សហព័ន្ធខ្មែរកម្ពុជាក្រោមជួបពិភាក្សាជាមួយមន្ត្រីការបរទេសស.រ.អា.
2009.05.27
លោក សាន សុវិទ្យ រាយការណ៍មកថា កិច្ចប្រជុំនោះគឺពិនិត្យមើលស្ថានភាពរស់នៅរបស់ខ្មែរកម្ពុជាក្រោមនាបច្ចុប្បន្នក្រោមការដឹកនាំរបស់រដ្ឋាភិបាលក្រុងហាណូយ។
ប្រតិភូសហព័ន្ធខ្មែរកម្ពុជាក្រោមដែលមានសមាជិក៥នាក់ដឹកនាំដោយលោក ថាច់ ង៉ុកថាច់ នាយកប្រតិបត្តិសហព័ន្ធខ្មែរកម្ពុជាក្រោម ទើបនឹងបានបញ្ចប់នៅពេលថ្មីៗនេះនូវកិច្ចពិភាក្សារបស់ខ្លួនជាមួយនឹងមន្រ្តីជាន់ខ្ពស់ទទួលបន្ទុកកិច្ចការប្រទេសវៀតណាមនៃក្រសួងការបរទេសបរទេសសហរដ្ឋអាមេរិកនារដ្ឋធានីវ៉ាស៊ីនតោន។
លោកនាយក ថាច់ ង៉ុកថាច់ បានឲ្យដឹងតាមទូរស័ព្ទថា កិច្ចប្រជុំនោះប្រព្រឹត្តទៅក្រោមអធិបតីភាពនៃលោក Bratt Blackshaw មន្ត្រីជាន់ខ្ពស់ក្រសួងការបរទេសទទួលបន្ទុកកិច្ចការប្រទេសវៀតណាមដោយមានមន្រ្តី៨រូបផ្សេងទៀតរបស់ក្រសួងបានចូលរួមផង។
លោក ថាច់ ង៉ុកថាច់ បានបញ្ជាក់ថា ៖ «ខាងក្រសួងការបរទេសអាមេរិកាំងមានដល់ទៅ៨នាក់ ផ្នែកខាងសាសនា ផ្នែកខាងជនភៀសខ្លួន ផ្នែកខាងសិក្សាអប់រំ ផ្នែកសិទ្ធិមនុស្ស ដែលបានជួបមួយក្រុមទាំងអស់»។
លោកនាយកប្រតិបត្តិ ថាច់ ង៉ុកថាច់ បានសរុបលទ្ធផលជាផ្លែផ្កានៃកិច្ចពិភាក្សានៅទីស្តីការក្រសួងការបរទេសសហរដ្ឋអាមេរិកដែលទើបបានបញ្ចប់ទៅកាលពីពេលថ្មីៗនេះថា បានផលបីយ៉ាងសំខាន់ៗ ហើយថាលទ្ធផលនេះបានផ្តល់ក្តីសង្ឃឹមច្រើនថែមទៀតដល់ការតស៊ូអហិង្សានៃពលរដ្ឋខ្មែរក្រោមទាំងអស់។
លោក ថាច់ ង៉ុកថាច់ បានមានប្រសាសន៍ថា ៖ «ជួបគ្នាហ្នឹងបានផលបីធំៗដែលខ្ញុំមើលឃើញ ទី១ ទាំងអស់ហ្នឹងយកចិត្តទុកដាក់អំពីសំណូមពររបស់យើងធ្វើយ៉ាងណាឲ្យព្រះពុទ្ធសាសនាខ្មែរក្រោមឲ្យដាច់ដោយឡែកពីការគ្រប់គ្រងរបស់រដ្ឋាភិបាលរបស់យួនហ្នឹង គាត់ថានឹងខំប្រឹងប្រែងរឿងហ្នឹងបន្តទៀត។ រឿងទី២ រឿងជនភៀសខ្លួន គាត់យកចិត្តទុកដាក់ ហើយគ្រាន់តែថាយើងចង់ឲ្យបានករណីព្រះសង្ឃ ទឹម សាខន ព្រះសង្ឃ៦អង្គ មកជាមួយហ្នឹង។ ខាងសហរដ្ឋអាមេរិកយកចិត្តទុកដាក់ជនភៀសខ្លួនទាំងអស់នៅពេលណាដែលអង្គការសហប្រជាជាតិ UNHCR ជាមួយនឹងប្រទេសថៃ កាលណាលក្ខណៈនោះស្របច្បាប់ហើយ គឺពួកគាត់នឹងសប្បាយចិត្តនឹងធ្វើកិច្ចការអស់ហ្នឹងដែលយើងខ្ញុំពេញចិត្ត។ ទី៣ គឺបញ្ហានិស្សិតដែលមករៀនសហរដ្ឋអាមេរិកខ្លះ គឺថាពួកគាត់យកចិត្តទុកដាក់ ទោះបីពីរបីនាក់ក៏ដោយក្នុងមួយឆ្នាំ មិនចាំបាច់ច្រើនទេ គឺថាជាការជំរុញស្មារតីមួយឲ្យនិស្សិតខ្មែរកម្ពុជាក្រោមមានការខំប្រឹងប្រែង»។
សូមជម្រាបថា កិច្ចប្រជុំនេះបានកើតឡើងក្រោយការជួបប្រជុំមួយដែលរៀបចំឡើងដោយសភាទាំងពីររបស់ប្រទេសអាមេរិកកាលពីដើមខែមេសាដើម្បីស្វែងយល់នូវចម្លើយជាមុនដែលក្រុងហាណូយត្រូវឆ្លើយជូនក្រុមប្រឹក្សាសិទ្ធិមនុស្ស អង្គការសហប្រជាជាតិ កាលពីថ្ងៃទី៨ ឧសភាកន្លងទៅនេះ។ ពេលនោះលោក Bratt Blackshaw មន្រ្តីទទួលបន្ទុកកិច្ចការវៀតណាមនៃក្រសួងការបរទេសអាមេរិកបានរៀបចំឲ្យមានការជួបពិភាក្សាគ្នានេះឡើង៕
អត្ថបទពេញនិយម
RFA
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- អតីតតំណាងរាស្ត្រគណបក្សសង្គ្រោះជាតិលោក លិម គិមយ៉ា ត្រូវឃាតកបាញ់សម្លាប់នៅប្រទេសថៃ
- ពលរដ្ឋរិះគន់ថា ភ្លើងឆេះព្រះឆាយាល័ក្ខណ៍ព្រះមហាក្សត្រ ជាការធ្វេសប្រហែសរបស់អាជ្ញាធរក្រុងភ្នំពេញ
- អតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលរិះគន់រដ្ឋាភិបាលត្រកូល ហ៊ុន ត្រូវឃាតកបាញ់សម្លាប់នៅប្រទេសថៃ