ច្បាប់ស្តីពីកិច្ចសហប្រតិបត្តិការសេដ្ឋកិច្ចនិងបច្ចេកទេសរវាងខ្មែរនិងគូវ៉េតបានផ្តោតជាសំខាន់ទៅលើការរកស៊ីផ្នែកប្រេងនិងការងារកសិកម្មដែលនឹងត្រូវធ្វើឡើងនាពេលខាងមុខនេះ។
អ្នកតំណាងរាស្រ្ត ជាម យៀប នៃគណបក្សប្រជាជនកម្ពុជាមានប្រសាសន៍ថា ការតែងច្បាប់នេះឡើងដើម្បីធានាឲ្យមានការកក់ក្តៅដល់អ្នកវិនិយោគទុនគូវ៉េត ហើយលោកគាំទ្រចំពោះច្បាប់នោះដោយសង្ឃឹមថានឹងនាំការរីកចម្រើនដល់កម្ពុជាលើផ្នែកបច្ចេកទេសប្រេងនិងបង្កើនការងារជាច្រើនមកដល់ពលរដ្ឋកម្ពុជាផ្នែកកសិកម្ម។
លោក ជាម យៀប បានមានប្រសាសន៍ថា ៖ «នេះគ្រាន់តែជាការធានាដើម្បីពង្រឹងនិងរកការងារលើកទឹកចិត្ត គឺថាច្បាប់វិនិយោគរបស់យើង គេជឿទុកចិត្តឡើង»។
ច្បាប់ស្តីពីកិច្ចសហប្រតិបត្តិការសេដ្ឋកិច្ចនិងបច្ចេកទេសជាមួយនឹងគូវ៉េតមានចំនួន៩មាត្រារួមទាំងការនាំចូលទំនិញគូវ៉េត និងការបង្កើតការការពារពិសេសទៅដល់អ្នករកស៊ីគូវ៉េត។
អ្នកតំណាងរាស្រ្ត សុន ឆ័យ នៃបក្សប្រឆាំងសមរង្ស៊ីដែលមានវត្តមាននៅក្នុងការជជែករឿងច្បាប់នោះបានរិះគន់ថា គូវ៉េតបានទាមទារឲ្យមានការការពារពិសេសដល់ពួកគេ។
លោកបន្តទៀតថា ការវិនិយោគផ្នែកកសិកម្មទៅលើដីជាច្រើនម៉ឺនហិកតារឲ្យជនជាតិគូវ៉េតរយៈពេល៩៩ឆ្នាំនិងការរកស៊ីប្រេងដោយមានការការពារដល់ថ្នាក់ចែងជាច្បាប់និងនាំឲ្យកម្ពុជាមានបញ្ហានៅថ្ងៃក្រោយមិនខាន បើសិនជាការវិនិយោគនោះបែរជាបំផ្លាញទៅដល់កម្ពុជាទៅវិញ។
លោក សុន ឆ័យ បានបញ្ជាក់ថា ៖ «យើងមើលទៅគ្មានរឿងអីក្រៅពីគេមករកស៊ីផ្នែកណាមួយដែលមានផលដល់គេឆាប់ទេ ព្រោះយើងអត់មានទៅរកស៊ីស្រុកគេផងហ្នឹង មានតែគេមក ហើយគេមកដូចគូវ៉េតអ៊ីចឹង រឿងប្រេង រឿងចង់បានដីយើងអ៊ីចឹង អត់មានរឿងគេមកបង្កើតឧស្សាហកម្ម រោងចក្រអី ដើម្បីឲ្យកសិករយើងមានការងារធ្វើអី អត់ទេ។ ភាគច្រើនយើងមើលទៅកម្មវិធីហ្នឹងគឺមានតែមុខរបរណាដែលគេចង់បានចំណេញឆាប់ហើយកេងប្រវ័ញ្ចពីយើងបានផលទៅគេច្រើនទេ។ អាហ្នឹងដែលជាការមួយដែលយើងពិបាកណាស់ក្នុងកាលៈទេសៈនេះ»។
លោក សុន ឆ័យ បន្ថែមថា គេមិនដែលឃើញមានច្បាប់ការពារអ្នកវិនិយោគខ្មែរទេ ហើយក៏មិនដែលឃើញប្រទេសណាមួយនៅក្នុងពិភពលោកបានចែងជាច្បាប់អនុម័តដោយរដ្ឋសភាដោយគ្រាន់តែចង់បានអ្នកវិនិយោគទុនប៉ុណ្ណោះ។
លោកបន្តទៀតថា បញ្ហានៅត្រង់អ្នកវិនិយោគទុនបរទេសមិនជឿទុកចិត្តដោយសារការគោរពច្បាប់និងអំពើពុករលួយនៅកម្ពុជា។
គួរជម្រាបជូនថា ប្រទេសចំនួនជាង១០ហើយដែលចង់មករកស៊ីនៅកម្ពុជាសុទ្ធតែទទួលបាននូវច្បាប់សម្រាប់ការពារដោយពិសេសសម្រាប់អ្នកវិនិយោគរបស់គេ។ បើទោះបីជាមានការរិះគន់របស់មន្ត្រីបក្សប្រឆាំងក៏ដោយរដ្ឋាភិបាលនៅតែបន្តការងារនេះ៕