ក្រសួងការបរទេស៖ ការព្រមានលើមន្ត្រីអ.ស.ប.មិនមែនជាការបំភិតបំភ័យទេ
2010.03.24
លោក កុយ គួង មន្ត្រីនាំពាក្យក្រសួងការបរទេសកម្ពុជា បានគូសបញ្ជាក់ថា សេចក្ដីព្រមានរបស់ប្រមុខការទូតកម្ពុជា ចំពោះលោក ឌូក្លាស ប្រូឌើរិក (Douglas Broderick) តំណាងក្រុមការងារអង្គការសហប្រជាជាតិប្រចាំកម្ពុជា គឺមិនមានបំណងបំភិតបំភ័យ ឬបំបិទសិទ្ធិបញ្ចេញមតិទៅលើអង្គការក្រៅរដ្ឋាភិបាលដទៃទៀត ដែលបានធ្វើការរិះគន់ទៅលើសេចក្ដីសម្រេចរបស់រដ្ឋាភិបាល ក្នុងការពន្លឿនការអនុម័តច្បាប់ប្រឆាំងអំពើពុករលួយ ដែលមិនទុកឲ្យមានការពិគ្រោះយោបល់ឲ្យបានទូលំទូលាយពីក្រុមអង្គការសង្គមស៊ីវិលនោះទេ។
ទោះយ៉ាងនេះក្តី លោក កុយ គួង បានព្រមានថា ប្រសិនបើមន្ត្រីអង្គការសហប្រជាជាតិនៅបន្តជ្រៀតជ្រែកកិច្ចការផ្ទៃក្នុងប្រទេសកម្ពុជាបន្តទៀត រដ្ឋាភិបាលនឹងពិនិត្យទៅលើសេចក្ដីសម្រេចថា គួរត្រូវសហការធ្វើការងារជាមួយតំណាងនេះតាមរបៀបណាទៀត។
លោក កុយ គួង បញ្ជាក់ឲ្យដឹងដូច្នេះ ៖ «លិខិតរបស់ឯកឧត្ដមឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស គឺផ្ញើជូនលោក ឌូក្លាស ប្រូឌើរិក អ្នកសម្របសម្រួលអង្គការសហប្រជាជាតិនៅកម្ពុជា និងជាប្រធានក្រុមអង្គការសហប្រជាជាតិនៅកម្ពុជាផងដែរ ។ ខ្ញុំចង់និយាយថា នេះជាករណីដោយឡែក មិនមែនធ្វើដើម្បីលក្ខណៈទូទៅទេ»។
មន្ត្រីអង្គការសង្គមស៊ីវិលមួយចំនួននៅកម្ពុជាចាត់ទុកថា ការលើកឡើងរបស់តំណាងអង្គការសហប្រជាជាតិប្រចាំនៅកម្ពុជា ចំពោះការពន្លឿនការអនុម័តច្បាប់ប្រឆាំងអំពើពុករលួយរបស់រដ្ឋាភិបាល គឺគ្រាន់តែជាការបញ្ចេញមតិ ឬផ្ដល់ជាយោបល់ មិនមែនជាការដាក់បទបញ្ជា ឬជ្រៀតជ្រែកកិច្ចការផ្ទៃក្នុងរបស់រដ្ឋាភិបាលនោះទេ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា រូបលោកមិនបានគិតថា សារព្រមានរបស់រដ្ឋាភិបាលចំពោះមន្ត្រីអង្គការសហប្រជាជាតិ ជាការគំរាមទៅដល់ក្រុមមន្ត្រីអង្គការសង្គមស៊ីវិលនៅកម្ពុជានោះទេ។
លោក អ៊ូ វីរៈ បានផ្ដល់ជាអនុសាសន៍ទៅរដ្ឋាភិបាលថា រាល់គ្រប់ការស្នើផ្ដល់ជាយោបល់របស់ក្រុមមន្ត្រីសង្គមស៊ីវិល ទាំងជាតិ ក៏ដូចជាអន្តរជាតិ ទៅលើសេចក្ដីព្រាងច្បាប់អ្វីមួយ រដ្ឋាភិបាលគួរតែធ្វើការសិក្សាទៅលើខ្លឹមសារ ឬយោបល់ទាំងនោះជាមុន មុននឹងធ្វើការព្រមាន ឬវាយប្រហារដោយពាក្យសម្ដី។
លោក អ៊ូ វីរៈ មានប្រសាសន៍ថា ៖ «រាល់ថ្ងៃនេះ យើងមិនខ្វល់ថា គេរិះគន់ហ្នឹងត្រូវ ឬមិនត្រូវទេ។ យើងទៅជាឈ្លោះជាមួយបុគ្គលអ្នករិះគន់ ឬមួយក៏អ្នកនាំសារ អាហ្នឹងវាអត់ត្រឹមត្រូវទេ ព្រោះអីឆ្លុះបញ្ចាំងពីចរិតខ្មែរយើងមួយ ដែលសុខចិត្តឈ្លោះ ជាជាងពិភាក្សាគ្នាទៅលើខ្លឹមសារទៅវិញ។ អាហ្នឹងខ្ញុំថា វាជាការឆ្លុះបញ្ចាំងមួយមិនល្អសម្រាប់រដ្ឋាភិបាលខ្មែរយើង»។
ទោះយ៉ាងនេះក្តី លោក ផៃ ស៊ីផាន រដ្ឋលេខាធិការ និងជាមន្ត្រីនាំពាក្យទីស្ដីការគណៈរដ្ឋមន្ត្រី មានប្រសាសន៍ថា ក្រុមអង្គការសង្គមស៊ីវិល ឬមន្ត្រីសហប្រជាជាតិនៅកម្ពុជា មុននឹងចេញសេចក្ដីថ្លែងការណ៍អ្វីមួយត្រូវឆ្លុះបញ្ចាំងការពិតឲ្យបានត្រឹមត្រូវ។
លោក ផៃ ស៊ីផាន បានឲ្យដឹងថា រហូតមកដល់ពេលនេះ ការធ្វើទំនាក់ទំនងរវាងរដ្ឋាភិបាល និងមន្ត្រីតំណាងអង្គការសហប្រជាជាតិប្រចាំនៅកម្ពុជា នៅមានទំនាក់ទំនងល្អ និងធ្វើការជាមួយគ្នាជាធម្មតានៅឡើយ។
លោក ផៃ ស៊ីផាន មានប្រសាសន៍ថា ៖ «សូមឲ្យសង្គមស៊ីវិលទាំងអស់គ្នាហ្នឹង សូមកុំឲ្យបំពាន។ កាលណាគាត់បំពានសេចក្ដីត្រូវ គាត់បំពានសេចក្ដីសុខរបស់គាត់ហើយ ហើយជំហររបស់រាជរដ្ឋាភិបាលចំពោះមន្ត្រីអង្គការសហប្រជាជាតិនេះ គ្រាន់តែបង្ហាញឲ្យដឹងថា ព្រះរាជាណាចក្រកម្ពុជាជាព្រះរាជាណាចក្រមួយអធិបតេយ្យ ឯករាជ្យ ហើយគឺជាសមាជិកអង្គការសហប្រជាជាតិ។ ហើយមន្ត្រីទាំងអស់ហ្នឹងដែលអញ្ជើញមកធ្វើការហ្នឹង គឺជាការស្វាគមន៍របស់រាជរដ្ឋាភិបាល មិនមែនជាម្ចាស់ ចង្អុលប្រាប់កម្ពុជាថា ត្រូវតែធ្វើយ៉ាងម៉េចទេ! ត្រូវតែសួរគ្នា ត្រូវតែជជែកគ្នា ពីព្រោះយើងជាអង្គការ ឬជាស្ថាប័នផ្លូវការ»។
រដ្ឋាភិបាលកម្ពុជាតាមរយៈលោក ហោ ណាំហុង រដ្ឋមន្ត្រីក្រសួងការបរទេសកម្ពុជា កាលពីថ្ងៃសៅរ៍ ទី២០ ខែមីនាកន្លងទៅ បានផ្ញើលិខិតមួយច្បាប់ទៅកាន់តំណាងអង្គការសហប្រជាជាតិប្រចាំកម្ពុជា លោក ប្រូឌើរិក ដោយបានព្រមានថា កម្ពុជានឹងមិនស្វាគមន៍រូបលោកទេ ប្រសិនបើក្រុមការងាររបស់អង្គការសហប្រជាជាតិនៅតែចេញសេចក្ដីថ្លែងការណ៍រិះគន់រដ្ឋាភិបាលរបៀបគាំទ្រគណបក្សប្រឆាំងនៅកម្ពុជាបន្តទៀតនោះ។
ក្រសួងការបរទេសកម្ពុជា និងទីស្ដីការគណៈរដ្ឋមន្ត្រីបានថ្កោលទោស និងហៅការលើកឡើងរបស់ក្រុមអង្គការសហប្រជាជាតិប្រចាំប្រទេសកម្ពុជា ទាក់ទងជាមួយសេចក្ដីព្រាងច្បាប់ប្រឆាំងអំពើពុករលួយ ថាជាការលូកចូលដៃជ្រៀតជ្រែកចូលកិច្ចការផ្ទៃក្នុងកម្ពុជា និងបានដើរហួសកម្រិតអាណត្តិភារកិច្ចរបស់ខ្លួន៕