,if you ignore or let times go by 15years those maybe escaped from laws,And what's my view is draft out bissines laws first.

Anonymous says:
Dec 30, 2011 03:23 PM

please all khmer krom don't ask khmer middle to help nobody can help.just go to united nation better than Hun sen

Anonymous says:
Dec 28, 2011 01:34 AM

All khmer people before you participate with any khmer who said that he is nationalist and he said that he has plan to again yuon or hun sen ,because some time he is agent secrete of hun sen or yuon ,when he collect alot of khmer nationalist he send your name to police hun sen,it already happen in 1983 ,yuon and hun sen want to destroy khmer nationalist ,they create secretely the group nationalist lead by Hem Kreusna ( k G B ) of hanoi ,whem Hem Kreusna collect a lot of name of khmer nationalist ,he send all that name to yuon agents and yuon agents catch all khmer nationalist and destroy them ,so becare full when you want to participate with any khmer that you don't know his story.

Anonymous says:
Dec 28, 2011 10:08 AM

ឱ អ្នកនយោបាយប្រឆាំង​ និងអ្នកនយោបោកប្រឆាំង ដែលតាំងខ្លួនជាអ្នកស្នេហាជាតិ ស្នេហាសាសនា ហេអ្វីមិនរួមគ្នាជាបក្សតែមួយ ដើម្បីយកឈ្នះបក្សកាន់អំណាច ហើយជួយខ្មែរក្រោមឲ្យមានសិទ្ធិដូចខ្មែរលើផង ឫអ្នកចង់ឃើញភ្នំពេញ ត្រូវបានប្តូរឈ្មោះជា ណាំយ៉ាង ទៅវិញ ៕

Anonymous says:
Dec 28, 2011 11:25 AM

រដ្ឋាភិបាលខែ្មរមិនខ្វល់ព្រោះកាន់អំណាចបានក៏ដោយសាយួន ទោះបីខែ្មរត្រូវអស់ទឹកដីក៏ដោយ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល