ជនជាតិសួយ៣៥០គ្រួសារនៅកំពង់ស្ពឺចោទក្រុមហ៊ុនថារំលោភយកដីសហគមន៍
2010.02.22
ស្រ្តីមួយរូបដែលអះអាងថា ជាតំណាងប្រជាពលរដ្ឋឈ្មោះ វ៉ែន សាម៉ី បាននិយាយថា កាលពីខែឧសភា ឆ្នាំ២០០៩ ភាគីក្រុមហ៊ុនបានប្រកាសប្រាប់ពួកគេថា ដីនៅតំបន់ឃុំត្រពាំងជោរ គឺជាដីសម្បទានសេដ្ឋកិច្ចរបស់ក្រុមហ៊ុន ហើយដល់ខែមិថុនាឆ្នាំដដែល គេបានយកគ្រឿងចក្រឈូសព្រំដីព័ទ្ធជុំវិញដីសហគមន៍និងដីចម្ការវិលជុំរបស់ពួកគាត់។
អ្នកស្រី វ៉ែន សាម៉ី បានឲ្យដឹងដូច្នេះ ៖ «បើសិនជារាជរដ្ឋាភិបាលអត់ជួយជនជាតិសួយម្ដងនេះ គឺជនជាតិសួយត្រូវតែស្លាប់។ ទី២ សំណូមពរដល់រាជរដ្ឋាភិបាលឲ្យចុះមកដល់កន្លែងកើតហេតុ»។
អ្នកស្រី វ៉ែន សាម៉ី បានអះអាងទៀតថា ក្រុមហ៊ុនបានធ្វើការអភិវឌ្ឍន៍ដីនៅតំបន់នោះ គឺប៉ះពាល់ដីជនជាតិភាគតិចសួយចំនួន៥ភូមិ ដែលមានប្រជាពលរដ្ឋ៣៥០គ្រួសារ ហើយកាលពីពេលថ្មីៗនេះក្រុមហ៊ុនបានឈូសដីស្រែរបស់ពួកគាត់ធ្វើផ្លូវ។
ស្រ្តីមួយរូបទៀតបានឲ្យដឹងថា កាលពីថ្ងៃទី២០ កុម្ភៈ អភិបាលរងស្រុកឱរ៉ាល់ និងមន្រ្តីបរិស្ថានលោក ឈុន ឈៀកហេង បានទៅសម្រុះសម្រួលជូនពួកគេ ប៉ុន្តែផ្ទុយទៅវិញពួកគេពុំបានសម្រុះសម្រួលណាមួយទេ ហើយថា ដីរបស់ពួកគាត់ថា ជាដីសាធារណៈរបស់រដ្ឋដែលរដ្ឋាភិបាលបានសម្បទានសេដ្ឋកិច្ចឲ្យក្រុមហ៊ុន H.L.Hទៅវិញ ៖ «បើសិនជាក្រុមហ៊ុននៅតែឈូសឆាយអ៊ីចឹង ប្រជាពលរដ្ឋខ្ញុំថា ឲ្យសម្លាប់ចោលទាំង៥ភូមិតែម្ដងទៅ មិនបាច់ទុកទេ បើសិនជានៅមានជីវិតរស់នៅតែតវ៉ាអ៊ីចឹង លុះត្រាតែសម្លាប់ចោលឲ្យអស់បានលែងមានអ្នកតវ៉ា»។
វិទ្យុអាស៊ីសេរីមិនអាចសុំការបំភ្លឺពីលោក មួង ឃី អភិបាលរងស្រុកឱរ៉ាល់បានទេ នៅថ្ងៃទី២១ កុម្ភៈ។ រីឯមន្រ្តីនៃក្រសួងបរិស្ថាន ទទួលបន្ទុកជម្រកសត្វព្រៃស្រុកឱរ៉ាល់ លោក ឈុន ឈៀកហេង បានមានប្រសាសន៍ថា លោកមិនបានដឹងពីរឿងនេះទេ ៖ «ខ្ញុំអត់ដឹងដំណើររឿងយ៉ាងម៉េចទេ»។
មន្រ្តីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ លោក អំ សំអាត ដែលបានទៅចូលរួមការសម្រុះសម្រួលរវាងអភិបាលស្រុករងនិងប្រជាពលរដ្ឋកាលពីថ្ងៃទី២០ កុម្ភៈ ដែរនោះ បានមានប្រសាសន៍ថា អាជ្ញាធរស្រុកពុំបានបង្ហាញពីគោលនយោបាយដោះស្រាយណាមួយឲ្យបានច្បាស់លាស់ទេចំពោះជម្លោះដីជនជាតិដើមភាគតិចសួយនេះ។
លោក អំ សំអាត មានប្រសាសន៍ដូច្នេះ ៖ «ពួកគាត់រាល់ថ្ងៃទាំង៥ភូមិហ្នឹង នាំគ្នាតាមគ្រឿងចក្រគេហ្នុង ខ្លាចគេឈូសចូលឆ្លងស្ទឹង ឬឈូសចូលដីគាត់។ រវល់តែតាមគេធ្វើឲ្យបាត់បង់ចំណូលគ្រួសារ អ៊ីចឹងផ្ទះគាត់ខ្លះចង់ដាច់អង្ករហើយ ដោយសារតែម្នាក់ៗអត់បានធ្វើអី»។
លោក អំ សំអាត បានបញ្ជាក់ទៀតថា ក្រុមហ៊ុន H.L.H បានទទួលដីសម្បទានសេដ្ឋកិច្ចពីរដ្ឋាភិបាលចំនួន៩.៩៨៥ហិកតាកាលពីឆ្នាំ២០០៨ ដើម្បីអភិវឌ្ឍដាំពោត ហើយក្នុងនោះបានប៉ះពាល់លើដីជនជាតិដើមភាគតិចសួយនិងដីអភិរក្សសត្វព្រៃ។
លោក អំ សំអាត បានស្នើសុំឲ្យអាជ្ញាធរស្រុកនិងស្ថាប័នដែលពាក់ព័ន្ធបង្កើតគណៈកម្មការមួយដើម្បីដោះស្រាយបញ្ហាជម្លោះដីនេះឲ្យបានច្បាស់លាស់ ដើម្បីជាប្រយោជន៍ភាគីទាំងសងខាង បើមិនដូច្នោះទេ ជនជាតិសួយទាំងនោះនឹងគ្មានដីធ្វើរបរកសិកម្មទៀតនោះទេ ហើយរដ្ឋាភិបាលគួរតែគិតគូរនិងត្រួតពិនិត្យឲ្យបានច្បាស់លាស់មុននឹងសម្បទានដីសេដ្ឋកិច្ចឲ្យក្រុមហ៊ុនផងដែរ ចៀសវាងប៉ះពាល់លើដីប្រជាពលរដ្ឋក្រីក្រដូច្នេះ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ