ក្រសួងបរិស្ថានសម្រេចឲ្យដេញថ្លៃលក់ដើមបេងអាយុរាប់រយឆ្នាំ
2010.05.22
រថយន្តដឹកឈើប្រណីតដែលក្រឡាប់នៅខេត្តរតនគិរី នៅថ្ងៃទី១៨ មិថុនា ២០០៩។
មន្ត្រីខេត្តរតនគិរីឲ្យដឹង នៅថ្ងៃសៅរ៍ ទី២២ ខែឧសភា ឆ្នាំ២០១០ ថា ក្រសួងបរិស្ថានបានសម្រេចដាក់ឲ្យដេញថ្លៃដើមបេងអាយុកាលរាប់រយឆ្នាំមួយដើមរួចហើយ។ ការដេញថ្លៃដើមបេងដ៏កម្រនោះ បានជាង៥០០០ដុល្លារ។
ប្រភពអ្នកដែលបានឃើញដើមបេងនោះឲ្យដឹងថា មានមុខកាត់ជាង ២ម៉ែត្រ និងមានបណ្ដោយ ពី៤ទៅ៦ម៉ែត្រ។ ជាដើមឈើប្រណិត មានទំហំធំកម្រមាន ត្រូវគេលួចកាប់នៅក្នុងឧទ្យានជាតិវរជ័យ ជាប់នឹងស្រុកអណ្ដូងមាស ខេត្តរតនគិរី កាលពីឆ្នាំ២០០៥។ ក្រុមអនុរក្សឧទ្យានជាតិ បានរកឃើញករណីនេះ ហើយការពារមិនឲ្យក្រុមទុច្ចរិតលួចបន្តអារច្រៀកដើមបេងនេះ នាំចេញទៅទីផ្សារបានឡើយ ហើយក្រុមឆ្មាំឧទ្យានទាំងនោះ ក៏មិនអាចរកឃើញអ្នកកាប់រំលំដើមបេងនោះឃើញដែរ។
អ្នកដេញថ្លៃបានជោគជ័យដើមបេងនោះ ឈ្មោះ នាង មានប្រសាសន៍ថា ការដេញថ្លៃធ្វើឡើងកាលពីខែមេសាកន្លងទៅ នៅមន្ទីរបរិស្ថានខេត្តរតនគិរី ដោយមានអ្នកដេញថ្លៃ ៦នាក់ចូលរួមដេញថ្លៃ។ តម្លៃដែលដេញបានមានចំនួន ៥១០០ដុល្លារ។
លោកបន្តថា មធ្យោបាយដឹកជញ្ជូនឈើបេងមួយដើមនេះ មានការលំបាកណាស់ ពីព្រោះដើមបេងនេះ ត្រូវគេលួចកាប់នៅតំបន់ជ្រោះជ្រលងភ្នំ មិនអាចមានឧបករណ៍អ្វីអាចចូលទៅដល់ដើម្បីដឹកជញ្ជូនចេញបានងាយស្រួលឡើយ។
លោកមានប្រសាសន៍បន្តថា ៖ «ឈើហ្នឹង យើងកំពុងតែរៀបចំធ្វើផ្លូវធ្វើអីវា។ ឧទ្យានជាតិឆ្ងាយដែរ។ តម្លៃឈើវាមិនជាតុល្យភាពថ្លៃប៉ុន្មានទេ គ្រាន់ថាសំខាន់ យើងចំណាយការដឹកជញ្ជូន គ្រាន់តែធ្វើផ្លូវអស់ ២ទៅ៣០០០ហើយបង»។
មិនមានការអធិប្បាយណាមួយទាក់ទិនមូលហេតុ ដែលនាំឲ្យក្រសួងបរិស្ថានសម្រេចចិត្តដាក់ឲ្យដេញថ្លៃដើមបេងទេវតាមួយនេះទេ។
ប្រធានមន្ទីរបរិស្ថានខេត្តរតនគិរី លោក ជូ សុភ័ក្រ បដិសេធមិនធ្វើអត្ថាធិប្បាយពីបញ្ហានេះ ហើយជំរុញឲ្យសួររឿងនេះ ទៅគណៈកម្មការដេញថ្លៃដើមបេងនេះវិញ។
វិទ្យុអាស៊ីសេរីមិនអាចទាក់ទងប្រធានគណៈកម្មាធិការដេញថ្លៃ និងជាអភិបាលរងខេត្តរតនគិរី លោក មុំ សារឿន ក្នុងបញ្ហានេះបានទេ នៅថ្ងៃសៅរ៍ ទី២២ ឧសភា ឆ្នាំ២០១០។ ក៏ប៉ុន្តែសមាជិកគណៈកម្មការដេញថ្លៃមួយរូប និងជាប្រធានមន្ទីរហិរញ្ញវត្ថុខេត្តរតនគិរី លោក ទឹម សុថារ័ត្ន មានប្រសាសន៍ថា ប្រាក់ដែលបានពីការដេញថ្លៃ បានបង់ចូលទៅក្រសួងបរិស្ថាន ដើម្បីដាក់ចូលក្នុងក្រសួងហិរញ្ញវត្ថុសម្រាប់ថវិកាជាតិ។
អភិបាលស្រុកអណ្ដូងមាស លោក នង ដារិទ្ធ មានប្រសាសន៍ថា ក្រសួងបរិស្ថានបានអនុញ្ញាតឲ្យអ្នកដេញថ្លៃបានដឹកជញ្ជូនដើមបេងចេញពីបរិវេណតំបន់ឧទ្យានជាតិ ក៏ប៉ុន្តែពុំទាន់មានការអនុញ្ញាតដឹកជញ្ជូនផលព្រៃឈើនេះ ដោយក្រសួងកសិកម្មនៅឡើយ។
លោកបន្តថា ដើមបេងនោះនឹងត្រូវគេអារច្រៀកជាបំណែក និងត្រូវការចំណាយប្រាក់ប្រមាណ ២០.០០០ ដុល្លារ ទើបអាចនាំមកកាន់ទីផ្សារបាន ៖ «ក្រសួងបរិស្ថានគេឲ្យទុកយកមកធ្វើបេតិកភណ្ឌដែរ ដាក់នៅមន្ទីរបរិស្ថានហ្នឹងណាទាំងមូលមកបញ្ឈរទៅ ប៉ុន្តែវាអត់មានលទ្ធភាព ឲ្យគេ ១០.០០០ដុល្លារ គេដឹកអត់រួចផង។ ការពិតអត់មានឡានណា ដែលត្រូវដាក់ចុះផង ចុងវាធំពេក»។
ប្រភពអ្នកធ្វើអាជីវកម្មឈើបេងឲ្យដឹងថា បេងមួយដើមនេះ ជាប្រភេទឈើកម្រ មានតម្លៃទីផ្សារប្រមាណ ៦០.០០០ ទៅ១០០.០០០ដុល្លារអាមេរិក។
មន្ត្រីខេត្តមួយរូប សុំមិនបញ្ចេញឈ្មោះឲ្យដឹងថា ដើមបេងនេះ មន្ត្រីអាជ្ញាធរខេត្តមានបំណងរក្សាទុកជាកេតនភណ្ឌជាតិដ៏កម្រ និងមានតម្លៃមិនអាចកាត់ថ្លៃបាន។ ក៏ប៉ុន្តែច្រើនឆ្នាំកន្លងមកនេះ មិនមានលទ្ធភាពធ្វើការដឹកជញ្ជូនដើមបេងទាំងមូលមកកាន់ទីរួមខេត្តបាន។ ប្រភពឲ្យដឹងថា ការដាក់ដេញថ្លៃដើមបេងដ៏ពិសិដ្ឋនេះ គឺជាការបាត់បង់កេតនភណ្ឌជាតិដ៏កម្រមួយ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ