បុរសម្នាក់ត្រូវចាប់ខ្លួនពីបទសង្ស័យថារុករានដីរដ្ឋ
2010.02.28
ព្រះសង្ឃនិងអ្នកភូមិឈើទាលភ្លោះ ឃុំព្រៃអំពក បានឲ្យដឹងថា សមត្ថកិច្ចជាង១០នាក់បានមកចាប់ខ្លួនបុរសឈ្មោះ ឈន សារិត អាយុ៤៥ឆ្នាំ ពីតំបន់ដែលត្រៀមសង់ជាវត្តមហាឥសី ក្នុងឃុំព្រៃអំពក ស្រុកគិរីវង់ ខេត្តតាកែវ កាលពីព្រលឹមថ្ងៃអាទិត្យ ទី២៨ ខែកុម្ភៈ ឆ្នាំ២០១០។
ស្រ្តីដែលជាភរិយាលោក ឈន សារិត បានឲ្យដឹងថា ប្តីគាត់ជាអ្នកបានជួយកសាងអាស្រមឲ្យទៅជាវត្ត ស្រាប់តែអាជ្ញាធរមកចាប់ខ្លួននៅព្រឹកថ្ងៃ២៨ កុម្ភៈនេះ ៖ «វត្តហ្នឹងកាលលើកមុនសហគមន៍ព្រៃឈើហ្នឹង... ហើយឥឡូវគេចាប់ប្ដីខ្ញុំមក គេមិនឲ្យធ្វើវត្តធ្វើអី ឲ្យតែប្ដីខ្ញុំចេញពីតុលាការវិញ»។
អ្នកភូមិដទៃទៀតបានអះអាងថា ៖ «ការចាប់ខ្លួនពីព្រឹកហ្នឹង គ្មានមូលហេតុអីទេ គេហៅឡើង គេមានដីកាគេចោទប្រកាន់យើងបំផ្លាញព្រៃឈើគេ»។
បុរសម្នាក់ទៀតបន្ថែមថា លោក ឈន សារិត ជាអ្នកផ្តួចផ្តើមកសាងអាស្រមឲ្យទៅជាវត្តមហាឥសីតាំងពីឆ្នាំ១៩៩០ មុនអាជ្ញាធរស្រុកខេត្តចុះមកផ្សព្វផ្សាយច្បាប់ព្រៃឈើម្ល៉េះ ៖ «គេចោទប្រកាន់យើងកសាងវត្ត គេមិនឲ្យកសាង។ យើងកសាងវត្តនិងកសាងផ្លូវនេះ គេចោទយើងថាធ្វើអបគមន៍»។
ស្នងការខេត្តតាកែវ លោក អ៊ុក សំណាង មានប្រសាសន៍ថា បុរសឈ្មោះ ឈន សារិត មិនទាន់ឃើញបញ្ជូនមកដល់ស្នងការដ្ឋានខេត្តទេ ៖ «នៅកន្លែងខ្ញុំអត់ឃើញ»។
មន្រ្តីការពារសិទ្ធិមនុស្សវីជីឡែន លោក យិន យ៉េត ថ្លែងថា លោក ឈន សារិត ត្រូវបញ្ជូនភ្លាមៗទៅពន្ធនាគារខេត្តតាកែវតែម្តង។ លោកថា ករណីដីធ្លីនៅតំបន់មហាសីនោះ ប្រជាជនបានកាន់កាប់យូរហើយ។ អាជ្ញាធរទើបតែដឹងនិងមកគ្រប់គ្រងនៅប៉ុន្មានឆ្នាំក្រោយនេះទេ។
ដីធ្លីនិងព្រៃឈើរបស់រដ្ឋនៅតំបន់មហាសី ក្នុងស្រុកគិរីវង់ ខេត្តតាកែវ រដ្ឋហាមឃាត់រុករាននិងហាមសង់វត្តអារាម។ កាលពីថ្ងៃទី១៥ ខែកុម្ភៈ អាជ្ញាធរដោះស្រាយវិវាទដីធ្លីស្រុកនិងខេត្តបានចុះអប់រំប្រជាជន ហាមប្រាមការបំពានលើដីរបស់រដ្ឋ។
ប្រធានការិយាល័យភូមិបាល ស្រុកគិរីរង់ លោក ឈរ សុផល មានប្រសាសន៍នៅថ្ងៃចុះអប់រំនោះថា ដីរបស់រដ្ឋជាង៩០០ហិកតារងនូវការកាប់រានយកដីរដ្ឋទៅកាន់កាប់មួយចំនួន។ ប្រជាជនដែលបានរានដីរដ្ឋពាក់ព័ន្ធជាង២០០គ្រួសារនៅតំបន់មហាសី។ ពួកគេមកពីច្រើនឃុំនៃខេត្តតាកែវ ខេត្តកំពត និងប្រជាជនខ្មែរកម្ពុជាក្រោមមួយចំនួន។ ពួកគេបានរានដីព្រៃរបស់ដ្ឋ ហើយដាំចម្ការនិងធ្វើអាស្រមរៀបចំជាវត្តមហាឥសី។ លោកថា អាជ្ញាធរស្រុកខេត្តមិនអនុញ្ញាតធ្វើវត្តនិងបន្តកាន់កាប់ដីនោះទេ ទើបចុះអប់រំច្បាប់ព្រៃឈើ។ មិនតែប៉ុណ្ណោះអាជ្ញាធរឲ្យអ្នកស្រុកទៅសុំបញ្ជាក់សិទ្ធិកាន់កាប់ដីពីមូលដ្ឋានភូមិឃុំ ដែលខ្លួនបានរស់នៅពីមុនមកបញ្ជាក់ផងដែរ។
តាមប្រសាសន៍របស់អាជ្ញាធរស្រុកគិរីវង់ ឲ្យដឹងថា ដីនៅតំបន់មហាសីមិនអនុញ្ញាតឲ្យប្រជាជនរានយកទេ ទើបអាជ្ញាធរឲ្យប្រជាជនដែលអះអាងជាម្ចាស់កាន់កាប់នោះទៅសុំចុះបញ្ជីដីនៅភូមិឃុំរបស់ខ្លួន បើពិតជាក្រីក្រគ្មានដីដាំដុះមែន ឬអត់នោះ ត្រូវឲ្យអាជ្ញាធរមូលដ្ឋានបញ្ជាក់លិខិតមកថ្នាក់លើត្រឹមត្រូវ។ លោកបន្តថា ពួកគេសុទ្ធតែអះអាងថា បានរស់នៅលើដីនោះយូរហើយ។ អាជ្ញាធរបានពន្យល់ប្រជាជនពីទោសទណ្ឌនៃការរុករានព្រៃ តែការទន្រ្ទានព្រៃនៅតែបន្តមានរហូត៕